POPULÆR: Kari Bremnes får gode kritikkar etter konserten på Solstråleøya onsdag kveld.
POPULÆR: Kari Bremnes får gode kritikkar etter konserten på Solstråleøya onsdag kveld.

– Heilt eksotisk, seier Kari Bremnes etter konserten på Solstråleøya

– Ei stor oppleving. Utruleg flott. Eit kjempeflott opplegget. Superlativa sit laust når Kari Bremnes oppsummerer konserten på Solstråleøya onsdag kveld til «Tysnes».
Publisert 11.07.2018 kl. 22.41. Oppdatert kl. 22.45.

Og det er ikkje berre artisten sjølv som kjem med lovord på løpande band.


– Ei stor oppleving

Lokal musikar Endre Hodneland er endå meir full av lovord av det han fekk høyra og oppleva.

– Heilt imponerande. Det var veldig god musikk, som eg legg stor vekt på. Ho er ein stor artist i formidlingsevne og med stor breidde, og veldig musikalsk, seier Hodneland, som ikkje har høyrt Kari Bremnes live tidlegare.

Men han har eit sterkt forhold til mykje av musikken hennar, og kjenner mange av låtane veldig godt. Fleire av dei har han også spelt sjølv.

Gitarsoloen som ein fekk høyra midtvegs i konserten, frå Skrik, var han spesielt imponert over.

– Samla sett var heile konserten ei stor oppleving, oppsummerer Endre Hodneland.


– Heilt magisk

Olav Høgestøl fekk også oppleva Kari Bremnes live for fyrste gong.

– Det var heilt fantastisk bra. Ja, heilt magisk, seier han.

– Det trur eg dei som spelte synest også. Det verka som dei var heilt overvelda over øya og stemninga, legg han til.

Berit Løkling hadde teke turen eins ærend frå Stord for å få med seg konserten. Ho likar Kari Bremnes, og har vore på fleire konsertar med henne tidlegare. Men det er fyrste gongen ho er på konsert på Solstråleøya. Tidlegare har ho vore på ferietur med båt i området.

– Konserten var veldig bra. Dette var ein seksar. Kari Bremnes har gode tekstar og bandet hennar er veldig bra, seier Berit, og legg til at ramma rundt arrangementet også var veldig fin.


Blant dei fremst

Dei fyrste konsertdeltakarane benka seg tidleg rundt scenen, for å få seg ein god plass. Tre av dei som er veldig tidlege er Evy Hovland og døtrene Christine Hovland og Vibeke Hovland Kleppe, som har teke turen frå ferieplassen på Hovland. For dei tre er det damenes kveld denne onsdagen.

– Dette er julepresangen til meg. Eg elskar Kari Bremnes, strålar Evy.

– Det er heilt topp at det skjer så myke positivt på Tysnes. Me har store forventningar til konserten i kveld, seier Christine, som måtte bytta på ferien for å få med seg Tysnesfest.

– Tysnesfest er veldig flinke å arrangera. Dette er heilt profft. Me gler oss veldig, seier damene samstemte.

På søndag står kyrkjekonserten på Onarheim på programmet.

– Kyrkjekonserten må me ha med oss kvart einaste år. I år vert det ekstra stas. Ingebjørg Bratland er ein toppar, seier Vibeke.


På andre benkerad

Damenes kveld er det også for Randi Løvaas frå Åsane og dotter Monica Løvaas som nyss har flytta til Tysnes, Randi Helland frå Manger og Inger Johanne Berthelsen med hytte på Gjerstad. Dei fire har sikra seg ein god plass på andre benkerad.

Monica har vore på Tysnesfest fleire gonger tidlegare, medan mor Randi er her for fyrste gong. Randi Helland og Inger Johanne Berthelsen har derimot fått med seg Tysnesfest kvart einaste år.

– Eg trur eg har fått med meg alle åra heilt sidan Prikkedagen vart arrangert, mimrar Randi.

I nærare halvannan time fekk damene og dei andre fem-seks hundre tilhøyrarane oppleva songen og musikken til Kari Bremnes og bandet hennar.

– For ein dag, for ein stad og for eit eventyr dette vart, og for ein historie denne øya har. Neste gong kjem eg kanskje med ein song om Ada og John Musgrove, kommenterte Kari Bremnes undervegs i konserten.

Laurdag spelte bandet i Lakseelv i Finnmark i ausande regn og ti plussgrader – i sterk kontrast til den flotte sommarkvelden på Solstråleøya.

– Dette var ei stor oppleving og utruleg flott. Og så er det veldig fascinerande med den historia som denne øya har. Heile opplegget var heilt eksotisk, oppsummerer Kari Bremnes til «Tysnes» før ho hastar vidare. Frå Solstråleøya gjekk turen med ekstra båtskyss til Flesland. Torsdag skal bandet til Kristiansand.


TETT MED FOLK: Fem-seks hunder tilhøyrarar hadde funne vegen til Solstråleøya.
TETT MED FOLK: Fem-seks hunder tilhøyrarar hadde funne vegen til Solstråleøya.
FRÅ HOVLAND: F.v. Vibeke Hovland Kleppe, Christine Hovland og Evy Hovland er fulle av lovord om Kari Bremnes.
FRÅ HOVLAND: F.v. Vibeke Hovland Kleppe, Christine Hovland og Evy Hovland er fulle av lovord om Kari Bremnes.
PÅ ANDRE BENK: F.v. Inger Johanne Berthelsen, Randi Helland, Monica Løvaas og Randi Løvaas gler seg stort til Kari Bremnes kjem på scenen.
PÅ ANDRE BENK: F.v. Inger Johanne Berthelsen, Randi Helland, Monica Løvaas og Randi Løvaas gler seg stort til Kari Bremnes kjem på scenen.
TRAMPEKLAPP: Jubelen sat laust hjå publikum. Her er det trampeklapp før bandet kjem inn att på scenen for ein ny sistelåt.
TRAMPEKLAPP: Jubelen sat laust hjå publikum. Her er det trampeklapp før bandet kjem inn att på scenen for ein ny sistelåt.

Siste saker Gå til framsida

Ny singel frå Symra

– Me skal sleppa ein låt som heiter «Purple Sweater». Det er den nyaste av dei låtane me har spelt inn så langt, seier Øyvind Kleppe i Symra.

Leiar: Hurra for 65 meter nytt asfaltdekke

Tysnes har ikkje vore tilgodesett med så veldig mykje nytt asfaltdekke på dei fylkeskommunale vegane dei siste åra. Då Statens vegvesen tidlegare i år presenterte landsoversikta over planlagde nyasfalteringar i 2018, var det ikkje ein einaste klatt på Tysnes. I 2017 var det heller ikkje rare greiene, ein kilometer til saman. Og ser me attende til 2016, var Tysnes tilgodesett med fire...