SNART HEIME: Polarskuta «Maud» vart nytta av Roald Amundsen på ein ekspedisjon som starta i juni 1918. Skuta sokk i 1931.
SNART HEIME: Polarskuta «Maud» vart nytta av Roald Amundsen på ein ekspedisjon som starta i juni 1918. Skuta sokk i 1931.

Historisk skute gjennom Nuen

Måndag kveld kunne ein sjå eit noko spesielt skip verta slept forbi Tysnes.
Publisert 07.08.2018 kl. 10.01.

Det 101 år gamle skroget til polarskuta «Maud», bygd for Roald Amundsen, er på veg heim til der det vart sjøsett i 1917; Vollen i Asker. Måndag morgon vart det slept innom Bergen, før slepebåten og lekteren med «Maud» vende nasen sørover, og gjekk gjennom Langenuen. Planen er å nå Vollen den 18. august.

Den gamle skuta har i sommar vorte slept over Nord-Atlanteren frå Grønland, men arbeidet med å henta heim den forliste skuta byrja lenge før. Det er sju år sidan prosjektet «Maud Returns Home» vart sett i gang, og sidan har det vore lange etappar, med viktige milepælar; ikkje minst hevinga av skroget i 2016, etter at skuta sokk i Nordvestpassasjen i 1931, og deretter vart liggjande på havbotnen i 85 år.

Målet med ekspedisjonen som Amundsen fekk skuta bygd for, var å driva forsking i Polhavet, og kanskje å nå Nordpolen. Men ting gjekk ikkje som planlagt, og «Maud» vart sitjande fast i isen i Nordaustpassasjen nord for Russland i fleire år. Amundsen måtte gje opp, og då han seinare gjekk konkurs, vart skuta seld på tvangsauksjon til eit kanadisk selskap. Deretter vart skuta ankra opp i Cambridge Bay, der den seinare sokk.

Den 23. juni 2018 starta slepet attende til heimlandet, nøyaktig 100 år etter at ekspedisjonen til Amundsen starta. Skroget ligg på lekteren «Jensen», og vert slept av slepebåten «Tandberg Polar», som har frakta skuta heilt frå Canada.


Siste saker Gå til framsida