FORUNDRINGSESKE: Håvard Rekve Lian viste stolt fram dagens fangst frå auksjonen i Våge. Han fekk mykje rart for fem kroner.
FORUNDRINGSESKE: Håvard Rekve Lian viste stolt fram dagens fangst frå auksjonen i Våge. Han fekk mykje rart for fem kroner.

– Det kosta jo berre fem kroner

Mange ulike gjenstandar var i omløp under hamneauksjonen laurdag.
Publisert 04.08.2018 kl. 20.24. Oppdatert 06.08.2018 kl. 11.07.

– Her er ein kasse med litt diverse i. Det er nokre fat, lysestakar og liknande. Det er ingen minstepris så me byrjar på fem kroner, seier Kåre Martin Kleppe, auksjonarius i Våge hamn laurdag.

Det nærmar seg slutten av auksjonen. Ein del har allereie forlate hamna med sine nye gjenstandar. Nokon har gått tomhendt heim. Ein del ventar til siste liten med å sikra seg dagens fangst.

Vêret har letta litt. Folk har slått ned paraplyane sine.

– Ingen bud, fyrste gong. Ingen bud, andre gong.

Kleppe hever klubba og gjer seg klar til å stoppa budrunden for forundringseska. Samtidig høyrest det ein stemme frå andre benkerad.

– Eg byr fem kroner.

Det er tolv år gamle Håvard Rekve Lian som har sett sitt snitt til å gjera eit kupp.

– Fem kroner er bydd. Fem kroner, fyrste gong. Andre gong. Tredje gong.

Klubba går i bordet. Etter fleire år med trening i kommunestyresalen er teknikken på plass hos Kleppe.

Unge Håvard kan henta sine nye eigedelar.


Billigsal

Etter at dei siste gjenstandane er auksjonerte vekk, og roa får senka seg på kaien i Våge, sit familien Rekve og tel opp dagens utbyte.

Håvard ser gjennom kassa si og finn fat, skåler, lysestakar, eit lite spegl, og ei rekkje andre ting verken han eller journalisten klarar å setja namn på.

– Det kosta jo berre fem kroner, seier Håvard.

Både mor Gerd Berit Rekve, tante Turid Rekve, og bestemor Liv Torunn Rekve kjøper det argumentet.

– Kanskje dette er byrjinga på noko, seier Gerd Berit.

Journalisten lurar på om Håvard satsar på at det er skjulte verdiar i eska.

– Dette fatet er nok verdt minst ti kroner, seier den unge lovande skattejegeren.

Han er på ferie på Tysnes saman med mora Gerd Berit. Dei bur til vanleg i Oslo.

Turid er på besøk frå Masfjorden. Dei er alle på besøk hos Liv Torunn som bur i Uggdal.

Det er ikkje berre yngstemann som fekk med seg gjenstandar på billigsal frå Våge i dag.

– Eg kjøpte meg ein gamal vev, seier Liv Torunn, som er glad i den type handarbeid.

– Målet er at den skal brukast.

Turid endte opp med eit splitter nytt utemøbel, også det til berre fem kroner.

– Eg hadde eit utebord som vart øydelagd. No hadde eg moglegheita til å sikra meg eit nytt. Eg fekk mykje bord for fem kroner, fortel ho.

Søstera er ikkje heilt sikker på kor gjennomtenkt kjøpet var.

– Problemet er at ho kom hit på sykkel. Det spørs kor enkelt det er å få med seg bordet på den, seier Gerd Berit lattermildt.


Kunst som fengja

Ikkje alt gjekk for ein billig penge. Allereie på gjenstand nummer to, steig bodtemperaturen.

Eit større måleri av den lokale kunstnaren Jens Tvedt hadde minstepris på 4.000 kroner, men prisen steig fort når bodrunden var i gong.

– Det er sonen min som skal ha biletet. Han er i nordsjøen så då er det eg som må vera til stades, fortel Aslaug Hustad, som utdjupar at sonen har stor sans for Jens Tvedt.

Med sonen på telefonlinja endar ho opp i ein real bodkrig. Aslaug vinn runden med eit bod på 10.000 kroner, høgaste bodet for dagen.

– Han vert nok særs fornøgd. Dette går rett i samlinga hans, seier Aslaug.

Også Anne Marie Malkenes frå Lunde fekk med seg eit kunstverk frå auksjonen.

– Då eg såg dette biletet skjønte eg at eg måtte ha det. Eg har allereie funne plass på veggen heime.

Ho køyrde frå Våge med eit smil om munnen. I tillegg til biletet fekk ho med seg ein foodprosessor. Den er ikkje av nyaste årsmodell, men den er heilt ubrukt.

