VIL LAGA SYNGEGJENG: Tron Jensen medverka då Tysnes kulturskule for nokre år sidan feira 25-års jubileum. No kjem han tilbake, for å samla unge på Tysnes til ein syngegjeng. Her frå sist han var i Tysneshallen. (Arkivfoto: Lena Helvik)
VIL LAGA SYNGEGJENG: Tron Jensen medverka då Tysnes kulturskule for nokre år sidan feira 25-års jubileum. No kjem han tilbake, for å samla unge på Tysnes til ein syngegjeng. Her frå sist han var i Tysneshallen. (Arkivfoto: Lena Helvik)

Vil samla unge tysnesingar til fellessong

Tysneshallen blir konsert-arena når Tron Jensen kjem for å samla unge til barne- og familiekonsert.
Publisert 14.09.2018 kl. 09.00.

Dagen blir søndag 23. september, om ettermiddagen. På programmet står både song, eventyrforteljing og musikklagsinnslag.

Steinar Dalland skal vera eventyrforteljar, i lag med lydar frå Tysnes musikklag. Frå Bergen kjem låtskrivar og artist Tron Jensen. Han skal vera primus motor og leia eit eige barnekor denne dagen.

– Målet er å samla unge tysnesingar til ein syngegjeng som skal opptre i lag med Tron, seier musikklagsdirigent og medarrangør Yngve Nikolaisen.

Han er ein av initiativtakarane til arrangementet.

– Me vil la dei yngste få delta og ikkje berre vera publikum. Me håpar å få til ein staseleg konsert med program for heile familien, seier Nikolaisen.

Musikklaget stiller med ein god del solistar, dei fleste skal spela på instrument som dei til vanleg ikkje trakterer.

– Me håpar på høg underhaldningsverdi der overraskingane skal stå i kø, seier dirigenten, med glimt i auga.

I desse dagar sender musikklaget ut invitasjon til alle unge på Tysnes, både i barnehagar og skular, med tilbod om å vera med i syngegjengen.

– Me håpar mange melder seg på, seier Nikolaisen.

Planen er at alle som vil vera med, skal samlast nokre timar før konserten og øva i lag med Tron Jensen. Namn på songane vil og bli delt ut, slik at ein kan øva litt heime også.

– Me ynskjer å treffa eit ungt publikum, for å få folk til å bli glade i song og musikk, seier Nikolaisen.

Han ser på arrangementet delvis som rekrutteringsarbeid for korpsrørsla.

– Og dei faste medlemene i musikklag gler seg veldig. Det er mykje futt i øvingane for tida, legg han til.


Siste saker Gå til framsida

Uver stoppa både Hodnanes-ferja og Våge-ferja

Ferjesambandet Hodnanes-Jektevik-Nordhuglo var innstilt på grunn av verforholda fredag kveld, frå i 21-tida til 21.40. Norled melde om innstilt rute klokka 20.53. Klokka 21.35 melde selskapet at ferja kjem i gang att klokka 21.40.Klokka 21.05 melde FosenNamsos Sjø at MF «Selbjørnsfjord» har kansellert avgangane klokka 21.05 frå Halhjem og 22.15 frå Våge på grunn av verforholda.

Debatt: – Det er store hol i «dugnadsånda» på Tysnes

Eg har hatt eit «nært» forhold til det å driva eit idrettslag der dugnad var hovudinntektskjelda. Då eg var leiar i Njardar på 80- og 90-talet, hadde me problem med å finansiera den daglege drifta. Me starta «Mimrefesten». Den var i januar, og gav oss pengar til å melda på lag. Me fekk og eit «eventyr» med Brann-kampar på 90-talet, som gav gode økonomiske resultat. Me hadde åtte-ti...