GULLVINNAR: Anna Dorthea Espevik er denne veka tilbake på Tysnes og SvingenPuls etter å ha tatt EM-Gull og verdsrekord i benkpress sist veke.
GULLVINNAR: Anna Dorthea Espevik er denne veka tilbake på Tysnes og SvingenPuls etter å ha tatt EM-Gull og verdsrekord i benkpress sist veke.

– Eg går alltid for gull

Anna Dorthea Espevik kom heim frå EM i benkpress gull-medalje og ny verdsrekord i bagasjen.
Publisert 18.10.2018 kl. 15.03.

– Det var veldig kjekt. Eg er veldig godt nøgd med stemnet. Det var ny verdsrekord eg håpa på, fortel Anna Dorthea Espevik.

Sist onsdag var ho i Luxembourg for å kjempa om EM-gull i juniorklassa i benkpress. Anna Dorthea var regjerande meister og verdsrekordhaldar på øvinga, og ho reiste heim frå Luxembourg med nytt EM-gull og ny verdsrekord i bagasjen.

I tillegg fekk ho også med seg prisen for beste juniorkvinne, ein pris til den som løftar mest i forhold til eiga vektklasse.

LES OGSÅ: Leiar: Markerte Tysnes med nytt EM-gull


Overlegen siger

Anna Dorthea hadde god kontroll på konkurrentane i Luxembourg, men fekk ikkje den starten ho ynskte på konkurransen. Ho missa nemleg på det fyrste av tre løft.

– Eg byrja på 165 kilo, men bomma. Eg trur eg var litt for nervøs, og då gjekk det ikkje, fortalde Anna Dorthea til «Tysnes» i timane etter konkurransen.

Tysnes-jenta klarte å omstilla seg mentalt, og gjekk laus på eit nytt løft på 165 kilo i andre runde. Denne gong lukkast ho utan problem.

– Eg bestemte meg for at eg berre skulla ha det gøy, og gjera som eg pleier på trening.

Med 165 kilo var sigeren sikra, og ho gjorde seg klar til verdsrekordforsøk i tredje og siste runde. Ho hadde sjølv den førre verdsrekorden på 170 kilo, og prøvde seg no på 172,5 kilo.

Det klarte ho utan problem, og kunne dermed jubla for både gull og rekord i Luxembourg.

LES OGSÅ: Femteplass i NM


Kunne løfta meir

Anna Dorthea vann juniorklassa med 30 kilo til neste jente på lista. Ho er godt nøgd med rekorden ho sette, men trur ho kunne klart å løfta meir i konkurransen.

– Det gjekk lett etter fyrste løftet, seier gulljenta.

Ho fortel vidare at ho følte ho hadde meir inne enn dei 172,5 kiloa ho enda opp med på stemnet. Ho har også løfta meir på trening tidlegare.

– Hadde eg klart det fyrste løftet, så kunne eg gått for rekorden på det andre løftet. Då hadde eg kanskje prøvd på 180 kilo i siste løft, fortel ho.


Nye mål

EM i Luxembourg har vore det store målet for styrkeløftaren dei siste månadene.

– Det var litt rart etter konkurransen. Eg brukar fleire månader på å trena opp mot stemnet, og så er det over på ein halvtime, fortel Anna Dorthea.

Ho reiste heim til Tysnes fredag, og har fått seg nokre dagar med kvile. Men allereie tysdag var det tilbake i trening mot eit nytt mål.– I november er det NM i styrkeløft i Askim, fortel ho.

Då skal ho ikkje berre kjempa i benkpress, men også i øvingane knebøy og markløft. Resultata frå dei tre øvingane vert slått saman, og den med best totalsum vinn konkurransen.

– Det vert tøft, men eg har god sjanse til pallplass, seier ho, og presiserer at ho alltid går for sigeren på stemna ho deltek på.

– Eg er ein dårleg tapar. Eg går alltid for gull.

LES OGSÅ: Mista sigeren på overtid


Satsar mot open klasse

Anna Dorthea er berre 20 år, og ein kjempar i juniorklassa til ein er 23 år. Det betyr at ho har fleire år på seg til å førebu seg på å kjempa i open klasse. Ho har store ambisjonar for framtida som styrkeløftar.

– Eg drøymer om fleire rekorder, og håpar å gjera det godt når eg kjem til open klasse, fortel ho.

Allereie no er løfta hennar gode nok til å visa seg fram blant dei eldre kvinnene i Europa-toppen. Vinnaren av open klasse i same vektklasse som Anna Dorthea, løfta 190 kilo i Luxembourg. Det er berre 20 kilo meir enn Tysnes-jenta. Verdsrekorden i open klasse er på 200 kilo.

– Det er den rekorden eg verkeleg trenar mot, fortel ho.


GULL OG NY REKORD: Anna Dorthea Espevik gjekk heilt til topps i juniorklassa i benkpress-EM, og tok ny verdsrekord i same slengen. (Foto: Norges styrkeløftforbund)
GULL OG NY REKORD: Anna Dorthea Espevik gjekk heilt til topps i juniorklassa i benkpress-EM, og tok ny verdsrekord i same slengen. (Foto: Norges styrkeløftforbund)

Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...