FOLKEKJÆR ARTIST: Kyrkjekonserten på Onarheim er ein populær programpost under Tysnesfest, og i år har festivalen booka Ingebjørg Bratland. (Foto: Isabel Watson)
FOLKEKJÆR ARTIST: Kyrkjekonserten på Onarheim er ein populær programpost under Tysnesfest, og i år har festivalen booka Ingebjørg Bratland. (Foto: Isabel Watson)

Lovar ein magisk konsert i kulturkyrka

Tysnesfest har lenge ønskt seg Ingebjørg Bratland til kyrkjekonserten. I år klaffa det endeleg.
Publisert 09.07.2018 kl. 12.29.

Søndag skal Vinje-bygdingen halda konsert både på Tysnes omsorgssenter og i kulturkyrkja på Onarheim.

– Ho er ein artist som lett kunne ha spelt på Gjerstad og andre større arenaer, men me ser for oss at ho vil passa veldig bra inn i kyrkja. Publikum ser ut til å vera einige, for billettsalet til kyrkjekonserten har gått betre enn nokon gong før, seier dagleg leiar i Tysnesfest, Øystein Vaage.

Måndag føremiddag er det berre 20 billettar igjen.

– Om dette er noko folk ynskjer å få med seg, bør dei ikkje venta for lenge. I fjor var det mange som ikkje fekk billett til kyrkjekonserten, åtvarar han.


Nordisk meister i folkemusikk

28 år gamle Ingebjørg Bratland er kjent for si vakre stemme, unike sangteknikk og formidlingsevne. Og som 28-åring har ho allereie ei merittliste som mange kan misunna.

– Å få ein artist som henne til kyrkjekonserten er utruleg kjekt, seier Vaage.

Bratland starta med kveding då ho var fem og eit halv år gamal, og etablerte tidleg eit namn i folkemusikkmiljøet. I denne sjangeren er ho kåra til nordisk meister, og talentet hennar har resultert i fleire gjeve stipend. Ho markerte seg også sterkt med sin medverknad i H.K.H Kronprinsesse Mette Marit sitt samlealbum «Sorgen og gleden», og ved å syngja tittelsporet på Jul i Svingen-serien til NRK.


Gjennombrot i 2015

I 2013 gav ho ut det kritikarroste albumet «Heimefrå» saman med Odd Nordstoga, og for dette fekk dei spelemannspris i klassen folkemusikk/tradisjonsmusikk. Samarbeidet resulterte i meir enn 150 livekonsertar.

Hennar fyrste soloalbum «Berre meg» kom i 2014, og låten «Ingen er som du» blei umiddelbart A-lista på NRK P1. Også dette albumet blei spelemanns-nominert.

Bratland sitt store gjennombrot kom sommaren og hausten 2015. Låtane «Stjernene» og «Fordi jeg elsker deg» trefte både grasrota og popmusikk-elskarar over heile landet, og albumet «Månesinn» vart seld i over 40.000 eksemplar. Det ferskaste albumet hennar, «Hjarteskjell», kom ut i fjor.

– Bratland har ei nydeleg sangstemme, og dette kjem til å bli ei magisk stund i kyrkja, lovar Vaage.


Dagen derpå

– Kva anna bør ein få med seg på Tysnesfest sin avslutningsdag?

– Det har jo blitt ein tradisjon med Dagen-derpå gudsteneste i Bermudateltet, og i år får me besøk av sokneprest Reidar Ådnanes. Her vil Leo Dommersnes Sundström og Tore Hodneland stå for musikken med bandet «Duo eg». Dette er eit arrangement som kan fengja mange – ikkje berre dei som er ivrige kyrkjegjengarar til vanleg.

Vaage vil også anbefala bussturen til Tysnes skulemuseum i Solheimsdalen, der Olav Skjellevik skal vera guide.

– Kjenner eg Olav rett, blir det nok også andre interessante stopp på vegen, sluttar han.


Siste saker Gå til framsida