Tøffe tak mot Voss

Tysnes greidde ikkje å hamla opp med damene frå Voss laurdag. Stillinga vart 20-29.
Publisert 30.09.2018 kl. 15.07. Oppdatert 01.10.2018 kl. 16.05.

Det har ikkje vore den beste starten for Tysnes IL sitt damelag i 5. divisjon. Laurdag gjekk dei på sitt andre tap i haust, etter at dei noko eldre Voss-spelarane fekk regjera på parketten i Tysneshallen.


Voss dura fram

Kampen starta med fleire målforsøk frå tysnesdamene, men ballen fann ikkje vegen i mål. Det skulle godt gjerast for Tysnes å få til gode avslutningar, så harde som Voss var i forsvar.

Gjestene var tidleg ute med scoring, men knappe tre minutt ut i kampen fekk Kristin van der Meeren utlikna til 1-1. Målmessig heldt Tysnes tritt med vossingane ei stund, men så fekk gjestene dra ifrå.

Voss var nærmast ustoppelege i angrepa sine, og det rakna i tysnesforsvaret. I delar av 1. omgang fekk gjestene stadig køyra på med nye scoringar, utan at Tysnes klarte å redusera i det heile.

Lite hjelpte det at Voss sin flinke keeper redda både på kontring og straffe.

– Me hengjer med dei ti fyrste minutta, men etter dettte skjer det eit eller anna, fortel Tysnes-trenar Sveinung Halvorsen.


Betre andreomgang

Etter pausen, der stillinga var 6-14, kom Tysnes på banen med nytt pågangsmot. Heimelaget klarte med ein gong å spela seg gjennom Voss-forsvaret, og fekk inn nokre raske mål tidleg i omgangen. Samtidig viste Ragnhild Dalland seg fram i målet, og i opningsminutta av andre omgang hadde ho ei rekkje kvalifiserte redningar.

Sjølv om Tynses såg ut som eit nytt lag i angrep etter pause, sleit dei med å stogga Voss i forsvar.

Omgangen vart målrik, og etter ti spelte minutt stod det 14–21 på måltavla. Midtvegs i omgangen drog Voss litt ifrå, og sjølv om Tysnes avslutta kampen godt, vart det aldri ordentleg spennande.

Tysnes hadde sjansen mot slutten då Voss fekk to kjappe to-minuttars utvisingar, men heimelaget klarte ikkje å utnytta overtalet.

Kampen enda 20–29, og Voss kunne reisa heim med to poeng i bagasjen. Det betyr at vossingane leiar tabellen med tre sigrar på tre kampar. Tysnes har derimot ikkje fått ein optimal start på sesongen, og har tapt begge sine to fyrste kampar.


Lag for framtida

– Me må visa meir vilje, og me må tora meir i fyrste omgang. Me får litt prestasjonsangst, og tør ikkje gjera som på trening, seier trenar Halvorsen etter kampen.

Trass tap, var han godt nøgd med andre omgang.

– Det kom seg betrakteleg etter pause. Andreomgangen tapte me berre med eitt mål. Det er ein omgang spelarane kan vera stolte av.

Med to tap i sesongopninga, har laget no ein jobb å gjera vidare.

– Me merkar tapet av spelarar frå i fjor, men eg håper at dei andre spelarane kan veksa med meir ansvar. Me har eit lag for framtida, seier trenaren.

Han var også godt nøgd med dei kring 60 tilskodarane som kom og laga god stemning i Tysneshallen laurdag.

– Publikum er strålande i dag. Det varmar når dei er med og heiar oss fram, avsluttar Halvorsen.Desse var med:

Kristin van der Meeren (6), Hannah Rød Halvorsen, Signe Pettersen Opdal (4), Maria Lillesletten Hagen (2), Linn Bergesen (3), Ragnhild Dalland, Sara Reimdal Vee (2), Martine Siglevik Lunde, Norunn Ebbesvik (3), Lena Nordal og Petra Sløgedal.


KAMPMODUS: Linn Bergesen krigar om ballen mot ein Voss-spelar. (Alle foto: Camilla Korsnes)
KAMPMODUS: Linn Bergesen krigar om ballen mot ein Voss-spelar. (Alle foto: Camilla Korsnes)

Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...