FARGERIK: Rannveig Ljostveit Helland byr gjerne på seg sjølv, og saman med handelsdrivande i Våge sentrum inviterer ho til fargerik oktobermarknad laurdag, med ei rekkje aktivitetar for små og store. (Begge foto: Camilla Korsnes)
FARGERIK: Rannveig Ljostveit Helland byr gjerne på seg sjølv, og saman med handelsdrivande i Våge sentrum inviterer ho til fargerik oktobermarknad laurdag, med ei rekkje aktivitetar for små og store. (Begge foto: Camilla Korsnes)

Vil fargeleggja sentrum

Eit mangfald av aktivitetar for store og små skal setja farge på Våge sentrum laurdag 6. oktober. Då byr handelsstanden opp til både barneløp, lokal mat og lokale handverk, korpsmusikk og tombola. Og ansiktsmåling.
Publisert 04.10.2018 kl. 18.00.

– Ser dette bra ut? Eg må få sjå. Det må ikkje bli hakkande gale heller, men dette var no flott, utbryt Rannveig Ljostveit Helland. Ho er ikkje sein med å finna fram fargerike saker frå leikebutikken ho driv, og poserer villig for fotografen.

– Ein må trivast me det ein held på med skal ein driva ein butikk som dette, og ikkje vera redd for å by på seg sjølv, seier eigar og drivar av Bok & Fritid i Våge senter.

– Skal me få til noko i sentrum, må alle køyra same vegen, understrekar ho.

Den første oktoberlaurdagen får ho følgje av ei rekkje handelsdrivande når det blir skipa til marknad på Våge.


NM-vinnaren

– Det er tredje året me tek eit felles løft som dette. Me har lyst å gjera noko ekstra for kundane våre, og skal det skje noko her, må me løfta i lag til beste både for fastbuande og hyttefolket. Dette er starten på haustferien, og me legg til rette for at folk skal få ei triveleg stund saman, og nytta dei butikkane som finst her.

I tillegg til dei som driv handel her året rundt, kjem det ei rekkje lokale produsentar som viser fram det dei held på med, det vera seg mat, musikk eller handverk.

– Nytt av året er eit eige barneløp, og det med våre eigen noregsmeister Pernilla Epland som drivkraft. Det vankar medaljar til alle som blir med, og det trur eg blir ei kjempefin oppleving, seier Ljostveit Helland.

Pernilla frå Tysnes spring for Stord Friidrett, og under NM i Byrkjelo i august sikra ho seg gull på 10.000 meter. Så langt skal ikkje dei unge springa.

– Det blir ei løype på baksida av Våge senter, og bort til ungdomshuset. Eg håpar mange ungar er med og let seg inspirera av Pernilla, og at det kjem mange for å sjå på og heia fram dei som er med. Denne dagen ønskjer me å leggja til rette for at folk skal møtast og trivast i lag, det å skapa ein sosial møteplass er ein viktig del av det heile, understrekar Rannveig.


Båtbok og bilutstilling

Juni, juli og august er travle dagar for dei som driv handel og vandel på Tysnes. Då er det stor aktivitet med Tysnesfest og andre tilskipingar, og hyttefolk og andre tilreisande brukar tida si på øya.

– Utover hausten er det rolegare, så då er det kjekt å kunna laga til ein marknad og få meir til å skje enn det som er vanleg på ein laurdag. Tysnes skulekorps spelar opp og har tombola, og ei rekkje lokale utstillarar tek del med alt frå lefser og vårrullar til saum og strikk.

– Sindre Nilsen kjem frå Bømlo for å presentera boka si om Rolvsnesbåten, Fylkesnes Bil kjem frå Stord med ei bilutstilling, og me håpar sjølvsagt på godt ver i år som før. Men me vil gardera oss, og har eit telt i bakhand om vêret skulle bli hakkande gale. På laurdag er plassen ved SvingenPuls møtestad for mykje av det som skjer, opplyser Rannveig Ljostveit Helland.

Ho veit i alle fall om ein som garantert kjem for å vera med på det heile.


Treng meir plass

– Ja, pappa på 89 år har sagt han tek turen frå Kvinnherad for å sjå på det som skjer, drikka kaffi og drøsa med folk. Det er jo det som er kjekt, å leggja til rette for at folk kan trivast i lag, seier butikkdrivaren som flytta over fjorden frå Kvinnherad til Tysnes i 1995, og som sidan 2000 har selt bøker, kontorutstyr og leiker til tysnesingar og tilreisande. Siste tida i den delen av Våge senter der kafeen var før.

– Etter at eg flytta over vegen har eg selt meir til kontor, men eg har smått med plass til bøker her, så der må eg ta imot bestillingar. Eg ventar i spenning på at det blir noko av den utvidinga av senteret her det har vore snakk om ei god stund, planar som også er presenterte i lokalavisa. Synest dei må skunda seg, det vil gjera det lettare å driva og kanskje få fleire til å satsa.

– Eg trur folk er blitt flinkare til å tenkja at ein treng nærbutikken, og eg skulle gjerne hatt kompaniskap av andre. Kva er det me manglar her? Eg har i alle fall grådig lyst på eit apotek, men då må me ha på plass ein farmasøyt i alle fall nokre dagar i veka. Eg trur det er viktig både for fastbuande og tilreisande at det finst nisjebutikkar i sentrum, og gler meg til det som skal skje på laurdag, seier Rannveig Ljostveit Helland.


BÅTBOK: Lite plass til bøker, men ei bok om 61 veteranbåtar på Vestlandet har fått plass på disken hos Rannveig. Tysnesingane likar bøker om båtar.
BÅTBOK: Lite plass til bøker, men ei bok om 61 veteranbåtar på Vestlandet har fått plass på disken hos Rannveig. Tysnesingane likar bøker om båtar.

Siste saker Gå til framsida

Saltebil utfor på glatta

Ein saltebil ute på oppdrag for å salta hamna utfor vegen ved Flakkavåg i sju-halv åtte-tida måndag morgon.