BILETGALLERI: – Det vart ein slitekamp

Njardar vann 4–3, men måtte kjempa for sigeren på Reiso laurdag.
Publisert 22.09.2018 kl. 20.00. Oppdatert kl. 20.22.

Laurdag tok Njardar/Tysnes sitt a-lag imot Tyssedal til dyst på kunstgraset på Reiso.

Det var ein spesiell ramme rundt kampen. Njardar brukte minutta før kampstart til ein minnemarkering for klubblegenda Nils Eivind Hansen, som brått og uventa gjekk bort førre helg.

Mange hadde møtt opp til kampstart og markeringa.

Etter eitt minutt stille, og ei roseutdeling til Nils Eivind sin familie, vart kampen sparka i gang.


Jamn start

Begge lag jobba for å ta initiativet i kampen dei fyrste minutta. Det vart ein jamn og intens start, men etter sju minutt kom den fyrste sjansen.

Njardar spelte god fotball, som enda med ein volley-avslutning frå Aksel Lande. Ein god redning frå Tyssedal-keeperen hindra mål.

Sjansen viste seg å vera ein forsmak på kva som var i vente. Etter elleve spelte minutt fekk Didrik Milde Thorbjørnen ballen på høgresida. Han runda backen og kom seg inn i feltet. I staden for å avslutta sjølv frå skrått hald, låg han ballen på tvers til Børge Pedersen. Veteranen fekk ein enkel jobb med å setja opningsmålet, og sende heimelaget opp i leiinga.


Sjanser til begge lag

Sjølv om Njardar tok leiinga, var Tyssedal godt med i kampen. Rett etter målet til Njardar kom bortelaget på ein skummel visitt. Eit langskot hadde retning mot krysset til venstre for keeper Kjartan Hagen, men eit tigersprang frå den rutinerte keeperen hindra utlikninga.

Tyssedal fortsette å ha ballen, og låg press på Njardar-herrane.

– No må me koma oss inn i formasjonen igjen, og få roa ned, mante keeper Hagen til lagkameratane.

Utespelarane responderte, og ein god periode midt i omgangen enda fyrst i eit skot i tverrligga frå Didrik Milde Thorbjørnsen.

To minutt seinare fekk Børge Pedersen ballen på venstre sida. Eit innlegg mot Milde Thorbjørnsen trefte aldri målet sitt, derimot gjekk innlegget i ein boge over keeper og landa i lengste hjørnet av målet. Dermed vart Pedersen to-målscorar, og Njardar auka leiinga.

– Eg tek ikkje på meg at 2–0-målet var eit forsøk på mål. På fyrste målet mitt vart eg servert av Didrik, så eg tenkte at eg skulle servera han tilbake, men det vart eit forferdeleg innlegg, sa Pedersen etter kampen.


Svarte etter pause

Etter ein roleg slutt på fyrste omgang, tok det fyr frå start i andre omgang.

Berre to minutt var gått då Tyssedal reduserte til 2–1.

Det vart tett og jamnt etter dette, men Tyssedal stod høgt med laget for å jakta utlikning, og opna opp store rom på eige halvdel.

Det utnytta Roy Korsnes når han fekk krangla med seg ballen etter ein time spelt. Keeper kom ut, og Korsnes låg ballen på tvers. Der kom Thomas Hagen springande, og kunne setja ballen i ope mål.

Det vart ein spennende avslutning på kampen. Rett etter Njardar-målet glapp det i heimelaget sitt forsvar, men Kjartan Hagen vart redningsmann åleine med ein Tyssedal-spiss.

Nokre minutt seinare glapp det igjen, og ein ny bortespelar kom åleine med keeper. Denne klarte ikkje Hagen å redda, og Tyssedal reduserte til 3–2.


Kjempar inn sigeren

Dei siste minutta vart intense. Tyssedal pressa på, men Njardar forsvarte seg med nebb og klør.

Idet klokka passerte 90 spelte minutt, fekk Njardar eit hjørnespark. Keeper feilberekna, og Milde Thorbjørnsen vann duellen i feltet, og stanga inn 4–2-målet.

Sigeren såg ut til å vera sikra idet Tyssedal fekk eit frispark i farleg posisjon. Eit innøvd trekk enda i klabb og babb foran Njardar-målet, og ballen spratt i mål.

Tyssedal kasta alt i angrepet, men det var for lite tid igjen. Dommeren bles av, og Njardar-spelarane kunne sleppa jubelen laus for tre viktige poeng i opprykkstrida.

– Dette var deilig. Det vart ein slitesiger. Alle gjer ein god innsats i dag, fortel ein storfornøgd trenar Raymond Epland etter kampen.

Også to-målscorar Pedersen var godt nøgd med kampen.

– Eg følte me hadde god kontroll, men så vakna Tyssedal mot slutten. Det var ein flott siger.

Han sette også pris på minnestunden før kampstar.

– Eg er glad at me fekk ha ein markering for Nils Eivind før kampen.

Sigeren betyr at Njardar held på serieleiinga. Neste helg kjem Løv-Ham 2 endeleg til Reiso, og det vert kamp mellom dei to beste laga i avdelingen. Den kan verta heilt avgjerande i kampen om opprykk til 6. divisjon.


SLITEKAMP: Njardar vann mot Tyssedal laurdag, men måtte jobba for sigeren.
SLITEKAMP: Njardar vann mot Tyssedal laurdag, men måtte jobba for sigeren.

Siste saker Gå til framsida