PÅ FYRSTE BENK: Brørne Jonas, Alvin og Georg Siglevik Lunde hadde sikra seg ein god plass, tett opp til manesjen, på sirkuset på Gjerstad onsdag kveld.
PÅ FYRSTE BENK: Brørne Jonas, Alvin og Georg Siglevik Lunde hadde sikra seg ein god plass, tett opp til manesjen, på sirkuset på Gjerstad onsdag kveld.

Hadde det kjekt på sirkus

– Eg lo mykje. Eg fekk lyst til å gå på sirkus fleire gonger, seier Alvin Siglevik Lunde (10).
Publisert 13.09.2018 kl. 11.30. Oppdatert kl. 11.34.

Alvin hadde benka seg på fyrste rad, så tett opp til manesjen som han kunne koma. Her naut han den to timar lange sirkusframsyninga saman med brørne Jonas (12) og Georg Siglevik Lunde (15). Mamma Elin var og med dei på Cirkus Agora onsdag kveld.


Gledde seg

Dei tre brørne var tidleg ute for å få seg ein god plass.

– Eg gler meg. Eg har ikkje vore på sirkus sidan sist det var sirkus på Tysnes. Eg trur det er fem år sidan, seier Jonas, før showet kjem i gang.

– Det blir ekstra kjekt når det er lenge mellom kvar gong det er sirkus her, legg han til.

Og etterpå er dei tre klare på at det var kjekt.

– Innslaga med klovnane var det som var mest morosamt, slår Georg fast.

Strålar gjer også sjuåringen Theodor Wetzel Birkeland. Han fekk ri på ponni inni manesjen under pausen midt i programmet.

– Det var veldig gøy å ri, slår han fast etterpå, og smiler breitt.


Klovane hausta jubel

Det er ti år sidan Cirkus Agora sist var på Tysnes, ein varm sommardag i juli 2008. Med på lasset den gongen hadde dei både elefantar og kamelar. Då stod folk i kø for å få ein ridetur med ein elefant.

No har dei korkje elefantar eller kamelar med på turnéen, men ponniar har dei med seg, både som del av programmet og som folk kan få ri på i pausen. Hundar har dei og med, elegante hundar som imponerte med triksa sine.

Størst var jubelen då klovnane og trampolineartisten kom i manesjen. Imponerte gjorde og «luftens prinsesse», Miss Sandra, med kunstar i lysekrona høgt under taket. Med seg i staben hadde sirkusdirektøren både kvinnelege og mannlege artistar, og mange av dei hausta stor jubel.

Sirkusdirektør Jan Ketil Smørdal opptredde også sjølv med nokre av sine eigne kunstar, som han også hadde då han begynte i sirkusbransjen som ungdom.


Innspurt på Tysnes

Sesongen for Cirkus Agora er i avslutningsfasen når dei kjem til Tysnes onsdag. Dagen før var dei på Bømlo. Odda, Sauda og Stord har og stått på programmet dei siste dagane.

Frå Tysnes går turen til Norheimsund, der det er framsyning torsdag kveld.

Roar Smørdal er ein av dei 46 personane som jobbar på og med sirkuset. Han fortel at dei har vore på reise sidan 15. mars.

– Me begynte sesongen i Bergen og der avsluttar me også med framsyningar fredag, laurdag og søndag. Undervegs har me vore heilt til Finnmark i nord og Gjøvik i aust, opplyser han.

Neste år fyller Cirkus Agora 30 år. Det var Jan Ketil Smørdal som starta sirkuset i 1989. Då var han 24 år.


Godt nøgd direktør

Sirkusdirektøren er sjølv godt nøgd med frammøtet i teltet på Gjerstad onsdag kveld.

– Eg er veldig godt nøgd. Det er ei stor glede å underhalda for eit så entusiastisk publikum, slår han fast.

Det var tett med born i teltet, dei fleste ifølgje med foreldre eller besteforeldre.

Etter at showet var over, stilte sirkusdirektøren seg utanfor utgangen og takka for besøket og helsa folk vel heim.

– Eg håpar at folk likte det dei fekk sjå, og at dei kjem att når me kjem til Tysnes neste år, seier Smørdal.


GØY: Theodor Wetzel Birkeland var ein av mange som fekk ri ein runde på ponni.
GØY: Theodor Wetzel Birkeland var ein av mange som fekk ri ein runde på ponni.
POPULÆRE: Klovnane hausta stor jubel hos publikumet på Tysnes.
POPULÆRE: Klovnane hausta stor jubel hos publikumet på Tysnes.
MANGE ROLLER: Trampolineartisten hausta og stor jubel. Han opptredde i ei rekkje ulike roller, som her i klovnedrakt.
MANGE ROLLER: Trampolineartisten hausta og stor jubel. Han opptredde i ei rekkje ulike roller, som her i klovnedrakt.
LUFTIGE SVEV: Akrobatikk fekk me og oppleva. Her er det miss Sandra som viser kunstane sine.
LUFTIGE SVEV: Akrobatikk fekk me og oppleva. Her er det miss Sandra som viser kunstane sine.
GAMLE KUNSTAR: Sirkusdirektøren sjølv opptredde også.
GAMLE KUNSTAR: Sirkusdirektøren sjølv opptredde også.

Siste saker Gå til framsida

Uver stoppa både Hodnanes-ferja og Våge-ferja

Ferjesambandet Hodnanes-Jektevik-Nordhuglo var innstilt på grunn av verforholda fredag kveld, frå i 21-tida til 21.40. Norled melde om innstilt rute klokka 20.53. Klokka 21.35 melde selskapet at ferja kjem i gang att klokka 21.40.Klokka 21.05 melde FosenNamsos Sjø at MF «Selbjørnsfjord» har kansellert avgangane klokka 21.05 frå Halhjem og 22.15 frå Våge på grunn av verforholda.

Debatt: – Det er store hol i «dugnadsånda» på Tysnes

Eg har hatt eit «nært» forhold til det å driva eit idrettslag der dugnad var hovudinntektskjelda. Då eg var leiar i Njardar på 80- og 90-talet, hadde me problem med å finansiera den daglege drifta. Me starta «Mimrefesten». Den var i januar, og gav oss pengar til å melda på lag. Me fekk og eit «eventyr» med Brann-kampar på 90-talet, som gav gode økonomiske resultat. Me hadde åtte-ti...