I LUFTA: Elise Sørhus Dalen med eit flott målforsøk i 1. omgang.
I LUFTA: Elise Sørhus Dalen med eit flott målforsøk i 1. omgang.

– Det vart litt for enkelt i dag

Med Nordre Fjell som gjester fekk Tysnes Jenter 12 ein lett match laurdag.
Publisert 29.09.2018 kl. 20.33. Oppdatert 01.10.2018 kl. 16.11.

Tysnesjentene viste tidleg kven som var det beste laget på banen, og enda til slutt opp med å vinna 19-6. Dette var den fjerde, strake sigeren deira i haust.


Overlegne

Toppscorar Alma Vermedal laga det fyrste målet i kampen, og lagveninnene hennar følgde raskt på. Etter kort tid stod det 3-0 på måltavla.

Bak heldt Louise Vermedal Lunde målet reint til kring midtvegs i fyrste omgang. Ho er ein dyktig keeper, men fekk ikkje mange harde skot mot seg denne dagen.

Til pause var stillinga 12-3.

– Dette går veldig bra, konstaterte Alma Vermedal til «Tysnes», før det var på’an igjen.

– No har me så mange mål at det viktigaste vert å tenkja på trekka, sa Elise Sørhus Dalen.


Fornøgd trenar

I andre omgang heldt tysnesjentene fram med å briljera på banen. Medan Nordre Fjell ofte miste ballen eller skaut utanfor målet, var heimelaget mykje meir treffsikre – både i pasningsspel og målforsøk.

Det var aldri tvil om kven som kom til å vinna, og gjestene måtte sjå langt etter poeng.

– Det vart litt for enkelt i dag, sa trenar Geir Austvik etter at Tysnes hadde vunne 19-6.

Ein litt keisam kamp for jentene, men siger smakar alltid godt. Og trenaren, han er full av lovord:

– Dette er jenter som alltid er svoltne på å læra meir. Me har trent mykje på å det å gjera kvarandre gode.

Han nemner mellom anna at laget har blitt betre på bevegelse, og «timinga» på løp og pasningar.

– Jentene er veldig flinke, både i handball, fotball og på skulen, rosar Austvik.

Med sine åtte poeng, ligg Tysnes Jenter 12 øvst på tabellen i si pulje. Neste kamp er ikkje før 20. oktober.


Desse var med:

Maria Andronikidou (5), Camilla Matre Rosseland (1), Milena Titoka, Tora Nødland Austvik (1), Elise Sørhus Dalen (1), Yosan Ghirmay Ngusse, Alma Vermedal (8) og Louise Vermedal Lunde (3).


PASSAR PÅ: Yosan Ghirmay Ngusse (i raudt nærmast), Milena Titoka (bak) og Elise Sørhus Dalen i forsvar for Tysnes.
PASSAR PÅ: Yosan Ghirmay Ngusse (i raudt nærmast), Milena Titoka (bak) og Elise Sørhus Dalen i forsvar for Tysnes.
DYKTIG: Maria Andronikidou fekk inn fem mål i kampen mot Nordre Fjell.
DYKTIG: Maria Andronikidou fekk inn fem mål i kampen mot Nordre Fjell.
FOKUSERT: Tora Nødland Austvik i full fart framover.
FOKUSERT: Tora Nødland Austvik i full fart framover.

Siste saker Gå til framsida