KJEKT I SANDKASSEN: Han er i sitt rette element, Magnus, når han får grava med gravemaskina i sandkassen.
KJEKT I SANDKASSEN: Han er i sitt rette element, Magnus, når han får grava med gravemaskina i sandkassen.

Frå gravemaskinførar til fyrsteklassing

For kring 30 tysnesingar er det aller fyrste dag på skulebenken neste torsdag. Magnus Øyjordsbakken Hauge (6) er ein av dei som gler seg veldig.
Publisert 09.08.2018 kl. 08.34.

Den energiske guten er på overnatting hos mormora og morfaren på Andersland når «Tysnes» møter han. Sommarferien nærmar seg kanskje slutten, men idyllen er langt frå forbi for Magnus.

– Det er kjekt å vera her hos mormor. Me et alltid is her på Andersland. Også leiker me litt i sandkassen. Av og til er me på trampolinen, og av og til i hengekøya, også hender det at eg låner Signe sin lille sykkel, fortel han ivrig, og refererer med det til tanta og veninna, Signe Øyjordsbakken Andersland, som skal byrja i 5. klasse om ei veke, men som óg ladar opp batteria med nokre dagar på Andersland.


Frå Lunde til Uggdal

Sommaren i år har vore spanande for Lunde-guten. Han fortel at han har vore i Dyreparken i Kristiansand, sykla, og ikkje minst fått lillesøster nummer to, som heiter Helene. Han har vinka farvel til Lunde barnehage, og er klar for å ta buss til skulen i Uggdal frå no av.

– Eg trur det vil bli litt annleis å gå på skule. Men me har hatt førskule i barnehagen, og då har me lært litt av det dei gjer på skulen. Og Rasmus, fadderen min, har passa på meg og vist meg rundt, forklarar Magnus.

Berre nye andlet blir det heller ikkje. Fleire av venene hans frå barnehagen skal óg byrja på skulen, og då er i alle fall valet av ute-aktivitet i friminutta lett å ta:

– Eg og Lukas Aleksander leiker alltid med maskinar, fortel Magnus.

– Gler du deg til å byrja på skulen?

– Ja! kjem det lynsnart, med eit stort smil.


Veit kva han skal bli

Skulesekken er kjøpt inn, og på den er det bilete av mange maskinar, seier Magnus oppglødd. Interessa for maskinar er truleg nedarva frå faren, som er maskinkøyrar.

– Eg elsker maskinar! Eg kan køyra gravemaskin, og har gravemaskin og traktor som eg kan sitja på heime. Eg har ein gravemaskin her og, men den kan eg ikkje sitja oppå, fortel seksåringen, som ikkje er i tvil om at han skal følgja i faren sine fotspor når han vert stor.

Men i ei knapp veke til er Magnus framleis «berre» ein seksåring som likar å sykla, leika i sandkassen, vera med vener, og som kan nyta dei siste feriedagane med familien heime i Lunde, før den nye skulekvardagen tek til.


SNART SKULEGUT: Seksåringen Magnus Øyjordsbakken Hauge er veldig glad i maskinar og i fargen blå, men enn så lenge har han ikkje noko sterkt forhold til skulefag.
SNART SKULEGUT: Seksåringen Magnus Øyjordsbakken Hauge er veldig glad i maskinar og i fargen blå, men enn så lenge har han ikkje noko sterkt forhold til skulefag.

Siste saker Gå til framsida