TAPTE: Lasse Aarland Skulstad og resten av Njardar sitt a-lag tapte 0-1 mot Løv-Ham 2 laurdag. (Foto: Camilla Korsnes)
TAPTE: Lasse Aarland Skulstad og resten av Njardar sitt a-lag tapte 0-1 mot Løv-Ham 2 laurdag. (Foto: Camilla Korsnes)

Tapte toppkampen

Løv-Ham gjekk sigrande ut av «seriefinalen».
Publisert 29.09.2018 kl. 19.33. Oppdatert 03.10.2018 kl. 00.23.

Det var knytt stor spenning til det utsette toppoppgjeret mellom Njardar/Tysnes og Løv-Ham 2. Vinnaren av matchen ville ha initiativet i toppen av avdelinga før dei siste serierundane.

Njardar fronta kampen stort i forkant, og håpte på tilskodarrekord på Reiso. Rufsete vêr skal nok ha sin del av skulda for at det ikkje skjedde, men det var likevel kring 60 skodelystne som hadde møtt opp for å støtta heimelaget i opprykkskampen.


Tidleg mål

Det var to tente lag som opna kampen på Reiso laurdag. Allereie frå fyrste spark var duellane og temperaturen på plass.

Etter at laga hadde følt på kvarandre dei fyrste ti minutta, fekk Løv-Ham det fyrste hjørnesparket for ettermiddagen. Ein perfekt slått dødball vart heada i mål, og Løv-Ham fekk ei tidleg leiing.

Njardar fekk spelt seg inn i kampen, og reiv til seg eit lite initiativ utover i fyrste omgang, utan å koma til dei store sjansane. Resten av omgangen vart prega av lite sjansar til begge lag, tøffe duellar, mykje frispark og temperatur mellom laga.


Tett og jamnt

Andre omgang fortsette som den fyrste. Det vart tett og jamnt, lite sjansar og mykje duellar. Det vart blåse mange frispark i begge retningar, og ingen av laga fekk til noko finspel i haustvêret.

Utover i andre omgang klarte Njardar å få eit overtak i kampen, og fekk nærma seg målet til Løv-Ham. Mange dødballar skapte farlege situasjonar framfor bortekeeperen, men Njardar klarte ikkje å få ballen i mål.

Slutten av kampen vart stykka opp av mange frispark og høg temperatur. Det var kjefting frå begge lag, både mot kvarandre og mot dommaren.

Njardar gjorde eit siste trekk med å leggja om til tre spissar, men fekk ikkje utteljing for den offensive satsinga. Etter 90 spelte minutt bles dommaren for siste gong, og Njardar tapte 0–1 for Løv-Ham 2.

Njardar ligg framleis øvst på tabellen, men er berre to poeng framfor Løv-Ham, og bergensarane har ein kamp mindre spelt. Det betyr at Njardar er avhengig av at Løv-Ham gjev frå seg poeng i ein av sine siste tre kampar, skal tysnesingane enda sesongen på toppen av tabellen og sikra opprykket til 6. divisjon.


Mistar ikkje motet

Trass skuffelse over tapet, var ikkje Njardartrenar Thomas Hagen ein slagen mann då han møtte «Tysnes» etter kampen.

– Dei fekk eit tidleg dødballmål som avgjer kampen, men det kunne like gjerne vore me som fekk målet og sigeren, fortel Hagen.

Han medgjev at Løv-Ham var ein tøff motstandar.

– Me møtte eit godt lag. Dei har mange unge og gode spelarar. Dei er nok det beste laget i ligaen akkurat no.

Sjølv om kampen om opprykk no vert endå tøffare, har ikkje trenaren mista motet av den grunn.

– Eg vil berømma spelarane for god innsats. Me heng ikkje med hovudet etter denne kampen. Sesongen er ikkje over endå, avsluttar Hagen.


Ekstra sjanse

Sjølv om Løv-Ham 2 no har eit overtak i avdelinga, er det fleire omstende som kan påverka opprykkskampen. Fyrstelaget til Løv-Ham ligg også i 7. divisjon, men i ei annan avdeling. Som andrelaget, ligg også fyrstelaget godt an i opprykkskampen i si avdeling.

Ifølgje reglane kan ikkje Løv-Ham stilla med to lag i 6. divisjon. Kort fortalt betyr det at viss fyrstelaget rykkjer opp, kan ikkje andrelaget rykkja opp, noko som kan gje Njardar ein ekstra sjanse.

Opprykkssjansane er uansett ikkje over viss Njardar vert nummer to i avdelinga. Då kan det venta eit kvalifiseringsoppgjer mot eit lag frå ei anna avdelinga om ein plass i 6. divisjon. For Njardar/Tysnes står det om laget sitt fyrste opprykk på 21 år.


TOPPSCORAR: Didrik Milde Thorbjørnsen er Njardar sin toppscorar denne sesongen, men verken han eller dei andre gulkledde fekk ballen i mål. (Foto: Camilla Korsnes)
TOPPSCORAR: Didrik Milde Thorbjørnsen er Njardar sin toppscorar denne sesongen, men verken han eller dei andre gulkledde fekk ballen i mål. (Foto: Camilla Korsnes)
DØDBALLAR: Store delar av kampen vart stykka opp av dødballar, og temperaturen vart fleire gongar høg mellom laga. (Foto: Camilla Korsnes)
DØDBALLAR: Store delar av kampen vart stykka opp av dødballar, og temperaturen vart fleire gongar høg mellom laga. (Foto: Camilla Korsnes)
MISTE INITIATIVET: Før kampen mot Løv-Ham hadde Njardar opprykket i eigne hender, men er no avhengig av andre lag for å vinna avdelinga.
MISTE INITIATIVET: Før kampen mot Løv-Ham hadde Njardar opprykket i eigne hender, men er no avhengig av andre lag for å vinna avdelinga.
INGEN SLAGEN MANN: Trass tap, har ikkje spelande trenar Thomas Hagen mista motet før dei siste kampane.
INGEN SLAGEN MANN: Trass tap, har ikkje spelande trenar Thomas Hagen mista motet før dei siste kampane.

Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...