LAURDAG: Over 20 store seglbåtar deltok på regattaen Askeladden med målgang utanfor Våge. Laurdag kveld låg båtane i hamna i Våge.
LAURDAG: Over 20 store seglbåtar deltok på regattaen Askeladden med målgang utanfor Våge. Laurdag kveld låg båtane i hamna i Våge.

Over 20 båtar segla regatta frå Korsneset til Våge

Laurdag hadde seglregattaen Askeladden målgang utanfor Våge. Søndag startar ny regatta frå Tysnes.
Publisert 02.09.2018 kl. 11.38. Oppdatert 03.09.2018 kl. 13.15.

I alt 23 store og mellomstore seglbåtar deltok i regattaen Askeladden laurdag, med start frå Korsneset og målgang ved Fluøyane utanfor Våge. Søndag føremiddag er det ny regatta. Då er området ved Fluøyane startplass og Alholmen utanfor Strøno er målområde utpå søndagen.

Laurdag kveld var det sosialt samvær og middag for deltakarane på Mandelhuset.


Har sigla sidan 1993

Det er Os Seilforening og Milde Båtlag som er arrangør. Deltakarane kjem frå store delar av Hordaland: frå Os, Austevoll, Bergen, Nordhordland, Åsane, Askøy, Milde Båtlag og båtlaget Ran. Båtane som er med er frå 26 fot og opp til 44 fot.

– Askeladden-regattaen er ein kombinasjon av ope osmeisterskap og Bjørnafjordenseglasen, forklarar båteigar Svein Skoglund frå Os.

Han er ein av dei mest erfarne deltakarane, med båten Tina II. Han har vore med og segla desse regattaene sidan 1993.

– Det er blitt ein livsstil, seier han når «Tysnes» møter han og resten av mannskapet om bord i båten laurdag ettermiddag i hamna i Våge.

Med seg som mannskap på denne seglasen har han Geir Tennebekk, Bjarte Bergtun og Knut Reidar Berentzen, alle frå Os.

– Eg har gode folk med meg. Det er eg veldig glad for. Aller helst skulle me vore to-tre personar til. Det hadde vore optimalt for å kunne segla raskast mogeleg. Men det er ikkje alltid like enkelt for familiefolk å priortera regattaer når det er helg, seier båteigaren.

Skoglund er likevel godt nøgd med resultatet. Laurdag vart det 5. plass for båten Tina II.


Frå Østerdalen

I den minste båten på 26 fot sit båteigar Birgitte Lunde frå Os, som er med for tredje gong. Med seg i båten har ho Svein Drevsjømoen.

– Eg er med fordi det er gøy, seier Svein på ekte østerdalsdialekt. Han er fødd og oppvaksen ved Femunden, men har budd i Bergen dei siste 15 åra.

Kjell Totland frå Milde er regattasjef. Han fortel at det båtane vart starta i to grupper, 11.00 og 11.10 for å få litt spreiing på båtane. Den siste kom i mål ved Fluøyane klokka 16.10 laurdag.

– Det vart ein del bølgjer, men det gjekk fint, seier Totland.

Laurdag gjekk regattaen frå Korsneset til ein rundingsbøye utanfor Kolbeinshamn ved Austevoll og deretter til Alholmen utanfor Strøno og målgang ved Fluøyane.

Eigentleg var det 24 påmelde, men ein av båtane fekk startvanskar og vart ikkje med. Det var ingen båtar frå Tysnes som deltok.


Skryt av hamna

Skoglund mimrar frå tidlegare tider, då Os seilforening med sine regattaer hadde samlingar laurdag kveld på Godøysund.

No er han godt nøgd med tilbodet og servicen som dei får i Våge, og serveringsplassen på Mandelhuset.

– Dette er ei fantastisk fin hamn, seier han.

I fjor var dei 15 båtar frå Os seilforening som hadde tur til den nye båthamna på Onarheim.

– Me brukar båten både til segling og til turar.

– Dette er fine feriebåtar. Her kan me slå av motoren og berre nyta stilla og seglasen. Det blir heilt spesielt å feriera i ein seglbåt, seier Skoglund og får støtte av mannskapet sitt.

Om bord i båten til Skoglund er det fire doble køyer og god plass til å feriera.

– Dei fleste av oss som er med på regattaen brukar båtane som turbåtar, seier båteigaren, som har segla 17 gonger på regatta til Shetland.


ERFARNE SEGLARAR: Mannskapet på Tina II. F.v. Geir Tennebekk, Knut Reidar Berentzen, båteigar Svein Skoglund og Bjarte Bergtun.
ERFARNE SEGLARAR: Mannskapet på Tina II. F.v. Geir Tennebekk, Knut Reidar Berentzen, båteigar Svein Skoglund og Bjarte Bergtun.
GØY: Birgitte Lunde og Svein Drevsjømoen synest det er gøy å segla.
GØY: Birgitte Lunde og Svein Drevsjømoen synest det er gøy å segla.
FULL FART: Sol og god vind på båtane på seglasen laurdag. (Foto: Bjarte Bergtun, på Tina II)
FULL FART: Sol og god vind på båtane på seglasen laurdag. (Foto: Bjarte Bergtun, på Tina II)

Siste saker Gå til framsida