BIDREG: Utan frivillige som Frida Brandal Lepsøe (14) hadde ikkje Tysnesfest eksistert.
BIDREG: Utan frivillige som Frida Brandal Lepsøe (14) hadde ikkje Tysnesfest eksistert.

Frida (14) var ein av 600 frivillige under Tysnesfest

Under Tysnesfest er det hektisk aktivitet i kulissane. Frivillige jobbar både seint og tidleg for at festivalen skal bli ein suksess.
Publisert 19.07.2018 kl. 19.01.

– Kan eg få ei pølse?

Det osar av grytene framfor Birgit Jensen Nes, medan ho tar imot bestillinga.

Klokka er halv åtte fredag kveld, og matserveringa på Gjerstad arena er godt i gang. Jobben med å førebu rettane på menyen starta allereie for mange timar sidan. No har svoltne festivaldeltakarar samla seg framfor matteltet.

– Det er ikkje det store trykket, men me har eit jamt sig, forklarer Synnøve Vines og Jorunn Dalland.


Har svar på det meste

Dei to har full oversikt over alt som skjer i samband med matserveringa.

– No handlar det mest om å avløysa folk, og fiksa problem, seier Dalland.

Ho har ikkje sagt ferdig setninga, før ein frivillig kjem bort.

– Nokon prøvde å betala med desse bongane, seier han.

Dalland og Vines tar ein kikk. Nei, her er det noko som ikkje stemmer.

– Det hender folk prøver seg med slikt, seier Vines, medan ho går for å ta seg av situasjonen.

I matteltet er det 35 frivillige på jobb fredag kveld. Det går i alt i frå laging av wraps, til førebuingar av den populære Tysnesfest-burgeren.

– Eg har vore med i alle år, og flyt på rutinen. Alt skal planleggast mange veker i forkant, men kor mykje mat me skal bestilla, treff me aldri på, seier Dalland og smiler.


Førstereisjenter

To jenter som ikkje har like mange dugnadstimar bak seg endå, er Frida Brandal Lepsøe (14) og Tuva Nesøy (16). Alderen tatt i betraktning, er ikkje det så rart.

Bergens-jentene og kusinene har fått jobben med kanskje den finaste utsikta på Gjerstad. Frå utsalsboda oppe ved familieområdet har dei oversikt over heile arenaen.

– Det var litt stress i starten, innrømmer Nesøy.

Men dei to ser ut til å ha fått teken på både popcornmaskinen og betalingsautomaten, berre nokre timar ut i deira første vakt.

– Foreldra våre og søstrene våre er frivillige, forklarer Lepsøe.

Familien hennar har hytte på Tysnes, og pappa Christian Nome Lepsøe har allereie ein del år bak seg som frivillig under Tysnesfest.

– Det verka veldig gøy, seier Nesøy.

– Og så var det kjedeleg å sitja heime, legg kusina raskt til.

Ein ting er sikkert, og det er at dei angrar ikkje på at dei melde seg på dugnaden.


Dei frivillige betyr alt

Kvifor vel eigentleg 600 personar å plukka søppel, selja øl, vera vakter og dra på tungt sceneutstyr fem dagar i midten av sommarferien?

Svara frå dei frivillige går igjen. Det er givande å hjelpa til, samstundes er det kjekt å vera ein del av fellesskapet.

– Dei frivillige betyr absolutt alt for Tysnesfest. Utan dei hadde ikkje Tysnesfest eksistert. Absolutt alle er ekstremt viktige, og sjølv om enkelte oppgåver isolert sett kanskje kan verka små og ubetydelege, har dei alt å seia i det store biletet, seier Øystein Vaage, dagleg leiar i Tysnesfest.

For nokre frivillige er Tysnesfest ein del av dugnadsarbeidet for å samla pengar til eit lag eller ein organisasjon.

Kvart år betaler stiftinga Tysnesfest ut over 1.000.000 kroner til laga, for den flotte jobben dei frivillige har gjort under festivalen.


Styrer baren

Nokre som også er frivillige under Tysnesfest, er russegjengar frå Bergens-området.

Når mange hundre tusen kroner skal samlast inn, er det viktig å begynna tidleg.

12 personar frå russebussen Radical 2019 er i full sving som frivillige under festivalen.

– Det er veldig kjekt. Me har fått bra opplæring, skryter Jeanette Daae Børnes (17).

Klokka har passert ni, og dei som jobbar i baren har nok å henga fingrane i. På rekkje og rad står dei frivillige som tappar øl.

– No er det roleg. Du skulle ha kome om to timar. Då er det action, seier barsjef Christophe Sundal, og smiler breitt.

Til vanleg er han VVS-rådgjevar i Multiconsult, og pendlar frå Tysnes til Bergen. Under Tysnesfest er det alkoholsal, organisering av 35 frivillige og byting av øltankane på 1000 liter han tenkjer mest på.

