Sjå biletgalleri frå oktobermarknaden

Laurdag var det duka for oktobermarknad i Våge sentrum. Her stilte både store og små frå heile øya for å ta del i dei mange aktivitetane og sjå på utstillarane.
Publisert 06.10.2018 kl. 19.18. Oppdatert kl. 19.44.

Tidleg laurdag føremiddag hadde mange teke turen til Våge for å delta på den årlege oktobermarknaden, der butikkar og andre lokale verksemder viste fram produkta sine. Det var god stemning i sentrum, og alt låg til rette for ein kjekk dag. Til og med vêret viste seg frå si gode side.


Bilutstilling

Ein av utstillarane på marknaden var Fylkesnes bil, som held til på Heiane. Kjetil Gundegjerde og medarbeidarane hadde tatt med seg ulike nye modellar, og ein kunne sjå og prøvekøyra ein ny Peugeot, Mitsubishi og ein Mercedes. Tidlegare år har dei vore på utstilling på Tysnes hos Andersland Bygg, og før det igjen var dei med på utstilling på skuleplassen. Men det er fyrste gongen dei står i Våge sentrum.

– Det er viktig å visa seg fram i distriktet, me har mange kundar frå Tysnes, så kjem det gjerne folk som ynskjer å kjøpa seg ny bil i framtida og vil prata med oss.

Han håpar at bilutstillinga vekkjar interesse, og seier at så langt har fleire prøvekøyrt bilane og gitt gode tilbakemeldingar.


Klar, ferdig, gå!

Då klokka nærma seg 12, var borna klare for «Pernillas barneløp». Spente born hoppa rundt medan dei prata om kven som var den beste løparen. Det var ei nervepirrande stund for dei mange borna som hadde teke turen.

Lars Petter Epland opna løpet med å spøka om sin trådlause mikrofon, som eigentleg berre var ein metalltråd. Då nedteljinga var i gang, tok det ikkje mange sekund før borna freste av gårde og var ute av syne. Publikum heia løparane fram, på målstreken venta sjokolade-medalje til alle deltakarane. Fyrstemann tilbake var Juan Luna Santillana.– Eg er heilt imponert, det er herleg å sjå så mange born i aktivitet! sa ei godt nøgd Pernilla Epland etter løpet.


Oljemagi

Ein av dei andre utstillarane som ein kunne finna var boden til Else Marit Særsten og Synnøve Sundal. Dei viste fram eteriske oljer, som er oljer som kan hjelpa mot blant anna stress og hovudverk, og blir kalla oljemagi. Dette har dei halde på med i eitt år. På førehand hadde dei planlagt kva dei vil visa fram av produkta, og laga brosjyrar til vitjande.

– Det kjekkaste med slike dagar er at folk har meir roen, ein har god tid til å setja seg ned og ta ein kopp kaffi med andre på øya og støtta lokalhandelen, seier Else Marit.– Dagen har gått svært bra og det har kome mange interesserte, seier Synnøve.

Begge meiner at det er svært viktig å visa fram kva bygda har å by på, og rosar handelsstaden i Våge for å ta initiativ til oktobermarknad.


Underheld med musikk

Borte på ein benk sit jentene Brita Austvik og Heidi Aarskog, som begge spelar i Tysnes skulekorps. Heidi går på vidaregåande på Stord, medan Brita går på ungdomsskulen. Dei har nettopp opptredd for dei mange oppmøtte. På marknaden har dei sett kva dei ulike har å tilby, og testa matproduksjonen til utstillarane. Så langt er dei godt nøgde.

– Det er fyrste gongen eg er på oktobermarknad, og eg synest at opplegget er svært bra, seier Brita.

Seinare skal dei spela endå ein gong for publikum.– Eg er her for å spela i korpset, men og for å støtta systera mi Kristine Andersen som viser fram heimelaga klede.

Trassa veret

Til trass for at det har regna i fleire veker, og hoppeslottet er vått, stoppar ikkje dette dei åtte år gamle kompisane Fridtjof Wildhagen og Sofus Hole Eikenes frå å ta seg ein tur i slottet. Dei to gutane har hytte på Tysnes, og til vanleg bur dei i Oslo og Bergen.

– Eg synest det er gøy å sjå kva som skjer her, familien min driv Villa Lunde Bakeri, så eg blei med dei i dag, seier Sofus. Kompisen skyt inn at han likar å kunna springa rundt i Våge utan at mor følgjer med. Begge er godt nøgde med dagen, sjølv om dei gjerne kunne ønska seg litt sol. Gutane venter i spenning på å ta seg ein tur i det våte slottet, som held på å blåsa seg opp, og dei synest det er godt med haustferie. Resten av ferien skal dei køyra båt og vera med venar og familie. Dei ser fram til late dagar på Tysnes.


Ein kjekk dag

Det er tydeleg at dette er ein dag som er viktig for tysnesingane. Butikkane har markert dagen med ulike tilbod, og Våge sentrum er dekorert med bodar og ballongar medan korpset speler vakre tonar.

Rundt om står smilande utstillarar, og her kan ein blant anna møta Orkideen Frisør, Tegnekroken, Tysnes skulekorps tombola, heimelaga klede, oljemagi, nokre matbodar og Herballife. Inne på «svingen» kan ein få ansiktsmåling. Det er ingen tvil om at dette er eit kjekt tilbod for dei små, med ein lang kø rundt seg.

Mat er det mogleg å kjøpa av Garden på Dalland, Yupee og Bubbha som serverer vårrullar, og Villa Lunde bakeri. Ved Coop er det og sett opp eit hoppeslott for borna. Årets oktobermarknad har vore ein stor suksess.

Ida Heggland

redaksjonen@tysnesbladet.no


ANSIKTSMÅLING: Inne ved Ivyelli kunne borna få ansiktsmåling. Her ser ein målar Tuva Hatteberg-Olsen og borna Josefine Schmidt Ludvigsen, Emilie Valencia Lunde og Hermine Schmidt Ludvigsen.
ANSIKTSMÅLING: Inne ved Ivyelli kunne borna få ansiktsmåling. Her ser ein målar Tuva Hatteberg-Olsen og borna Josefine Schmidt Ludvigsen, Emilie Valencia Lunde og Hermine Schmidt Ludvigsen.

Siste saker Gå til framsida

Fylket seier nei til Hordfastaksjar

Hordaland fylkesting seier nei til kjøp av aksjar i Hordfast no. Fylkestinget vil ta stilling til aksjekjøp når ei utgreiing om fylkeskommunen si deltaking i pådrivarselskap ligg føre.Vedtaket i fylkestinget vart gjort mot fem røyster (SV, MGD og Raudt). Desse partia ville saman med Tom Sverre Tomren i KrF seia eit klart nei til fylkeskommunalt aksjekjøp i Hordfast AS.Høgre kom...