TYSNESING: Forfattar Ingelin Røssland er ute med ny bok. (Arkivfoto: Hilde Anette Ebbesvik)
TYSNESING: Forfattar Ingelin Røssland er ute med ny bok. (Arkivfoto: Hilde Anette Ebbesvik)

Ingelin Røssland med ny, hårete faktabok

8. august lanserer Ingelin Røssland og Jenny Jordahl ei ny faktabok for ferske lesarar. Bladet Tysnes har lese «Hårete fakta».
Publisert 08.08.2018 kl. 08.42. Oppdatert kl. 08.48.

Boka «Hårete Fakta» er skrive av tysnesing Ingelin Røssland, og illustrert av Jenny Jordahl.

Jordahl er blant anna kjent for fleire bøker ho har jobba med saman med Marta Breen, som for eksempel «F-ordet. 155 grunner til å være feminist», «60 damer du skulle ha møtt» og «Jeg trodde klitoris var en selskapsdans. Og 300 andre sitater fra kvinner».


Rett på sak

Boka går ikkje rundt grauten, men bruker eit direkte og lettleseleg språk for å formidla ein direkte bodskap: At det er heilt naturleg for alle å ha hår, og at det finst eit enormt mangfald av hår der ute.

Boka byrjar med kapittelet «Den nakne apen». Der kan ein blant anna lesa at apene har pels, medan menneska har tynnare hår.

I kapittelet «Hår på kroppen» fortel Røssland om kroppshår, både nedantil og andre stader, på ein naturleg og udramatisk måte.

Elles har boka fleire artige, små kapittel om alt frå ulike typar hår, til vikingane sine hår-rutinar – og mykje anna.


Kort og grei

Boka er som nemnt direkte og rett på sak. Den er òg kort, med berre 33 sider stoff.

Dermed passar den godt til barn og ferske lesarar.

Boka er ein del av Lesebra-serien til Gyldenaal, og er mynta nettopp på ferske og nye lesarar.


Kjekt å jobba med Jordahl

– Gyldendal spurde om eg kunne skriva ei sånn bok, og eg sa ja. Det var spesielt kjekt å jobba med Jenny Jordahl, som er ein fantastisk flink illustratør, seier Ingelin Røssland til «Tysnes».

I tillegg er «Hårete fakta» den einaste boka av Røssland sonen hennar har villa lese:

– Men han er berre fire år, så han er neppe ein påliteleg smaksdommar, seier Røssland spøkefullt.

– Forlaget er happy. Det ser ut som om det kanskje blir ein oppfølgjar, avsluttar ho.


Siste saker Gå til framsida