PÅ HOGGET: Lorentz Lunde bad folk hjelpa han med namn på vinnaren av bodrunden. - På ein god dag hugsar eg kva mine eigne born heiter, sa han, og fekk publikum til å le godt.
PÅ HOGGET: Lorentz Lunde bad folk hjelpa han med namn på vinnaren av bodrunden. - På ein god dag hugsar eg kva mine eigne born heiter, sa han, og fekk publikum til å le godt.

– Første gong, andre gong, tredje gong.... SELD!

Auksjonarius Lorentz Lunde hadde full kontroll på bodrundane, då inventaret på Hovland bu- og omsorgssenter blei seld unna laurdag ettermiddag.
Publisert 10.06.2018 kl. 13.41. Oppdatert kl. 14.08.

– 200 kroner!

– 200 kroner er bydd. Torstein, det er framleis berre ein dessert det på Haaheim, sa auksjonariusen spøkefullt, og kikka bort på Torstein Hatlevik.

Husfaren på Haaheim Gaard kunne ikkje la det bli siste ord i bodrunden, og la raskt inn eit nytt bod.

Mange pengesetlar skifta hender denne laurdag føremiddagen, og det tok ikkje lang tid før pengeskrina byrja å fylla seg opp.

– Me fekk inn over 30.000 kroner, fortel Lars Mæland, leiar i Tveit bygdalag.


Leita etter godbitane

Saman med Tysnes kystlag og Tysnes musélag, arrangerte dei tre laga loppemarknad og auksjon laurdag ettermiddag. Tysnes kommune let alle inntektene frå buet til det gamle Hovland bu- og omsorgssenter gå til laga.

Dagen byrja på best mogleg måte. Allereie før dørene opna, stod 30 personar utanfor og venta. No skulle dei beste godsakene sikrast.

– Det var danna og veloppdragne folk, og dei gjekk roleg inn. Det var ikkje slik at det var trykk på døra, fortel Mæland.

Blant fat, glas og mugger stod Lars Magne Tornes og Christian Weiss-Tornes og diskuterte.

– Passar denne inn på hytta?

Paret som bur på Ålgård, men har hytte på Tornes, hadde lese om arrangementet i lokalavisa.

– Me måtte bort og høyra på auksjonen, fortalde Lars Magne.

Litt innkjøp til hytta blei det også. Både eit lite bord og nokre småting skulle heim til Tornes.


Mykje fint

Ei som også hadde teke turen til loppermarknaden var Sylvi Sundal Lien.

– Eg likar veldig godt eldre ting, og eg berre måtte innom og sjå kva som var her, sa Lien.

Ho var på utkikk etter alt frå glas og servise til småmøblar.

– Gamle ting skal me ta vare på, sa Lien.

Ho var ei av mange som ikkje gjekk tomhendt heim frå Hovland. Dei aller finaste gjenstandane blei auksjonerte bort. Edvin Mæland (9) testa ut det gamle trøorgelet før auksjonen starta.

– Det er litt vanskeleg å spela på, sa han, medan han konsentrerte seg om både å pumpa med beina, og treffa dei rette tonane.

Niåringen syntest det var gøy å vera på loppemarknaden. Både små og store hadde funne vegen til Hovland, men for alle borna var det ikkje berre gøy og moro.


Bodgivar (8) slo til

Andrine Nikolaysen (8) var nemleg ikkje komen berre for å kikka seg rundt. Her skulle det gjerast business.

– 25 kroner!

Mange hovud snudde seg då ei lys stemme framme i rommet byrja å leggja inn bod under auksjonsrunden. Nikolaysen hadde sett seg ut både ein skrivemaskin og ein reknemaskin som skulle bli med heim.

– Nokon over, spurde Lunde.

– Første gong, andre gong, tredje gong..., seld til Andrine for 25 kroner, sa auksjonarius, og banka klubba i veggen.

Åtteåringen som var med bestemor på auksjon, fekk det som ho ville i begge bodrundane, og jammen stakk ho ikkje av med både skrivemaskin og reknemaskin.


