KJEKK DAG FOR BORNA: Victoria Epland (t.h.) og Sofie Nortveit Fagerbakk kosa seg i folketoget frå Våge til Tysneshallen i fjor.  (Arkivfoto: Ingunn Gjærde)
KJEKK DAG FOR BORNA: Victoria Epland (t.h.) og Sofie Nortveit Fagerbakk kosa seg i folketoget frå Våge til Tysneshallen i fjor. (Arkivfoto: Ingunn Gjærde)

Leiar: Variert 17. mai-program for heile kommunen

Publisert 16.05.2018 kl. 15.00. Oppdatert kl. 15.37.

Me er etter kvart mange i landet vårt som har levt heile liva våre i eit fritt land. I år er det 73 år sidan det var slutt på fem harde krigsår, og Norge vart på ny eit fritt land. Det har me heldigvis vore sidan.

Me skal alle gle oss over at me får bu i eit fritt land. Det er det ikkje alle menneske kringom i verda som får. Difor er det heilt på sin plass at feiringa av nasjonaldagen vert markert på ein storstila og fin måte.

Lokalt gler me oss over at det er markering kringom i mange bygder på Tysnes. I 17. mai-programmet som ein kan lesa annan stad i avisa i dag (og sist veke), finn ein program for både Reksteren, Flatråker, Jensvoll bedehus, Flatråker, Onarheim, Lunde og fellesfeiringa i Tysnesbygda.

Det er fint at det om føremiddagen er fellesmarkering, med folketog og samling i Tysneshallen. Det er viktig for samhaldet i Tysnes. I år vert det femte året på rad med fellesfeiring. Initiativet som vart teke i samband med 200-års markeringa i 2014 med fellesmarkering om føremiddagen, er ei god ordning for Tysnes. I år tek fellesmarkeringa til med folketog frå kaien i Våge klokka halv ti. Her vert det både flaggborg og togoppsett med både barnehagar, småskulen i Uggdal og elevane på mellomsteget på Tysnes skule.

Det er også gledeleg å sjå at det er markeringar kringom i heile kommunen. Det viser at folk er viljuge til å ta eit tak for fellesskapet. Me får vona at dette vert sett pris på, og at mange stiller. For livet i bygdene våre er det viktig med slike lokale markeringar. Mange ferierande er også på Tysnes på nasjonaldagen, og deltek på bygdemarkeringane. På den måten er 17. mai eit fint høve til å knyta tettare band mellom fastbuande og ferierande.

Det er prisverdig at falne under krigen vert heidra. Både i Tysnesbygda, i Uggdal, på Reksteren, i Lunde og på Onarheim er det markeringar og kransenedleggingar ved minnestøttene. Det er ein fin og verdig tradisjon som er viktig å føra vidare.

I skrivande stund er det sommarvarme utanfor redaksjonslokala. Vervarselet for 17. mai er også bra. Litt kaldare blir det, med litt nordavind. Men det toler me.

Me oppfordrar små og store til å ta del i 17. mai-feiringa i Tysnes.

redaksjonen@tysnesbladet.no


Siste saker Gå til framsida