DYRSKU’N: Garden på Dalland fekk på kort varsel tilbod om å delta på Dyrsku’n i Seljord. (Foto: Privat)
DYRSKU’N: Garden på Dalland fekk på kort varsel tilbod om å delta på Dyrsku’n i Seljord. (Foto: Privat)

Viste seg fram for 40.000 besøkande

Dalland-gjengen tok turen til Seljord og Dyrsku’n i helga.
Publisert 18.09.2018 kl. 15.00. Oppdatert kl. 15.17.

– Det vart ei veldig kjekk oppleving, fortel Irene Dalland.

Saman med Johanne Dalland og Øystein Svalheim reiste ho i helga austover for å promotera og selja Garden på Dalland sine varer på Dyrsku’n i Seljord.


40.000 besøkande

Dyrsku’n er eit årleg arrangement i Seljord i Telemark. Det heile starta som eit felles årleg Fesjå i Telemark for kring 150 år sidan. Sidan den gong har det vakse seg til ei handels- og landbruksmesse med over 80.000 besøkande gjester kvart år.

Då Garden på Dalland var innom laurdag, vart det sett ny besøksrekord med over 40.000 gjester på ein dag.

Kor mange som var innom pølsebua til tysnesingane er uvisst.

– Det var veldig mange menneske der. Me selde kjempegodt, fortel ei nøgd Dalland.


Pølser og raudlauk

At gjengen frå Dalland hamna på Dyrsku’n var alt anna enn planlagd.

– Det vart ei spontan greie. Me fekk eit tilbod for rundt to veker sidan, seier Dalland.

Det var gjennom matnettverket REKO-ring at dei fekk tilbodet om å stilla i Seljord.

– Me har prata mykje om å reisa på Dyrsku’n i 2019, men då me fekk denne sjansen, kunne me ikkje takka nei.

Dei reiste til Telemark med heimelaga pølser og sylta raudlauk. Ifølgje Dalland gjekk varene unna.

– Me hadde kjempebra sal. I tillegg til å visa oss fram, så gav laurdagen gode inntekter. Me selde meir enn på matfestivalen i Bergen.


Over all forventning

Etter at Garden på Dalland lanserte dei heimelaga pølsene sine i slutten av august, har det vore travle tider på garden.

– Me har jobba døgnet rundt, og vore på marknader og festivalar. I tillegg har me mange etterspurnader og bestillingar, fortel Dalland.

Ho er forbausa over all interessa dei har opplevd sidan pølse-lanseringa.

– Det har gått over all forventning. Eg er sjokkert over kor glad folk er i pølser.

Ho trur folk set pris på ordentlege produkt.

– Her får dei eit skikkeleg kjøttprodukt, som er reint og smakar kjøt, avsluttar Dalland.


SELDE PØLSER: Johanne Dalland fekk seld mange pølser frå bua på Dyrsku'n laurdag. (Foto: Privat)
SELDE PØLSER: Johanne Dalland fekk seld mange pølser frå bua på Dyrsku'n laurdag. (Foto: Privat)
SJOKKERT: Irene Dalland hadde aldri trudd at pølsene skulle slå så godt an. Her frå opninga av pølsemakeriet på Dalland i slutten av august. (Arkivfoto)
SJOKKERT: Irene Dalland hadde aldri trudd at pølsene skulle slå så godt an. Her frå opninga av pølsemakeriet på Dalland i slutten av august. (Arkivfoto)

Siste saker Gå til framsida

Fylket seier nei til Hordfastaksjar

Hordaland fylkesting seier nei til kjøp av aksjar i Hordfast no. Fylkestinget vil ta stilling til aksjekjøp når ei utgreiing om fylkeskommunen si deltaking i pådrivarselskap ligg føre.Vedtaket i fylkestinget vart gjort mot fem røyster (SV, MGD og Raudt). Desse partia ville saman med Tom Sverre Tomren i KrF seia eit klart nei til fylkeskommunalt aksjekjøp i Hordfast AS.Høgre kom...