Lakselus

Sjølv om det ikkje var nokon som måtte punga ut dei største summane under auksjonen, blei det likevel nokre underhaldande bodrundar.

Blant anna skulle eit gamalt mikroskop seljast. Ein av bodgivarane var laksekonge Gerhard Meidell Alsaker.

– No skal Gerhard sjå etter lakselus, sa auksjonarius Lunde med glimt i auget.

Og mikroskopet blei Alsaker sitt, for 400 kroner.

– Ha ha, Gerhard, den lusa ser du utan mikroskop, flirte Lunde etter bodrunden.


Slik ein hadde håpa

Mange av gjenstandane fekk nye heimar laurdag ettermiddag. Både ein strandebarmar og fleire kister blei auksjonerte bort.

Kva som skjer med gjenstandane som ikkje blei selde er framleis litt uvisst. Kanskje blir trøorgelet lagt ut for sal på Finn.no.

Arrangøren sjølv var storfornøgd med dagen.

– Dette blei slik med håpte på, seier Lars Mæland.

Noko eksakt tal på kor mange som var innom har ikkje bygdalagsleiaren, men i tillegg til dei 30 som stod på døra då dei opna, seig det på med folk heile dagen.

Oppteljinga av kontantar viser at 31.113 kroner var komen i kassen då dørene stengde. I tillegg kjem Vipps-beløpet som i alle fall blir over 2.000 kroner.

– Lorentz som auksjonarius fungerte veldig bra. Me har hatt eit godt samarbeid med kommunen, og laurdag hadde me 16 frivillige som gjorde ein flott jobb, skryter Lars Mæland.



HANDLAR: Christiane Weiss-Tornes gjorde fleire gode kjøp på loppemarknaden.
HANDLAR: Christiane Weiss-Tornes gjorde fleire gode kjøp på loppemarknaden.
KONGELEG: Marcus Dalland sikra seg både bilete av kongeparet og dette vesle pyntefatet av Kong Haakon VII. - Du kan ikkje reisa på jobb i Kystvakta utan dette, meinte Lunde.
KONGELEG: Marcus Dalland sikra seg både bilete av kongeparet og dette vesle pyntefatet av Kong Haakon VII. - Du kan ikkje reisa på jobb i Kystvakta utan dette, meinte Lunde.
DAGENS YNGSTE: Andrine Nikolaysen (8) imponerte, og kjøpte fleire gjenstandar under auksjonen.
DAGENS YNGSTE: Andrine Nikolaysen (8) imponerte, og kjøpte fleire gjenstandar under auksjonen.
STAVHUMOR: - På denne står det "jeg rusler hjem", sa Lars Mæland, før han raskt følgde opp med; - Nei, det er visst Jerusalem.
STAVHUMOR: - På denne står det "jeg rusler hjem", sa Lars Mæland, før han raskt følgde opp med; - Nei, det er visst Jerusalem.
IVRIG BODGIVAR: Vigdis Vatne kjøpte fleire sett med sølvtøy. På armen har ho barnebornet Ella Stenersen Nesse (3). I dørkarmen (t.v.) følgjer Gerhard Meidell Alsaker nøye med på auksjonen.
IVRIG BODGIVAR: Vigdis Vatne kjøpte fleire sett med sølvtøy. På armen har ho barnebornet Ella Stenersen Nesse (3). I dørkarmen (t.v.) følgjer Gerhard Meidell Alsaker nøye med på auksjonen.
PRØVDE TRØORGELET: Edvin Mæland (9) syntest det var litt vanskeleg å få lyd i trøorgelet.
PRØVDE TRØORGELET: Edvin Mæland (9) syntest det var litt vanskeleg å få lyd i trøorgelet.
GODE KJØP: Mange køyrde heim med full bil laurdag ettermiddag.
GODE KJØP: Mange køyrde heim med full bil laurdag ettermiddag.

Siste saker Gå til framsida