UNGDOMMAR: William Raknes Leite (13) og Carl Harbitz-Rasmussen tihøyrer den yngre garde av Tysnesfest-frivillige. (Foto: Vetle Mikkelsen)
UNGDOMMAR: William Raknes Leite (13) og Carl Harbitz-Rasmussen tihøyrer den yngre garde av Tysnesfest-frivillige. (Foto: Vetle Mikkelsen)

– Eg liker betre å jobba enn å gå på konsertane

Laurdag gjekk frivilligfesten til Tysnesfest av stabelen. «Tysnes» var innom Mandelhuset for å ta tempen på stemninga.
Publisert 16.09.2018 kl. 15.10. Oppdatert kl. 15.45.

– Dette er første året mitt som frivillig, sa William Raknes Leite (snart 14) til «Tysnes».

Leite og kamerat Carl Harbitz-Rasmussen (16) har vore frivillige for Tysnesfest i år, og var nok blant dei aller yngste på frivilligfesten laurdag.

– Eg har vore i Gjerstad arena og sett opp gjerde. Høgdepunktet med festivalen må ha vore å sjå Alan Walker, smilte Leite.

Harbitz-Rasmussen er ein smule mindre fersk i rolla som frivillig.

– Eg er usikker på kor mange år eg har vore frivillig, men det er mange, sa den unge bergensaren.


Ulike høgdepunkt

Der Leite valde ut Alan Walker som sitt personlege høgdepunkt med festivalen, hadde kompisen eit litt anna svar:

– Eg liker betre å jobba enn å gå på konsertane, så høgdepunktet har eigentleg vore å jobba, sa Harbitz-Rasmussen.

Dei siste åra har nemleg den filminteresserte ungdommen vore med på å laga filmen som oppsummerer festivalen.

– Kva var det beste med å vera frivillig?

– Å vera ute og møta folk, svarte Leite.

– Det beste var nok å jobba, og gå rundt og filma, gliste Harbitz-Rasmussen.

Sjølv om dei to har noko ulike opplevingar som frivillige, vil begge to anbefala andre å engasjera seg i festivalen.


Festen startar

– Hei og velkommen til ein triveleg frivilligfest! sa ordførar Kåre Martin Kleppe til dei frammøtte.

Saman med Tommy Hansen, hadde han fått i oppgåve å oppsummera årets festival.

Dei viste festivalfilmen og frivilligfilmen, i tillegg til at dei kom med eigne anekdotar frå festivalen.

– Festivalen gjekk jo eigentleg knirkefritt, med unntak av den siste konserten i kyrkja i Onarheim, sa Hansen.

Før konserten med Ingebjørg Bratland skulle begynna, prøvde nemleg Hansen seg på ein vits:

– Ja, då er det som det av og til er i kyrkja. Dette er siste stopp, skal Hansen ha sagt.

Forsamlinga i kyrkja blei stille ei stund, før dei braut ut i latter.

Hansen, som hadde venta i spenning på publikum sin reaksjon, var naturlegvis lette over at dei lo til slutt – men då var det allereie for seint:

– Eg gløymte heilt kva ho heitte, sa Hansen, til latterbrøl frå forsamlinga i spisesalen på Mandelhuset.

Etter festivaloppsummeringa blei det pølser, nachos og fest for dei frivillige.


Siste saker Gå til framsida

Andre a-lagssiger på rad

To mål kvar av Emre Hagen og Lasse Aarland Skulstad sørgde for nok ein siger for a-laget til Njardar/Tysnes.

Debatt: Tysnes skal vera ein servicekommune

Det er viktig å ha ein open, og lett tilgjengeleg kommune. Det å ta kontakt med kommunen skal vera ei positiv oppleving, og ein skal få den hjelpa ein har krav på. Tysnes Høgre vil gjera fleire grep for å gjera kontakten med kommunen enklare, samtidig som me opprettar system for ta imot tilbakemelding frå publikum på korleis kontakten med kommunen har vore.Tysnes Høgre vil i neste...