PLAST SPREIDD UTOVER: Journalisten trong ikkje gå meir enn 50 meter frå redaksjonslokalet for å finna plastsekkar som var riven i sund.
PLAST SPREIDD UTOVER: Journalisten trong ikkje gå meir enn 50 meter frå redaksjonslokalet for å finna plastsekkar som var riven i sund.

Plast på ville vegar

Plastsekkar til avfallslevering får ikkje ligga i fred over natta.
Publisert 11.07.2018 kl. 14.12.

Torsdag morgon i førre veke vart «Tysnes» tipsa om opprivne plastsekkar og plastsøppel, som var spreidd utover vegane i Våge-området før bossbilane hadde vore på runden sin.

Sidan april har tysnesingane resirkulert plastavfallet sitt i eigne sekkar, som vert levert med papiravfallet og henta kvar fjerde veke.

Alt tyder på at fuglar og dyr fattar interesse for plastsekkane og «går til angrep» på desse nattetid. Dunkane må stå klare klokka seks om morgonen, og difor er det mange som set dei ut kvelden før.

– Det er sjølvsagt beklageleg viss fuglar og dyr går på posane. Då kan det tenkjast at det ligg urein plast i posane som gjer frå seg lukt. Det kan også ramma posar med rein plast viss dyra har vent seg til å finna matrestar i posane, seier Janne Hillersøy, kommunikasjonsansvarleg i SIM.

– Oppmodinga vår er at plasten som vert lagt i posane må vera rein og tørr. Ei eventuell løysing er å leggja ei not over sekken. Ein kan også gjera som tidlegare og levera plasten til miljøstasjonen, seier Hillersøy.

Tysnes miljøsentral er open måndagar og torsdagar, og annankvar laurdag i sommarhalvåret.

Dyr som rotar i plasten har ikkje vore eit stort problem for SIM til no.

– Me har hatt ei prøveordning i Fitjar i tre år med desse plastposane, og der har me ikkje fått tilbakemeldingar om desse problema, fortel Hillersøy.

– Det er ikkje noko kjekt at dette skjer, men eg trur at dersom plasten er rein og tørr og dyra veit at dei ikkje finn matrestar i sekkane, så er ikkje dette noko stort problem, avsluttar ho.


Siste saker Gå til framsida

Berre MÅ ha peparkakebygd

Mange bidrog til den stilige peparkakebygda på OnarTun i fjor. No håpar ein at folk er like bakelystne i år også. – Dette er no blitt ein tradisjon, me MÅ ha peparkakebygd på OnarTun, seier dei tilsette ved Joker Onarheim. Dei satsar på å få på plass dei første husa til julegrantenninga i slutten av november, og oppfordrar folk til å hiva seg i bakinga. Også Våge får sin...