HUMORKONGE: Hans Morten Hansen tok publikum med storm på Mandelhuset laurdag.
HUMORKONGE: Hans Morten Hansen tok publikum med storm på Mandelhuset laurdag.

Latteren runga på Mandelhuset

Laurdag inviterte Mandelhuset til humorgalla med sjølvaste Hans Morten Hansen i hovudrolla.
Publisert 14.10.2018 kl. 17.01.

Hansen vert rekna som ein av dei fremste komikarane i landet, har stått på dei største stand up-scenene, hatt verdsrekord i lengste stand up-show og er kjent frå NRK-serien «Side om side».

Laurdag var det tysnesingane som fekk oppleva komikaren, og latteren sat laust på Mandelhuset.


Tysnes-kjenning

Sjølv om Hansen er fødd i Bergen, har vakse opp i Stavanger og bur i Oslo, er han ikkje ein ukjent mann på Tysnes. Med aner frå Neshamn og Gjøvåg er han godt kjent, og er ofte å sjå, i kommunen.

– Eg har mange gode tankar om å vera på Tysnes for å ha show. Det er veldig spesielt for meg å stå på scena her, fortalde Hansen i minutta før han entra scena.

Sjølv om han er godt kjent i kommunen, har han ikkje stått på scena her tidlegare.

– Det er fyrste gong eg er på Tysnes for å jobba, seier Hansen.

Tidlegare i år, då han markerte 25-årsjubileet i Stavanger, selde han 10.000 bilettar fordelt på to show, men Hansen trivst godt på mindre scener også.

– Å koma hit er eit kjærkome avbrekk. Eg liker kontrastane frå dei store scenene til dei mindre lokala, fortel han.


Latteren sat laust

Allereie frå fyrste vits var stemninga sett, og latteren sat laust blant publikum. Hansen spøkte om alt og alle, og leverte materiale med ein stor porsjon sjølvironi.

– Eg bur i Oslo no, starta ein av vitsane til Hansen, der han langa ut om om forskjellane på storbyen i aust og bygda i vest.

– Eg budde i Majorstua, og det er jo midt i snobbehelvetet. Med slekt frå Tysnes, så er jo eg fornøgd berre med innlagt vatn, sa han til stor latter frå publikum.

Latterbølgjene frå publikum var ein klar peikepinn på at showet var ein suksess, og etter å ha stått på scena i ein time sa Hansen takk for seg til stor applaus.

– Dette var mitt fyrste show på Tysnes, og det er alltid kjekt å reisa rundt og prata med intelligente folk, men det var kjekt her også, avslutta komikaren, til nye latterbrøl.


Nøgd mandelsjef

Dagleg leiar på Mandelhuset, Patrick Russell Madsen, var godt nøgd etter showet.

– Dette var heilt konge. Det var veldig kjekt at me fekk Hans Morten på scena her, og han levde absolutt opp til forventingane, fortel Madsen.

Humorgallaen er ein del av av ein haust og vinter proppfull med program og kjente namn på Mandelhuset. Nyleg vart også kult-bandet Luxus Leverpostei booka til lokala i januar.

– Me prøver å ha eit variert tilbod, og det ser det ut som me får til, fortel Madsen.

Han fortel at det har vore god interesse for arrangementa.

– Av forestillingane no i haust, er det berre Vidar Johnsen-konserten som ikkje er utseld, seier den daglege leiaren.

Når det gjeld Hans Morten Hansen, håpar Madsen at det ikkje er siste gong han opptrer på Tysnes.

– Eg har stor tru på at me får sjå han på scena her igjen, avsluttar Madsen.


Siste saker Gå til framsida

Saltebil utfor på glatta

Ein saltebil ute på oppdrag for å salta hamna utfor vegen ved Flakkavåg i sju-halv åtte-tida måndag morgon.