RETURNERER: Alan Walker fekk ikkje spelt på Tysnesfest i fjor, men gjer eit nytt forsøk i år. (Foto: MER/Rikkard Häggbom)
RETURNERER: Alan Walker fekk ikkje spelt på Tysnesfest i fjor, men gjer eit nytt forsøk i år. (Foto: MER/Rikkard Häggbom)

Tilbake etter avlysinga

Publisert 09.07.2018 kl. 06.00.

Den unge superstjerna Alan Walker var eit av dei store trekkplastera til fjorårets Tysnesfest. Men diverre for festivalpublikummet vart konserten avlyst av sikkerheitsmessige årsaker, grunna uvêr.

– Han hadde veldig lyst å koma tilbake til Tysnes. Så lenge me fekk datoane til å passa, var det ikkje noko problem å overtala Alan, fortel den daglege leiaren i Tysnesfest, Øystein Vaage.

Etter fjorårets antiklimaks kjem Walker tilbake til Tysnesfest som headliner laurdag.

– Då vert det ordentleg feststemning, uttalar Vaage.


Internasjonal stjerne

Alan Walker har eit tett konsertprogram i sommar, og skal spela på festivalar over heile verda. I april stod han på scenen på Coachella-festivalen i California saman med stjerner som Beyonce og Eminem. Dagen før konserten på Gjerstad, speler han på AirBeat One Festival i Tyskland.

Bergenseren, som er fødd i England, har i ein alder av 20 allereie vorte ei etablert stjerne. Han slo igjennom i 2015 med låten «Faded», som vart ein hit over heile verda. «Faded» har i skrivande stund 820 millionar avspelingar på Spotify, noko som gjer låten til ein av dei 30 mest spelte låtene på strøymetenesta. Musikkvideoen har over 1.7 milliardar avspelingar på Youtube, nesten ein milliard meir enn «The Fox» av Ylvis, som vart ein megahit i 2014.

I tillegg til «Faded» har Walker levert slagerar som «Sing Me To Sleep», «Alone» og den nyaste singelen «Ignite», med Julie Bergan, K-391 og SEUNGRI, som gjekk rett inn på toppen av VG-lista, og no berre er slått av Mads Hansen med «Sommerkroppen».


Elvis Costello må avlysa

Ein av dei største internasjonale stjernene som skulle til Gjerstad laurdag, måtte i førre veke diverre avlysa konserten. Sjukdom gjer at heile den pågåande Europa-turneen til Elvis Costello & The Imposters går i vasken.

– Me ynskjer Elvis Costello god betring, og vonar han kan koma til oss ved ein seinare anledning, seier Vaage i ein pressemelding.

Arrangørane fekk likevel på plass erstattarar for briten.Dei to som skal ta over for Elvis Costello, er artisten Sondre Justad, som spelte på Tysnessåto for to år sidan, og bandet Hellbillies frå Ål i Hallingdal, som har spelt på Tysnesfest fleire gongar tidlegare.


Gåte gjer comeback

Søskenparet Sveinung og Gunnhild Sundli starta Gåte i 1999. Med ei blanding av folkemusikk og eksplosiv rock vart dei fort eit populært band. Songane «Statt Opp (Maggeduliadei)» og «Sjå Attende» fekk i 2003 og 2004 fleire veker på VG-lista.

I 2005 vart bandet oppløyst, men gjorde comeback i 2017. Det har bringa med seg EP-en «Attersyn», og ei rekkje konsertar rundt om i landet.


Folkeliv i Våge

Tysnesfest-laurdagen er kjend for sitt yrande folkeliv. I Våge vert det marknadsdag med stand, buer og variert underhaldning.

På føremiddagen startar det arrangørane kallar «Tidenes parade» med klovnar, dansarar og forskjellige ablegøyer. I tillegg vert det musikk frå den amerikanske funk-brassgruppa Lucky Chops.

Litt seinare vert det «Ta Sjansen» frå kaien i Våge, i år med ein spesiell gjest.

– Han har jo leia «Ta Sjansen» i Holmenkollen tidlegare, så han var veldig gira på å vera med her, fortel Vaage.Mannen det er snakk om er ingen andre enn Alf Tande-Petersen, betre kjend som Tande-P. Den tidlegare NRK-profilen er ei kjend stemme for mange og han er hugsa som programleiar for ei rekkje underhaldningsprogram på NRK. Mellom annan «Hodejegerne», som gjekk på TV frå 2002 til 2004.


Haaheim og Årbakka

Det er ikkje berre i Våge og Gjerstad at det vert aktivitet under Tysnesfest. På Haaheim Gaard og Årbakka Handelsstad er det variert program alle dagar.

Haaheim Gaard lokkar kvar dag med liv i restauranten, kulturhagen og interiørbutikken. Fredag og laurdag vert det proseccolunsj for damer, laurdag og søndag vert det operakveld med sopran Ailie Reid, baryton Torstein Hatlevik og pianist Irene Simonsen.

Samtidig er Årbakka Handelsstad open alle dagar med krambu og utstilling.


Ut på sjøen

For dei som vil ta turen på sjøen, er laurdag ein bra dag. Om ikkje ein fartsfylt rib-tur freistar, kan ein gå om bord på Statsraad Lehmkuhl som har ope skip, eller MS Sunnhordland som arrangerar «Drop-in» swingkurs med dansarar frå Bergen.

Fleire skip legg frå kai denne dagen. På MS Midthordland er det blues-cruise med dei lokale karane i Big Men Bluesband. Mindre lokalt vert det når galeasen Loyal seglar på Bjørnafjorden med det irske bandet Tupelo, ei gruppe som spelar popmusikk inspirert av irske, tradisjonelle folkeviser.


UVÊR STOPPA KONSERTEN: Slik såg det ut då Alan Walker-konserten vart avlyst i fjor. (Foto: Camilla Korsnes)
UVÊR STOPPA KONSERTEN: Slik såg det ut då Alan Walker-konserten vart avlyst i fjor. (Foto: Camilla Korsnes)
TA SJANSEN: Populære "Ta Sjansen" er på programmet nok ein gong, i år med Tande-P som speaker. (Arkivfoto: Ingunn Gjærde)
TA SJANSEN: Populære "Ta Sjansen" er på programmet nok ein gong, i år med Tande-P som speaker. (Arkivfoto: Ingunn Gjærde)
MÅ AVLYSA: Elvis Costello skulle spelt på Gjerstad laurdag, men må avlysa konserten grunna sjukdom. Inn som erstattarar kjem Sondre Justad og Hellbillies. (Foto: Bernie Mcallister)
MÅ AVLYSA: Elvis Costello skulle spelt på Gjerstad laurdag, men må avlysa konserten grunna sjukdom. Inn som erstattarar kjem Sondre Justad og Hellbillies. (Foto: Bernie Mcallister)
MARKNADSDAG: Det er ofte mykje folk som tek turen til marknadsdagane i Våge. (Arkivfoto: Camilla Korsnes)
MARKNADSDAG: Det er ofte mykje folk som tek turen til marknadsdagane i Våge. (Arkivfoto: Camilla Korsnes)

Siste saker Gå til framsida