SPANANDE: Iva Andronikidu (t.v.) stortreivst i oselvaren. I midten sit læremeister og rormann Svein Økland. Oddvar Helland (t.h.) følgjer instruksane.
SPANANDE: Iva Andronikidu (t.v.) stortreivst i oselvaren. I midten sit læremeister og rormann Svein Økland. Oddvar Helland (t.h.) følgjer instruksane.

– Eg føler eg er i eitt med vatnet

Det var ideelle forhold for Iva Andronikidu, då ho for første gong fekk prøva å segla med oselvar.
Publisert 12.06.2018 kl. 13.12.

Andronikidu smilte frå øyre til øyre då ho kom i land etter den uhøgtidelege regattaen. Ikkje nok med at ho og sambuar Oddvar Helland hadde vunne siste runde, denne opplevinga freista til gjentaking.

– Det er ein fin dag for segling, og så er det akkurat passeleg med vind, sa Helland.

Andronikidu hadde aldri segla i ein oselvar før, og då ho høyrde om sjøsportsdagen til Njord/Tysnes kunne ho ikkje la sjansen gå i frå seg.

– Eg følte eg var i eitt med vatnet, sa ho smilande.


For alle

Laurdag ettermiddag inviterte Njord/Tysnes til sjøsportdag.

– Me prøver å få opp interessa for oselvarsegling. Det er ei utfordring å rekruttera nye ungdomar og vaksne til sporten, sa Einar Aslaksen, leiaren i Njord/Tysnes.

Sju nybegynnarar hadde teke turen for å testa ut segling med tradisjonsbåtane. Fire erfarne rormenn viste dei ferske seglarane tips og triks.

– Det er heilt ideelle forhold. Det bles 3-4 meter i sekundet, og vêret er kjempefint, sa Aslaksen.

– Me fylte opp båtane i føremiddag, og har vore på sjøen sidan kvart på tolv, la kasserar i klubben Steffen Sleire Opdal til, i det han steig på land i tre-tida.

Sjøsportsdagen blei arrangert for andre året, og klubbmedlemane var heilt einige i at dette var noko som gjerne kunne gjentakast.


Segla heile livet

Med seg i båten hadde Helland og Andronikidu fått erfarne Svein Økland som læremeister.

– Svein var veldig flink å læra bort, skrytte Andronikidu.

Økland sjølv synest det er flott at yngre krefter kjem til sporten. Borna Åshild og Sindre har vore med han og segla i fleire år.

– No har eg blitt så gamal at eg gjerne skulle sett at nokre av ungane overtok rorpinnen, sa Økland.

Oselvaren har vore i familien sidan 1947, då faren gjekk til innkjøp av han. Svein har sjølv segla båten sidan 1962.

Berre fem gonger har han kollsegla med oselvaren. Rormann Økland og dei to ferske seglarane frå Onarheim heldt båten på rett kjøl denne laurdagen også.


Prøvde kajakk

Ei anna som kom tørrskodd på land var Monica Reimdal. Ho hadde rett nok prøvd ut ein litt mindre båt på sjøsportsdagen.

For første gong testa ho kajakk, og fekk seg ein fin runde i området rundt naustet til Njord/Tysnes.

– Det freistar veldig å prøva igjen, sa Reimdal.

Sjølv om det ikkje blei grilling om ettermiddagen, grunna grillforbodet, blei sjøsportsdagen ein suksess.

Med eit NM i oselvarsegling, som skal arrangerast på Tysnes til neste år, ønskjer klubben å få på plass endå fleire nye seglarar.

– Me håpar å kunna stilla med 6-7 båtar under NM, sa Aslaksen.

Etter dei smilande ansikta å dømma, skulle alt liggja til rette for at dette ikkje var siste gong nybegynnarane fekk vind i segla.


TJUVSTART: Morten Epland markerte at ein av båtane hadde litt for mykje hastverk med å koma seg av garde under regattaen. Til høgre står tidtakar Olav Andersen.
TJUVSTART: Morten Epland markerte at ein av båtane hadde litt for mykje hastverk med å koma seg av garde under regattaen. Til høgre står tidtakar Olav Andersen.
GOD FART: Robert Dalland tok imot då Oddvar Helland kom inn til kai med båten.
GOD FART: Robert Dalland tok imot då Oddvar Helland kom inn til kai med båten.
VIND I SEGLA: Fire privateigde oselvarar var med på sjøsportsdagen.
VIND I SEGLA: Fire privateigde oselvarar var med på sjøsportsdagen.

Siste saker Gå til framsida

Sluttar som drosjesjåfør

– Eg har tenkt lenge på dette, fortel Elin Borgen.Det er ikkje vanskeleg å skjøna at dei fleste kjenner den sympatiske drosjesjåføren. Over halvparten av bilistane som passerer, vinkar til Borgen, i det ho møter «Tysnes» langs vegen i Uggdal.

Knuste Bergen Allfot

Søndag drog Njardar sitt a-lag i land ein overtydande 7-0-siger på bortebane, og det trass mange forfall.