UAVGJORT: Njardar/Tysnes spelte 2-2 borte mot Nordre Fjell 2 laurdag. Didrik Milde Thorbjørnsen scorte eit av Njardar-måla. (Arkivfoto: Camilla Korsnes)
UAVGJORT: Njardar/Tysnes spelte 2-2 borte mot Nordre Fjell 2 laurdag. Didrik Milde Thorbjørnsen scorte eit av Njardar-måla. (Arkivfoto: Camilla Korsnes)

Mista sigeren på overtid

Det vart dramatiske overtidsminutt då a-laget spelte uavgjort borte mot Nordre Fjell 2.
Publisert 15.10.2018 kl. 12.31. Oppdatert kl. 12.32.

Etter tapet mot Løv-Ham i førre runde, såg det mørkt ut for Njardar/Tysnes sine sjansar til å vinna 7. divisjon, avdeling 3. Enklare vert det ikkje etter uavgjort på bortebane mot botnlaget Nordre Fjell 2 laurdag. No siktar a-laget seg inn mot hjelp frå Løv-Ham sitt fyrstelag, eller kvalifiseringskampar for opprykk til 6. divisjon.


Opna best

Njardar gjorde jobben frå start laurdag. Etter sju spelte minutt scora Arild Ebbesvik fyrste mål i kampen.

Leiinga vart dobla av spissmakker Didrik Milde Thorbjørnsen, då han sette inn eit straffespark fem minutt før pause.

Ifølgje trenar Thomas Hagen hadde bortelaget god kontroll på kampen også i andre omgang.

– Me hadde mange store sjansar, og eigentleg full kontroll på kampen, fortel Hagen.


Dramatisk avslutning

I det kampen gjekk inn i sluttminutta, vart det derimot dramatisk på Ågotnes.

Fyrst fekk heimelaget ei redusering på eit langskot.

– Me har alle marginar imot oss. Det kjem eit langskot frå Nordre Fjell. Det er eigentleg ikkje ein sjanse eingong, seier Hagen.

Langskotet trefte undersida av ein Njardar-fot, og gjekk i mål bak ein dekt Kjartan Hagen i Njardar-buret.

I det uret passerte 90 minutt, vart det meir dramatisk. Fyrst fekk Njardar eitt raudt kort, før Nordre Fjell-utlikninga kom med 30 sekund igjen å spela.

– Me er ikkje taktiske og kyniske nok. Me vert brotne, og Nordre Fjell kjem to mot ein, og scorer, fortel trenaren.

Kampen enda 2–2, og Njardar fekk berre med seg eitt poeng heim til Tysnes.


Sikra andreplass

Etter ein god sesong står tysnesingane no med eitt tap og ein uavgjort på dei siste to kampane. Trenar Hagen var ikkje nøgd med å berre spela uavgjort mot laget som ligg sist på tabellen.

– Det er ikkje godt nok, spesielt med tanke på korleis kampen utvikla seg. Samtidig skal det seiast at me stilte med ein tynn tropp, medan Nordre Fjell hadde med fleire spelarar frå fyrstelaget i 5. divisjon, fortel han.

Søndag spelte serieleiar Løv-Ham 2 ein viktig kamp borte mot Vadmyra, og vann 2–1. Det betyr at det er tre poeng som skil Løv-Ham og Njardar, med ein kamp igjen å spela. Det er berre vinnaren av avdelinga som rykker direkte opp til 6. divisjon.

Hagen har lita tru på at Løv-Ham 2 roter vekk tabelltoppen i den siste kampen mot Gneist 3. Samtidig har han framleis tru på direkte opprykk.

– Viss Løv-Ham 1 vinn si avdeling, så rykker me direkte opp uansett.

Løv-Ham har to lag i 7. divisjon. Løv-Ham 2 leiar Njardar si avdeling, medan Løv-Ham 1 leiar ei anna avdeling. Viss fyrstelaget rykker opp, kan Løv-Ham 2 ifølgje regelverket ikkje rykka opp samtidig. Dermed går den plassen til Njardar.

Alternativt må Njardar ut i kvalifiseringskampar mot eit anna lag frå 7. divisjon.

Sjølv om andreplassen er sikra, er Hagen motivert før sesongavslutninga på Reiso mot Bergen Allfot til helga.

– Me har alt i alt hatt ein god sesong, og den har me lyst å avslutta med siger. Eg håpar mange tek turen til Reiso for å støtta oss i den siste kampen, avsluttar Hagen.


Siste saker Gå til framsida