Sundal har nesten ikkje tid til ein kort prat.

– Me har fått eit veldig bra system, og det er kjekt når alt fungerer, fortel barsjefen.

Meir rekk han ikkje å seia, før nokon kjem og skal ha tak i han igjen.


Tett på artistane

Like travelt er det ikkje bak scenen. Der sit ein gjeng russegutar frå Bergen og slappar av i eit telt.

– Det er hardt arbeid i 15-20 minutt, og så er det roleg ei stund, forklarer Hans Christian Haaland, som har ansvar for ein av dei to scenane.

Dagane for dei frivillige scenearbeidarane blir lange, og nokre av dei er kanskje ikkje ferdige før i fire-tida på natta.

Dei frivillige tar imot trailerar og er med og riggar opp og ned på scenen, mellom banda som spelar.

– Det er veldig greitt arbeid. Dette er ein av dei beste dugnadane me har hatt, seier Mathias Sætersdal (18).

Freistande er det heilt sikkert, men scenearbeidarane får ikkje lov til å snakka med dei store stjernene.

– Men det er kjekt å sjå dei på nært hald, seier Sætersdal.


Går på skinner

Det er blitt seint på kveld på Gjerstad arena. Publikum kosar seg, og i bakgrunnen jobbar ei mengde frivillige for å gi folk ei fin festivaloppleving

Dugnadsånd og stå på-vilje gjer at Tysnesfest går som ein velsmurt maskin.

Det stemmer det som står på dei grå T-skjortene til dei frivillige: «Tysnesfest 2018. Ikkje utan meg!»



GRILLING: Anthony French er ein av tre kokkar som er leigd inn i matteltet under Tysnesfest.
GRILLING: Anthony French er ein av tre kokkar som er leigd inn i matteltet under Tysnesfest.
FØRSTE KVELDEN: Tuva Nesøy (16) har draget på slushmaskinen.
FØRSTE KVELDEN: Tuva Nesøy (16) har draget på slushmaskinen.
KOORDINERER: Ei travel Monica Hoff Utne (t.v.) er frivilligansvarleg, og held oversikt over alle dei 600 frivillige som bidreg under Tysnesfest. Her i samtale med Jorunn Dalland.
KOORDINERER: Ei travel Monica Hoff Utne (t.v.) er frivilligansvarleg, og held oversikt over alle dei 600 frivillige som bidreg under Tysnesfest. Her i samtale med Jorunn Dalland.
BRUS: Her er noko for ein kvar smak.
BRUS: Her er noko for ein kvar smak.
HØGT TEMPO: Det går unna når Sylvia Spirova (t.v.) og dei andre frivillige sel drikke til øltørste festivaldeltakarar.
HØGT TEMPO: Det går unna når Sylvia Spirova (t.v.) og dei andre frivillige sel drikke til øltørste festivaldeltakarar.
BARSJEF: Christophe Sundal er til vanleg rådgjevar i Multiconsult, men trer inn i rolla som barsjef under Tysnesfest.
BARSJEF: Christophe Sundal er til vanleg rådgjevar i Multiconsult, men trer inn i rolla som barsjef under Tysnesfest.
VENTAR PÅ KLARSIGNAL: Mathias Marthinsen (f.v.), Henrik Nilsen og Jacob Rossi Raudeberg flyttar mykje tungt sceneutstyr under Tysnesfest.
VENTAR PÅ KLARSIGNAL: Mathias Marthinsen (f.v.), Henrik Nilsen og Jacob Rossi Raudeberg flyttar mykje tungt sceneutstyr under Tysnesfest.
FRAM OG TILBAKE: Jacob Rossi Raudeberg fekk først beskjed om at kofferten skulle i éin lastebil, så kjem kontrabeskjeden. Tilbake igjen.
FRAM OG TILBAKE: Jacob Rossi Raudeberg fekk først beskjed om at kofferten skulle i éin lastebil, så kjem kontrabeskjeden. Tilbake igjen.

Siste saker Gå til framsida

Leiar: Markerte Tysnes med nytt EM-gull

Det er stas når tysnesingar markerer seg utanfor kommunen, ja, til og med i utlandet. Ekstra stas er det når det er unge tysnesingar som set Tysnes på kartet.I sist veke kom styrkeløftar Anna Dorthea Espevik heim til Tysnes med ein ny gullmedalje. Denne gongen var det eit EM-gull. Europameisterskapen vart...

Markerer TV-aksjonen med fredagskafé

Tysnes skule gjentek suksessen frå i fjor og markerer også i år TV-aksjonen med fredagskafé fredag føremiddag. I fjor var det tett i tett med folk og trangt om plassen i den gamle gymsalen på skulen. I år vert arrangementet flytta til Tysneshallen. – Der blir det kafé og underhaldning for alle som ynskjer å koma, melder inspektør Synnøve Vines til avisa.