– Den er heilt perfekt til campingvogna, fortel ho smilande.

Anne Marie synest hamneauksjonen er eit flott initiativ.

– Det er heilt supert. Det er flott at så mykje folk tek turen. Det er noko med stemninga som er heilt spesiell.

Ho likar godt auksjonskonseptet.

– Det er heilt topp at ein kan levera frå seg ting ein ikkje sjølv treng, men som andre kan ha bruk for, seier ho, som også har eit tips til arrangørane viss det vert ny hamneauksjon neste år.

– Det kan med fordel vera litt tidlegare på sommaren, så det er fleire ferieturistar her.


Nøgd arrangør

Det er Kjell Brekke og Våge Hamn som er initiativtakarar til auksjonen. Hamneauksjonen er ein del av ei satsing for å få meir aktivitet i hamna i Våge.

– Det er fyrste gong me gjer dette, så det er ein læringsfase. Me ser mellom anna at me helst ikkje bør ha minstepris på tinga, seier han etter at auksjonen er avslutta.

– Mykje av det utan minstepris gjekk for høge prisar, medan ein del av gjenstandane med ein førehandssett minstepris ikkje vart kjøpt, fortel Brekke.

Det står ein del gjenstandar igjen på utstillingsbenkane. Det var ikkje alt som freista for kjøparane. Stolar, hyller, ein gamal sykkel, ei gamal koparkjele og slalåmski er noko av det som står igjen.

– Me bør kanskje vera litt meir selektive neste gong. Møblar er blant det som sel dårlig, seier Brekke.

At det står igjen litt ting, legg ikkje noko dempar på stemninga.

– Me har hatt ei triveleg stund, og er godt nøgde. Gjenbruk er i vinden, og eg trur folk likar auksjon, konkluderer Brekke.

Trass nokre regndråper då auksjonen starta, var det nærare 100 personar som møtte opp til dei fyrste bodrundane.

Også auksjonarius Kåre Martin Kleppe får skryt av Brekke.

– Han klarte seg godt. Han har ordet i si makt, difor valte me han.

Kleppe sjølv var også nøgd med eigen innsats.

– Eg har sjølv vorte auksjonert bort tidlegare, men aldri leia ein auksjon, seier han.

– Det var kjekt. Eg følte eg klarte meg betre og betre undervegs. Eg har sikkert klubba meir desse timane enn eg har totalt sett i kommunestyresalen, avsluttar Kleppe med glimt i auget.



AUKSJONSFAMILIE: I tillegg til Håvard sin eske, fekk mormor Liv Torunn med seg ein vev. Turid (t.v) kjøpte eit utebord som var for stort til å få med på biletet, medan mor Gerd Berit gjekk tomhendt frå auksjonen.
AUKSJONSFAMILIE: I tillegg til Håvard sin eske, fekk mormor Liv Torunn med seg ein vev. Turid (t.v) kjøpte eit utebord som var for stort til å få med på biletet, medan mor Gerd Berit gjekk tomhendt frå auksjonen.
KLUBBEVETERAN: Auksjonarius Kåre Martin Kleppe leia auksjonen med god kontroll.
KLUBBEVETERAN: Auksjonarius Kåre Martin Kleppe leia auksjonen med god kontroll.
RETT PÅ VEGGEN: Anne Marie Malkenes bestemte seg for at ho skulle ha dette biletet. Ho vann bodrunden og var strålande fornøgd då ho forlet hamna.
RETT PÅ VEGGEN: Anne Marie Malkenes bestemte seg for at ho skulle ha dette biletet. Ho vann bodrunden og var strålande fornøgd då ho forlet hamna.
GAMAL VEKT: John Johnsen kjøpte denne gamle matvekta for 100 kroner til dottera Mona.
GAMAL VEKT: John Johnsen kjøpte denne gamle matvekta for 100 kroner til dottera Mona.
IKKJE ALT VART SELD: Ingen ville ut med nokre hundrelappar for denne sparkesykkelen.
IKKJE ALT VART SELD: Ingen ville ut med nokre hundrelappar for denne sparkesykkelen.

Siste saker Gå til framsida

Leiar: Lokale stadnamn handlar om identiteten vår

Det var ein grundig og til dels heftig debatt då Tysnes kommune for nokre år sidan skulle handsama saka om stadnamn og vegadresser. I kommunestyret vart det stort fleirtal for å nytta o-endingar i lokale stadnamn. Det vart ikkje godt motteke hjå Statens Kartverk. Kartverket krov at lokale stadnamn som Årbakkaheio, Skåte, Eiabrekko og Skåravågen vart endra til Årbakkaheia, Skotet,...