MED LIV OG LYST: Delina Samson (f.v.), Weini Tekeste og Kristina Hole både dansa og song med. (Alle foto: Camilla Korsnes)
MED LIV OG LYST: Delina Samson (f.v.), Weini Tekeste og Kristina Hole både dansa og song med. (Alle foto: Camilla Korsnes)

Opna Tysnesfest med såpebobler og rock & roll i kyrkja

– Dette var eit veldig fint opplegg. Det er kjekt at dei arrangerer litt for borna også, seier ferieturistane Weini Tekeste og Ivar Hole frå Hønefoss.
Publisert 11.07.2018 kl. 14.42.

Dei har teke delar av familien med til Uggdalskyrkja onsdag føremiddag for å delta på «Generasjonssong», det fyrste offisielle programmet under Tysnesfest 2018.

Familien har studert programmet for Tysnesfest nøye, og songen i Uggdalskyrkja er eitt av arrangementa dei har blinka ut. Konserten med Ingebjørg Bratland i Onarheimskyrkja komande søndag skal dei og få med seg.

– Nokre har også tenkt seg på såtekonserten med Bigbang, seier Ivar, på bergensdialekt.


«Så fint å sjå deg»

Den tidlegare babysongen under Tysnesfest har i år fått namnet Generasjonssong. Namnet høvde godt; mellom dei 30-40 frammøtte var det både små og store; born, foreldre og besteforeldre. Dei yngste var i fleirtal.

I soknepresten sitt fråvær var det trusopplærar Heidi Hollekim som leia programmet i kyrkja, med musikalsk assistanse på piano av organist André Eide.

– Det blir mykje song og litt dans, fortalde trusopplæraren.

Og det vart det, etter at Astrid Dalland hadde ringt med klokkene og André hadde spelt preludium. Alle borna vart sunge velkomne for, med «Så fint å sjå deg», i lag med litt tromming som borna og fekk vera med på.


Rock and roll

Songane som me fekk høyra var mange: «Ingen er så trygg på ferda som Guds barneflokk i verda», «Eit under hender i verda kvar gong eit barn vert til», «Måne og sol», «Ro, ro til fiskeskjær» og «Min båt er så liten og havet så stort». Og deltakinga frå kyrkjelyden var god.

Ein av dei som hadde teke turen til kyrkja, var Lars Hollekim. Han hadde med seg dei to borna sine, Amadeus (3) og Oline (1).

– Me er her for å høyra på musikk og vera med og syngja, seier pappa Lars.

Rock and roll var det også. Helge Olav Instøy og Arne Kleppe var hyrt inn med song og gitar. Dei song den eine songen etter den andre, og dei fekk dei kyrkjelyden med på refrenga.

– No når Marit prest er vekke, så vågar me oss frampå med ein del rockesongar, fortalde Helge Olav med glimt i auga.


Samba-dans for alle

Undervegs i programmet snakka trusopplæraren om trua. Om tru er høg nok, og stor nok og god nok, som ho uttrykte seg.

Dansing var det og i kyrkja, både «Baby samba» og «Bom Chicka».

– Vi danser samba, babysamba, vi danser samba alle mann, stemde Heidi i, og heile kyrkjelyden dansa med.

Og då Heidi stemde i med «Bom Chicka» dansa kyrkjelyden ivrige imellom benkeradene.

Så flinke var folk, at Heidi skrytte ekstra over engasjementet.


Turistar på Neshamn

Weini Tekeste og Ivar Hole elskar Tysnes. Kvar sommar må dei berre ha nokre veker på familiehytta på Neshamn.

– Tysnes er den flottaste staden å feriera, seier dei.

Dei bur på Hønefoss til vanleg, men dei har digitalt abonnement på «Tysnes» og følgjer med på kva som skjer i feriekommunen.

Det er fyrste gongen dei er på babysong, men i Uggdalskyrkja har dei vore tidlegare.

– Dette var eit veldig fint opplegg, seier dei to.

Det er søstera til Ivar, Kirsten Elisabeth Hole, samd i. Ho skryter over opplegget, ho også.

– Då me såg at det skulle vera babysong, hadde me lyst å vera med på det.


Familieplass

No gler dei seg til fine sommardagar på Tysnes. Kirsten Elisabeth, som har teke over familieeigedomen som morfaren kjøpte for snart 80 år sidan, røpar at ho vil bruka ferieplassen også utover hausten.

Med jobb på Os blir det ein del pendling til Tysnes, i staden for til Bergen.

– Det er heilt fantatisk å vera på Tysnes.


KJEKT FOR DEI MINSTE: Såpebobler er ein sikker vinnar.
KJEKT FOR DEI MINSTE: Såpebobler er ein sikker vinnar.
DANS: Under generasjonssongen var det fleire innslag der små og store kunne få røra på kroppane.
DANS: Under generasjonssongen var det fleire innslag der små og store kunne få røra på kroppane.
UNDERHELDT: Kameratane Helge Olav Instøy (t.v.) og Arne Kleppe engasjerte kyrkjelyden.
UNDERHELDT: Kameratane Helge Olav Instøy (t.v.) og Arne Kleppe engasjerte kyrkjelyden.

Siste saker Gå til framsida

Leiar: Hurra for 65 meter nytt asfaltdekke

Tysnes har ikkje vore tilgodesett med så veldig mykje nytt asfaltdekke på dei fylkeskommunale vegane dei siste åra. Då Statens vegvesen tidlegare i år presenterte landsoversikta over planlagde nyasfalteringar i 2018, var det ikkje ein einaste klatt på Tysnes. I 2017 var det heller ikkje rare greiene, ein kilometer til saman. Og ser me attende til 2016, var Tysnes tilgodesett med fire...