Skammeleg – endå ein gong!
– Diskriminering retta mot dei mindre høglydte i samfunnet skal ein ikkje godta, skriv Tor E. Thorsen.
Rema 1000 følgjer sommartradisjonen – ein parkeringsplass for rørslehemma vert suverent stengd for kundar som treng disse plassane! Blomereolar tek over, og er det trongt ved inngangen frå før, vert i tillegg midtgangen fylt opp med frukt- og grønsaksstativ. Ein har i det lengste hatt von om at butikken ville ta til vitet, men den tida er no over.
Her er minst to sider ved denne saka. Den eine er at butikken konsekvent nektar å ta inn over seg tidlegare reaksjonar på dette. M.a. har kommunen teke problemet opp med butikken direkte, og det vil vere kjent at også einskildpersonar reagerte då plassen vart stengd på same måten førre sommar.
Den andre sida er meir overraskande, og den gjeld at brukarar av dei øyremerkte plassane finn seg i denne nedlatande haldninga frå butikken. Rørslehemma med blåkort godtek å manøvrera rullestol og rullator frå ein tilfeldig plass i utkanten – ein får visst vere glad til at ein i det heile får sleppa inn!
Eg såg nett at ein annan butikk i den same butikkjeda prøvde seg på same praksis med utestenging – nærare bestemt i Lindås! Kva skjedde? Skikkelege handikapstrilar finn seg ikkje i slikt – det blei eit veldig røre med to sider avisartiklar og ofselege reaksjonar frå lokale autoritetspersonar.
Hageartiklane forsvann i ein viss fart, og butikksjefen la seg flat og beklaga det heile – anstendigheita tok over!
No er det fånyttes å ha slik von for kvammabutikken. Praksisen som REMA 1000 i Norheimsund har innført, vil etter kvart verte kjend for både private og offentlege aktørar som ein skamflekk for denne butikken.
Diskriminering retta mot dei mindre høglydte i samfunnet skal ein ikkje godta. Då går vi heller dit der folkeskikk enno ikkje er billegvare.
Vikøy, 9. juni 2018
Tor E. Thorsen
