RIGGARAR: Øystein (i forgrunnen), Magnus (til høgre) og Yngve (i bakgrunnen) var i full gang, då bladet Tysnes kom innom for å prata med dei. (Alle foto: Vetle Mikkelsen)
RIGGARAR: Øystein (i forgrunnen), Magnus (til høgre) og Yngve (i bakgrunnen) var i full gang, då bladet Tysnes kom innom for å prata med dei. (Alle foto: Vetle Mikkelsen)

– Finst det noko kjekkare å gjera ein sommardag?

I dag timar brakar Tysnesfest laus for fullt. Bladet Tysnes har vore på Solstråleøya og snakka med riggemannskapet.
Publisert 11.07.2018 kl. 15.00. Oppdatert kl. 15.06.

– Gjestene får iallfall flott havutsikt frå pissoara, seier Yngve Nesland Vevatne.

Han er ein av dei som har hovudansvaret for rigginga på Solstråleøya. «Tysnes» møter han og arbeidskameratane Øystein Dalland og Magnus Mjøs onsdag, berre nokre timar før øya blir oversvømt av folk.

– Me byrja måndag. Då tok me ut lyd og lys. Tysdag tok me ut bord og benkar, held Vevatne fram.

I dag er det berre sjølve rigginga som står igjen.


Gjer klart for Kari Bremnes

– Utstyret til Kari Bremnes kjem seinare. Me gjer det klart for teknikaren hennar, seier Øystein Dalland, teknisk ansvarleg i Tysnesfest.

Bremnes, som er den som skal ha konsert seinare på kvelden, har nemleg med seg eigen lydteknikar, i tillegg til instrument og lydutstyr.

Dalland kan vidare fortelja at dei har seks russ til disposisjon, som hjelper til med bering og liknande når det trengst. Dei har hjelpt til tidlegare, og skal hjelpa til igjen seinare på kvelden.

– Alt dette skal jo ned igjen i natt, seier Dalland, og legg til at det nok kjem til å gå raskt å rigga ned scenen.


Utfordrande å rigga på ei øy

Riggarane er godt vane med jobben, men Yngve Nesland Vevatne innrømmer at det er nokre særskilte utfordringar med å rigga til konsert på ei øy. For eksempel treng dei eit dieselaggregat, for å sikra nok straum til konserten.

I tillegg kjem fraktproblematikken:

– Alt må jo fraktast med båt. Ein må tenkja på småting, og alt må vera på stell, seier han.

Viss ikkje blir det gjerne fleire turar fram og tilbake frå øya, og ein vil kunna kasta bort nødvendig tid.

Men sjølv om dei vil gjera jobben så effektivt som mogleg, er dei alle opptatte av å gjera ein skikkeleg jobb.

– Det er viktig å gjera ting på ein fornuftig og skikkeleg måte, seier Magnus Mjøs.

Ostringen er teknisk leverandør frå selskapet Konsertsystemer LLB AS, og har jobba mykje med Tysnesfest tidlegare.


Stor kontrast frå i fjor

– Finst det noko kjekkare å gjera ein sommardag, enn å rigga til konsert? spør Øystein Dalland retorisk.

Han legg til at det er ein del kjekkare å rigga i år, enn i fjor.

– I fjor vakna eg halv sju om morgonen, og det regna. Dette er ein heilt annan situasjon, seier Dalland.

Han og Mjøs kan reknast som veteranriggarar for Tysnesfest.

– Me har jo gjort denne jobben saman i ti år, seier Dalland til Mjøs.

Vevatne har òg lang fartstid i Tysnesfest, og reknar med at dette er det åttande eller niande året han jobbar med festivalen.

Ein kan derfor rekna med at rigginga også i år er i trygge hender.



TRANSPORT: Jernhesten er grei å ha som hjelp, når Yngve skal flytta rundt på tunge ting.
TRANSPORT: Jernhesten er grei å ha som hjelp, når Yngve skal flytta rundt på tunge ting.
KLATRAR: Øystein Dalland måtte opp i høgda for å festa lyskastarane.
KLATRAR: Øystein Dalland måtte opp i høgda for å festa lyskastarane.
AGGREGAT: For å sikra nok straum til konserten, må det eit dieselaggregat til. Her ved sida av Yngve Nesland Vevatne.
AGGREGAT: For å sikra nok straum til konserten, må det eit dieselaggregat til. Her ved sida av Yngve Nesland Vevatne.
BAR: Ved baren vil det bli grilling, og servering av pølser frå Dalland Gard.
BAR: Ved baren vil det bli grilling, og servering av pølser frå Dalland Gard.
PUBLIKUM: Foran scena er fleire av publikumsplassane allereie klare.
PUBLIKUM: Foran scena er fleire av publikumsplassane allereie klare.

Siste saker Gå til framsida

Berre MÅ ha peparkakebygd

Mange bidrog til den stilige peparkakebygda på OnarTun i fjor. No håpar ein at folk er like bakelystne i år også. – Dette er no blitt ein tradisjon, me MÅ ha peparkakebygd på OnarTun, seier dei tilsette ved Joker Onarheim. Dei satsar på å få på plass dei første husa til julegrantenninga i slutten av november, og oppfordrar folk til å hiva seg i bakinga. Også Våge får sin...