FERIERER: Det er godt å kunna trekkja seg attende her på Tysnes, smiler Jostein Epland, som ferierer på familien si hytte i Kattaneset.
FERIERER: Det er godt å kunna trekkja seg attende her på Tysnes, smiler Jostein Epland, som ferierer på familien si hytte i Kattaneset.

Jostein Epland klar for nye utfordringar

Elitespelaren signerte i juni ein toårs-kontrakt med handballklubben Haslum. – Eg gler meg verkeleg, og synest det er ei kul utfordring, smiler Epland.
Publisert 22.07.2018 kl. 16.00.

Etter å ha spela tre sesongar for FyllingenBergen, er Epland no klar for ny klubb og nye utfordringar.

– Eg fekk vera med og møta resten av laget, og spela litt med dei før ferien starta. Det ser veldig lovande ut, strålar han om den nye klubben, som 25. august får æra av å møta det tyske storlaget Kiel i treningskamp heime i Nadderud Arena.


Ved eit vegskilje

Epland fortel om ei fin tid i den tidlegare klubben, der han kombinerte handballen med ingeniør-utdanning på høgskulen. I sommar vart han ferdig med bachelor innan bygg, og tenkte derfor det var ei passande tid å prøva noko nytt.

– Det har vore tre fine og lærerike år, i eit flott miljø. No stod eg ved eit nytt vegskilje, og valde å satsa vidare med Haslum.

Epland kan fortelja om mange gode med den nye klubben. Mellom anna spelar dei i ein heilt ny hall, med gode fasilitetar. Han fortel og om eit lag med god vinnarkultur og høge ambisjonar.

– Haslum har synt at dei ynskjer å satsa på meg, og at dei viljuge til å strekkja seg langt for å ha meg med på laget, noko eg synest er svært kjekt. I tillegg er tidlegare landslagsspelar Erlend Mamelund assisterande trenar. Eg ser fram til å læra mykje av han, seier Epland.


Vinnarkultur

Med den nye klubben ventar ein ny kvardag. Etter å ha budd saman med kjærasten i Bergen, flytter han no til Bekkestua i Bærum, der han skal bu i kollektiv med spelarar frå laget.

– Det vert heilt klårt ein ny kvardag, men eg gler meg til å ta fatt på utfordringa, seier Epland.

Han fortel at førre sesong hamna Haslum på fjerde plass på tabellen, mot FyllingenBergen som hamna på sjette plass.

– Såleis vert det eit steg opp når eg byter klubb. Dei andre spelarane sa at det var to år sidan dei hadde vunne serien, og at det no var på tide å vinna att. Å få ta del i eit slikt miljø med slike ambisjonar er kult.


Handballen i høgsetet

Epland fortel at han starta å spela handball allereie som ni-ti åring, og at han raskt vart biten av basillen.

– Det er ein sport der det er action heile vegen, det likar eg.

Han fortel og om eit stort handballmiljø på Stord, og om storebrørne som begge spela på elitelaget der.

– Me har vore ein handballfamilie, og det har nok påverka meg til å byrja å spela og.

Og trass i at han no er ingeniør-utdanna, er det handballen som kjem i fyrste rekkje.

– Det er handballen som gjeld. Det er den som er draumen. Ein kjem tidsnok inn i arbeidslivet.


Nummer 13

Epland spelar høgre-back, og på drakta har han nummer 13.

– Du er ikkje overtruisk?

– Det spørsmålet har eg fått før, ler Epland.

Han fortel at han alltid har hatt talet 13 på drakta.

– Det har nok noko med at brørne mine hadde det nummeret. Og at fleire kjende spelarar har hatt det, forklarar han med eit smil.


Ikkje berre ferie

Når «Tysnes» treffer Epland, er han på Tysnes og ferierer. Sjølv er han oppvaksen på Stord, men med både mor og far frå Tysnes, hender det at han er å sjå i Kattaneset i Lunde, der familien har hytte.

– Det er kjekt å kunna trekkja seg attende litt. Og særleg med det flotte vêret me har hatt denne sommaren.

Men ferie eller ei, Epland må trena heile året for å halda seg i form. Han fortel at ressursperioden om sommaren er ei viktig tid for å betra den fysiske forma med springe-, og styrketrening. Medan han er på Tysnes, vert styrkerommet på Vassbakken teken i bruk.

5. september er det seriestart. Då møter Haslum Halden på Nadderud arena. Før den tid ligg mange timar med eigentrening, springetestar og treningskampar.

– Det går ein del timar med til sporten kvar veke, smiler han, og legg til at det ikkje er farleg når det er det han likar å halda på med.


MYKJE TRENING: Det vert mange timar med trening i veka for Jostein Epland, og sommaren er inga unntak. Når han er på Tysnes, er han gjerne innom styrkerommet på Vassbakken.
MYKJE TRENING: Det vert mange timar med trening i veka for Jostein Epland, og sommaren er inga unntak. Når han er på Tysnes, er han gjerne innom styrkerommet på Vassbakken.
NY KLUBB: I juni signerte Jostein Epland kontrakt med Haslum Handballklubb, etter å ha spela i FyllingenBergen tre sesongar.
NY KLUBB: I juni signerte Jostein Epland kontrakt med Haslum Handballklubb, etter å ha spela i FyllingenBergen tre sesongar.

Siste saker Gå til framsida

Leiar: Markerte Tysnes med nytt EM-gull

Det er stas når tysnesingar markerer seg utanfor kommunen, ja, til og med i utlandet. Ekstra stas er det når det er unge tysnesingar som set Tysnes på kartet.I sist veke kom styrkeløftar Anna Dorthea Espevik heim til Tysnes med ein ny gullmedalje. Denne gongen var det eit EM-gull. Europameisterskapen vart...

Markerer TV-aksjonen med fredagskafé

Tysnes skule gjentek suksessen frå i fjor og markerer også i år TV-aksjonen med fredagskafé fredag føremiddag. I fjor var det tett i tett med folk og trangt om plassen i den gamle gymsalen på skulen. I år vert arrangementet flytta til Tysneshallen. – Der blir det kafé og underhaldning for alle som ynskjer å koma, melder inspektør Synnøve Vines til avisa.