SPENNANDE KAMP: Det vart ein tett og jamn kamp for Ronja Sløgedal, og resten av Njardar sitt J11-lag mot Os.
SPENNANDE KAMP: Det vart ein tett og jamn kamp for Ronja Sløgedal, og resten av Njardar sitt J11-lag mot Os.

Festfotball på Reiso

Jenter 11 avslutta sesongen med målfest mot Os.
Publisert 03.10.2018 kl. 18.00.

Tysdag var det duka for sesongavslutning for Njardar/Tysnes sitt J11-lag. Laget har sett fram til kampen mot Os heile hausten, og kampen vart så underhaldande som det var mogleg å håpa på.


Målrik fyrste omgang

Kampen var jamnspelt frå starten av. Det var tydeleg at det var to gode jentelag som møttest på Reiso.

Det var Tysnes-jentene som kunne jubla fyrst, då Julie Sjøbø sette inn sitt fyrste mål for ettermiddagen.

Bortelaget kjempa på, og utlikna litt før fyrste omgang var halvspelt. Det tok derimot ikkje mange minuttane før Njardar på nytt gjekk opp i leiinga etter eit flott langskot frå Yosan Nguse.

Heimelaget fortsette å visa godt spel, og før publikum fekk summa seg, stod det 3–1 til Njardar, etter at Julie scora sitt andre for dagen.

Os kjempa seg inn i kampen igjen, og fekk redusert til 3–2 før pause.


Nervepirrande andre omgang

Regnet heldt seg vekke, men det var likevel surt og kaldt på Reiso då andre omgang vart blåst i gang. Heldigvis varma spelet på banen, og like etter pause auka gultrøyene leiinga til 4–2, denne gong signert Martha Nødland Austvik.

Osingane var framleis ikkje klare til å gje opp, og fekk krangla inn ei redusering. Bortelaget sette fyrst ballen i stolpen, og retur-skotet vart meisterleg redda av Njardar-keeper Stine Erstad, men Os fekk ballen i mål på tredje forsøk. Stine fekk seg også ein smell i same situasjon, og måtte bytta. Yosan gjekk i mål, og gjorde ein god jobb resten av kampen.

Resten av omgangen vart tett, jamn og nervepirrande. Det var store sjansar til begge lag, men det var Os som fekk det neste målet, og utlikna til 4–4.

Det nærma seg slutten av kampen då Martha skrudde på farten og sprang frå alt og alle på motstandar-laget. Eit herleg solo-raid enda i ny leiing for heimelaget. Like etter auka ho til 6–4, og eit spent publikum byrja å ana siger.


Uslåeleg haustsesong

Os fortsette nok ein gong å gjera kampen spennande då dei sette inn nok ei redusering. Spente trenarar, tilskodarar og innbyttarar venta på at dommaren skulle blåsa av kampen, men før den tid fekk Julie avgjort kampen, og fastsette sluttresultatet til 7–5.

Njardar-sigeren gjer at laget ikkje har tapt ein einaste kamp i løpet av hausten, og jentene kunne jubla for siger i siste kamp for sesongen mot rivalane frå Os.

– Dette var den store kampen, så dette var flott. Med skader og alt mogleg, så vinn me likevel, fortel ein godt nøgd trenar, Karoline Dalen, etter kampen.


VANN SISTE KAMP: Ingrid Belt spelte ein god kamp då J11-vann siste kamp for sesongen tysdag.
VANN SISTE KAMP: Ingrid Belt spelte ein god kamp då J11-vann siste kamp for sesongen tysdag.
SIGERSJUBEL: Njardar-jentene kunne jubla etter kampen. Frå venstre: Mariella Thuen, Rikke Dalen Hagen, Ronja Sløgedal, Emma Sofie Nesse, Julie Sjøbø, Ingrid Belt og Martha Nødland Austvik. Framme ligg målvaktene for dagen, Yosan Nguse og Stine Erstad.
SIGERSJUBEL: Njardar-jentene kunne jubla etter kampen. Frå venstre: Mariella Thuen, Rikke Dalen Hagen, Ronja Sløgedal, Emma Sofie Nesse, Julie Sjøbø, Ingrid Belt og Martha Nødland Austvik. Framme ligg målvaktene for dagen, Yosan Nguse og Stine Erstad.
MÅLSCORAR: Julie Sjøbø enda opp med tre mål mot Os.
MÅLSCORAR: Julie Sjøbø enda opp med tre mål mot Os.

Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...