ANDREPLASS: Stord IL-løpar Pernilla Eugenie Epland (t.v.) sprang inn til ny personleg rekord på Bislett stadion. Her frå 5.000 meteren på Bislett tidlegare i sommar. (FOTO: Kondis/Kjell Vigestad)
ANDREPLASS: Stord IL-løpar Pernilla Eugenie Epland (t.v.) sprang inn til ny personleg rekord på Bislett stadion. Her frå 5.000 meteren på Bislett tidlegare i sommar. (FOTO: Kondis/Kjell Vigestad)

Nest best i landet på 3.000 meter

Pernilla Eugenie Epland stadfesta sin posisjon i norgestoppen.
Publisert 19.07.2018 kl. 15.22.

– Det var veldig sterkt. Det var kjekt at ho endeleg fekk fullklaff på distansen, seier Nils Hetleflåt, Pernilla sin trenar.

Onsdag sprang ho, og resten av norgeseliten, 3.000 meter under sommarstemnet på Bislett stadion.

– Pernilla og Vienna S. Dahle hadde på førehand bestemt seg for å dra annankvar runde, for å få ei best mogleg tid. Det var Vienna som tok føringa på den første runden, og deretter følgde Pernilla på den neste runden. Slik veksla dei utover i løpet, fortel Hetleflåt.

Ifølgje trenaren angreip Tysnes-løparen feltet med 300 meter igjen. Ho fekk ei luke, men stivna på oppløpet, og vart passert av Sigrid Jervell Våg.

Jervell Våg vann løpet med tida 9.18,75. Dette er også ny årsbeste i Norge.

For Pernilla enda det med andreplass og ny personleg rekord, med tida 9.19,58. Dette er ei forbetring på meir enn ti sekund frå bestenoteringa ho sette under Folksam Grand Prix i Sverige i juni.

– Opningstempoet på dei tidlegare 3.000 meter-løpene i år har ikkje vore optimalt. I Sverige gjekk det altfor fort frå start av. I går fekk ho og Vienna Dahle styra tempoet sjølve, seier Hetleflåt, som er svært godt nøgd med løpet.

– Det er nok det beste løpet ho har gjort på bane, seier trenaren.

Pernilla har med dette også den nest beste tida i Norge i år på 3.000 meter, berre slått av Jervell Våg.

Tysnestalentet har vist solid form denne sommaren. Tidlegare i juli sette ho ny personleg bestenotering på 5.000 meter med over halvminuttet.


Siste saker Gå til framsida

Leiar: Markerte Tysnes med nytt EM-gull

Det er stas når tysnesingar markerer seg utanfor kommunen, ja, til og med i utlandet. Ekstra stas er det når det er unge tysnesingar som set Tysnes på kartet.I sist veke kom styrkeløftar Anna Dorthea Espevik heim til Tysnes med ein ny gullmedalje. Denne gongen var det eit EM-gull. Europameisterskapen vart...

Markerer TV-aksjonen med fredagskafé

Tysnes skule gjentek suksessen frå i fjor og markerer også i år TV-aksjonen med fredagskafé fredag føremiddag. I fjor var det tett i tett med folk og trangt om plassen i den gamle gymsalen på skulen. I år vert arrangementet flytta til Tysneshallen. – Der blir det kafé og underhaldning for alle som ynskjer å koma, melder inspektør Synnøve Vines til avisa.