HEIDRA: Fredag 9. juni blei tysnesforfattar Ingelin Røssland heidra med Ordknappen. Foto: Joar E. M. Klette
HEIDRA: Fredag 9. juni blei tysnesforfattar Ingelin Røssland heidra med Ordknappen. Foto: Joar E. M. Klette

Ingelin Røssland fekk heidermerke – har fleire prosjekt på veg

Fredag 9. juni blei Ingelin Røssland heidra med Ordknappen. Heidermerket er til forfattarar som skriv lettleste og tilgjengelege bøker.
Publisert 13.06.2018 kl. 12.41.

– Det var veldig kjekt og overraskande! Eg var ikkje i Oslo sjølv, men skulle ønskje eg kunne vore der, seier Ingelin Røssland, forfattar og utflytta tysnesing.

Saman med sunnhordlendingen Anders Totland, blei ho fredag heidra med Ordknappen. Heidersmerket blir delt ut av foreininga Leser søker bok, og blir gitt til forfattarar som har utmerka seg, ved å skriva lettleste bøker, som er tilgjengelege for alle.

– Det skal vera bøker både for folk som er veldig gode til å lesa, og folk som er mindre glade i å lesa. Det kan vera vanskeleg å skriva spennande og godt, og likevel tilgjengeleg for alle, seier Røssland.

Røssland var nominert for boka Hevner frå i fjor. Boka blei òg nominert til Uprisen, ungdommens eiga kåring av årets beste ungdomsbok.


Ny ungdomsroman på veg

– Eg held på med ein ny ungdomsroman. Eg har fått stipend av Leser søker bok. Det fekk eg for Hevner òg, fortel ho, og legg til at den nye boka heiter Oh my god.

Ho beskriv den som ein kjærleiksroman med ein lukkeleg slutt. Til liks med Hevner, skal denne også vera ei lettlest og tilgjengeleg bok.

– Den handlar om ei som inviterer på ein stor heime-åleine fest. Mora, som er åleinemor, får nok, og sender jenta til å bu hos bestemor si, fortel Røssland.

Ho legg til at mange av dei typiske letttleste bøkene rettar seg mot gutar, men at det også finst jenter som ikkje akkurat synst norskfaget er kjekt. Denne boka vil i stor grad vera retta mot sistnemnte.


Journalistbakgrunn

Røssland har bakgrunn som journalist, blant anna i «Tysnes» og Hardanger Folkeblad. Har den bakgrunnen hjelpt ho å skriva lettleseleg?

– Ja, det trur eg. Det er ein stil som liknar journalistikken, seier Røssland, og legg til at karakteristikkar som korte og tydelege setningar går igjen i begge sjangerar.

– Og så er det jo vanleg å skriva ut ting som gjerne hadde blitt usagt i andre bøker. Til dømes ville ein i ei vanleg bok kunna skriva noko slikt som «ho gjekk inn på kjøkkenet, og kjente det knaut seg i magen». Då vil lesaren få assosiasjonar til at det er noko på gang. I ei lettlest bok ville ein kanskje skrive «ho gjekk inn på kjøkkenet. Det knaut seg i magen. Ho var redd», forklarer Røssland.

Ho legg til at dette er ein stil som meir lesevant ungdom kanskje vil synast er kjedeleg og kjlisjéprega, men som er nødvendig for å gjera bøkene meir tilgjengelege.

– Så eg trur ikkje det er tilfeldig at Anders Totland, den andre personen som vann i år, er journalist i Sunnhordland, seier ho, og refererer til påverknaden frå journalistbakgrunnen deira.


Inspirasjon frå Tysnes

Røssland er utflytta tysnesing. Bruker ho ofte Tysnes som inspirasjon?

– Ja, det gjer eg jo eigentleg ganske mykje. Eg bruker ofte Tysnes og eg bruker ofte Odda. Tysnes når eg treng eit typisk kystlandskap, og Odda når eg treng fjordar og fjell. Hevner er ganske Odda, medan den nye boka er ganske Tysnes, seier Røssland.

Ho legg til at ho naturlegvis ikkje skriv at plassane er basert på Tysnes eller Odda, slik at lesaren skal kunna sjå for seg ein eigen stad.

Sist «Tysnes» snakka med ho, jobba ho med ein historisk roman om Tysnes. Korleis går det med det arbeidet?

– Det går litt dårleg. Det er kjempevanskeleg å skriva ein historisk roman, seier ho, men legg til at ho liker å gjera research om tematikken.

Ho held fram:

– Det tar tid å skriva vaksenromanar. I tillegg kom den nye ungdomsromanen litt i vegen. Men eg jobbar framleis med den historiske romanen, avslører Røssland.

Til sist skryt ho av Tysnes-forfattaren Mats Rage, som har fått skryt for debutromanen hans:

– Det er flott å sjå at det finst folk på Tysnes som skriv, og skapar ting, avsluttar ho.


Siste saker Gå til framsida

Debatt: El-bilar og betaling på innanriksferjer

Til å byrja med, var el-bilar fritekne for betaling på riks- og fylkesvegferjer. Ein løyste då berre billett for føraren av bilen. Dette vart det ei endring på i 2016/2017.Då vart det vedteke at el-bilar skulle betala for seg på lik linje med andre bilistar. Men dei skulle berre betala 50 prosent av vanleg biltakst. Og då var føraren inkludert i prisen. Men dei som brukte...

Leiar: Markerte Tysnes med nytt EM-gull

Det er stas når tysnesingar markerer seg utanfor kommunen, ja, til og med i utlandet. Ekstra stas er det når det er unge tysnesingar som set Tysnes på kartet.I sist veke kom styrkeløftar Anna Dorthea Espevik heim til Tysnes med ein ny gullmedalje. Denne gongen var det eit EM-gull. Europameisterskapen vart...