EIN OPPTUR: Camilla Korsnes (f.v.), Morten Haaland, Ingunn Gjærde og Vetle Mikkelsen syntest alle det var heilt topp med ein tur til Tysnessåta i arbeidstida. (Foto: Ole Skaten)
EIN OPPTUR: Camilla Korsnes (f.v.), Morten Haaland, Ingunn Gjærde og Vetle Mikkelsen syntest alle det var heilt topp med ein tur til Tysnessåta i arbeidstida. (Foto: Ole Skaten)

Diskusjonane gjekk høgt

Fredag morgon hadde «Tysnes» redaksjonsmøte 753 meter over havet.
Publisert 11.06.2018 kl. 13.00. Oppdatert kl. 14.03.

Og med det veit du svaret på eit av spørsmåla i spåmannkonkurransen vår, der lesarane vart spurde om dei trudde me kom til å ha redaksjonsmøte på Tysnessåta i 2018.

– Eit spenstig innslag i kvardagen. Dette har eg ikkje opplevt på andre arbeidsplassar, seier journalist Vetle Mikkelsen etter turen.

Han filma delar av møtet til ei direktesending på Facebook, som i skrivande stund har tett på 2.500 visningar. Reprisen finn du under:


Ulikt kondisjonsnivå

Dei minst spreke i redaksjonen (inkludert underteikna) hadde på førehand planlagt å ha eit lite forsprang frå Solheimsdalen, men det tok ikkje lang tid før eliten (les: dei eldste) nådde desse att. Fram til toppen kom me likevel alle, og med den formidable utsikta frå varden vart slitet raskt gløymt.

Journalist Øyvind Bjerkestrand har eit vondt kne, og fekk difor halda fortet i redaksjonslokala i Våge. Men han var sjølvsagt med på videochat.

– Eg vart litt misunneleg, vedgår han.


Hjorten følgde med

I strålande solskin fekk redaksjonsgjengen lufta alt frå Stoke-jubileum og komlelaging med flyktningar, til ein byggjestans for Alsaker. Dette var også av interesse for ein hjort, som stod og høyrte på i nærleiken.

– Det var synd me ikkje hadde kameraet oppe så me fekk «hjort» noko med det, seier Vetle, som syntest det var heilt topp å få sveitta litt før jobb.

– Mindre gøy var det å bli halvvegs oppeten av klegg, legg han til.


Bra for helsa

Men trass mange stikk: Eit redaksjonsmøte på Tysnessåta er bra for helsa, slår journalist Ingunn Gjærde fast.

– Det er også veldig bra for arbeidsmiljøet at me kan gjera slike ting. Ein utruleg flott tur med gode kollegaer, smiler ho.

Også redaktør Ole Skaten er godt fornøgd med turen.

– Det er fint å koma ut i naturen i lag med entusiastiske medarbeidarar. I naturen løyser ein utfordringar og får nye idear, kommenterer han.

Siste saker Gå til framsida

Forventar ein kjekk konsert

– Julekonserten er ein årleg tradisjon. Onarheim Musikklag har hatt den så lenge eg har spelt med dei, for å seia det sånn, fortel Magne Storesætre.