GULLVINNER: Anna Dorthea Espevik løfta 172,5 kilo og sette ny verdsrekord i benkpress førre onsdag. (Foto: Norges Styrkeløftforbund)
GULLVINNER: Anna Dorthea Espevik løfta 172,5 kilo og sette ny verdsrekord i benkpress førre onsdag. (Foto: Norges Styrkeløftforbund)

Leiar: Markerte Tysnes med nytt EM-gull

Publisert 18.10.2018 kl. 14.01. Oppdatert kl. 15.07.

Det er stas når tysnesingar markerer seg utanfor kommunen, ja, til og med i utlandet. Ekstra stas er det når det er unge tysnesingar som set Tysnes på kartet.

I sist veke kom styrkeløftar Anna Dorthea Espevik heim til Tysnes med ein ny gullmedalje. Denne gongen var det eit EM-gull. Europameisterskapen vart avvikla i Luxembourg. 20-åringen var best i heile Europa i benkpress i juniorklassen. Resultatet vart til slutt imponerande 172,5 kilo, 30 kilo betre enn jenta som kom som nummer to.

– Eg er ein dårleg tapar. Eg går alltid for gull, fortel Anna Dorthea i eit intervju i avisa denne veka. Det er ein god og naudsynt eigenskap om ein skal nå toppen.

Idrettsutøvarar som set seg høge mål og som klarar å nå måla er viktige frontfigurar og føregangspersonar som kan vera inspirasjonskjelder for å få endå fleire til å driva med idrett og ulike aktivitetar. Kanskje kan det etter kvart bli eit miljø lokalt på Tysnes kring styrkeløft-aktiviteten til Anna Dorthea?

I avisa denne veka røper styrkeløftaren at ho har nye og høgare mål som ho vil trena mot vidare framover. Aller fyrst på lista står norgesmeisterskapen i styrkeløft i Askim i november. Men på sikt er målet endå høgare: Å nå verdstoppen i open klasse når ho blir eldre. I EM denne gongen var det beste løftet 190 kilo. Verdsrekorden i open klasse er 200 kilo.

Ekstra kjekt er det også at unge tysnesingar kan markera seg på ulike frontar. Både i fjor og i heile år har Pernilla Eugenie Epland gjort stadig nye framsteg, og imponert med springinga både på gateløp, friidrettsbanar og i terrengløp, både i Norge og i utlandet. Ja, ho har til og med fått representera det norske landslaget på langdistanse på bane. Høgdepunktet er nok NM-gullet på 10.000 meter på bane.

Sist helg var det norgesmeisterskap i terrengløp som stod på programmet for Pernilla, med heile norgeseliten på startstreken. Sjølv om målet var ein pallplass, er det likevel stas for alle oss som følgjer med frå sidelinja at ei ung tysnesdame blir nummer fem i NM.

Dei to damene er gode ambassadørar for Tysnes.

Me ynskjer lukke til – og følgjer spent med vidare.

redaksjonen@tysnesbladet.no


Siste saker Gå til framsida

Lesarbrev: Kultur – Språk

Tysnes er ein nynorsk-kommune. Det er derfor med stor undring eg har lese innlegg i avisa frå Tysnes Arbeidarparti sin formann og ordførarkandidat skrive på bokmål på vegner av partiet. Skal ein vera ordførar i Tysnes, må ein kunna uttrykkja seg skriftleg på nynorsk – eventuelt med hjelp frå andre. Kva ein sjølv nyttar privat i skrift og tale, er irrelevant. Avisa 5.9.2019...