KONSERT: Tron Jensen (t.h.), Tysnes musikklag og eit flott barnekor laga god stemning i Tysneshallen søndag.
KONSERT: Tron Jensen (t.h.), Tysnes musikklag og eit flott barnekor laga god stemning i Tysneshallen søndag.

Laga show for store og små

Humor er til både for vaksne og barn, seier korpsleiar Yngve Nikolaisen.
Publisert 24.09.2018 kl. 12.45. Oppdatert kl. 13.36.

– Dette var veldig kjekt, og det vert sett stor pris på, fortel Lina Kripaityte-Nordbustad.

Søndag var ho i Tysneshallen saman med familien, og døtrene Isabell og Sofie var ein del av barnekoret som song og dansa for publikum i andre del av showet.

– Dette må dei berre fortsetja med. Det er flott at dei lagar til noko for barna, seier ho, når konserten er over.


Barne- og familiekonsert

Det var Tysnes musikklag og bergensartisten Tron Jensen som inviterte til konsert i Tysneshallen søndag. Det vart i forkant lokka med eit variert program, høg underhaldningsverdi og eit lokalt barnekor.

Både barn og vaksne kosa seg undervegs, og publikum fekk valuta for pengane.

– Det er dette eg vil kalla ein suksess. Eg trur me trefte publikum midt i blinken, seier ein nøgd Yngve Nikolaisen etter konserten.

Han er dirigent og musikalsk leiar for musikklaget.

– Når me fyrst gjev, så prøver me å gje alt.


Rådmanneventyr og dirigentdebutant

Det vart ein konsert med eit breitt spekter, overraskingar, ulike solistar med ulike oppgåver, barn som kosa seg og eit ivrig publikum.

Stemninga vart tidleg sett med Tron Jensen som framførte sin eigen låt om ei «dau and i Lille Lungegårdsvann», og rådmann Steinar Dalland som fekk prøvd seg som eventyrforteljar.

Etter dette stal Arve Belt showet då han ville spela solo med sin baryton, men møtte motstand hos korpsleiar Nikolaisen.

– Viss du klarar å skaffa eit horn, så skal du få spela solo, sa dirigenten.

Konserten fortsette, medan Belt drog på leiting etter riktig instrument.

Neste punkt på programmet var ein dirigentdebut. Med ein smell i armen måtte Nikolaisen gje frå seg taktstokken, og det var unge Hennika som vart plukka ut frå publikum.

Ho hadde full kontroll på takten, og leia korpset trygt gjennom «Gammel jegermarsj».


Sandpapirsymfoni og barnekor

– Du er her framleis, sa Nikolaisen tørt, til latter frå publikum, då Arve Belt kom tilbake til scenen.

Denne gong hadde han funne riktig instrument, og riktig korpsklednad, og fekk lov og prøva seg som solist på neste låt.

Vidare fekk publikum servert solistane William Raknes Leite, Henrik Sebastian Epland og Lars Petter Epland, som spelte på sandpapir, eit av fleire innslag noko utanom det vanlege.

Etter ein matpause vart barnekoret samla, og song fleire songar leia av Tron Jensen. Mellom anna «Mikkel Rev», «Bæ Bæ Lille Lam», der barna også fekk syngja sine eigne vers, og eit forsøk på verdas raskaste variant av «Buggi-Buggi».

I tillegg hadde barna lært ein av Jensen sine eigne låtar.

– «Hente Stjerner» var den kjekkaste songen å syngja, fortel unge Isabell Kripaityte-Nordbustad etter konserten.


Nøgde arrangørar

Yngve Nikolaisen og Tron Jensen var to nøgde herrar etter showet.

– Det er veldig kjekt at barna får vera med. Både at dei får vera med i koret, og at dei får vera frie på golvet undervegs i konserten. Her kan dei hoppa, dansa eller springa rundt. Dette er ikkje ein konsert der ein treng å sitja stille og høyra, fortel Jensen.

I timane før konserten hadde han ei øving med borna som var med i koret.

– Det var utruleg å sjå kor mykje dei blomstra på ei kort øving. Me prøver å gjera dette på barna sine premissar, seier han.

Nikolaisen kallar showet ein suksess.

– Me som laga det til har hatt det kjekt, og det verkar som barn og vaksne som møtte fram hadde det kjekt. Humor er til både for vaksne og barn, avsluttar Nikolaisen.





SOLIST: Arve Belt fekk prøva seg på Horn-solo, i korrekt klednad.
SOLIST: Arve Belt fekk prøva seg på Horn-solo, i korrekt klednad.
KORPSLEIAR: Yngve Nikolaisen leia korpset og showet utan problem.
KORPSLEIAR: Yngve Nikolaisen leia korpset og showet utan problem.
UNG DIRIGENT: Også unge Hennika fekk prøva seg som dirigent for korpset.
UNG DIRIGENT: Også unge Hennika fekk prøva seg som dirigent for korpset.
INNMARSJ: Etter pausen vart barnekoret leia inn til scenen av Aksel Lunde.
INNMARSJ: Etter pausen vart barnekoret leia inn til scenen av Aksel Lunde.
BARNEKOR: Tron Jensen hadde øving med barnekoret tidlegare på dagen. - Det er utruleg kor mykje dei blomstra på kort tid, seier Jensen.
BARNEKOR: Tron Jensen hadde øving med barnekoret tidlegare på dagen. - Det er utruleg kor mykje dei blomstra på kort tid, seier Jensen.
SANDPAPIR: William Raknes Leite, Lars Petter Epland og Henrik Sebastian Epland spelte på sandpapir.
SANDPAPIR: William Raknes Leite, Lars Petter Epland og Henrik Sebastian Epland spelte på sandpapir.
EVENTYR: Rådmann Steinar Dalland stilte opp som eventyrforteljar i Tysneshallen søndag.
EVENTYR: Rådmann Steinar Dalland stilte opp som eventyrforteljar i Tysneshallen søndag.
FRÅ BERGEN: Artist og låtskrivar Tron Jensen tok turen frå Bergen for å delta på konserten.
FRÅ BERGEN: Artist og låtskrivar Tron Jensen tok turen frå Bergen for å delta på konserten.

Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...