MEZZOSOPRAN: Lene R. Romseland song for full hals på Haaheim laurdag.
MEZZOSOPRAN: Lene R. Romseland song for full hals på Haaheim laurdag.

– Me er alltid utruleg glade for å koma hit

Laurdag var det operakonsert på Haaheim. Songarane fann fort tonen med publikum.
Publisert 22.10.2018 kl. 13.55. Oppdatert kl. 14.04.

– Då ønskjer me Haugesund kammeropera velkommen! sa Torstein Hatlevik til publikummet i konsertsalen på Haaheim Gard.

Først på «scena» var trioen som skulle fylla rolla som orkester. Trioen bestod av Mathias Halvorsen, piano; Magnus Boye Hanssen, fiolin og Steven Walther på cello.

Dei sette tonen med ein ouverture av Rossini, før mezzosopran Lene Rudbæk Romseland entra scena.

Romseland manøvrerte seg meisterleg gjennom høge tonar og skjelvande vibrato, tydeleg scenevant.


Kommuniserte godt

– Den neste er frå ein operette frå Wien, og handlar om ein forlegen fyr utan kjærast, sa tenor Kjell Magnus Sandve, idet han tok over for Romseland.

Så sette han i gang med å synga songen «Dunkelrote Rosen»(mørkeraude roser), der den sjenerte hovudpersonen presenterer raude roser til jenta han elskar.

Songen kjem frå operetten «Gasparone» av Carl Millöcker. Sandve framførte den med sjarm og glimt i auga.

Sandve og Romseland bytte på å synga.

Konserten var ei intim oppleving, og songarane var flinke til å gå inn i rollene, og å involvera publikummet i nummera, som når Romseland flørtande framførte «L’amour est un oiseau rebelle» frå operaen «Carmen».


Skrytte av Tysnes og Haaheim

– Me er alltid utruleg glade for å koma hit. Torsten er fantastisk, sa Romseland til «Tysnes», då konserten var over.

Sandve måtte seia seg einig, og la til:

– Først køyrer ein over Stord, og så kjem ein hit, til eit fantastisk kulturlandskap.

I tillegg skrytte dei av publikum, og den intime konsertopplevinga.

– De involverte publikum ein del. Er det noko de er særskilt bevisste på å gjera?

– Då eg først starta, var eg ikkje så flink til å prata med publikum, men eg fekk beskjed om at det måtte eg berre gjera, så det har eg blitt flinkare til, sa Sandve.

Romseland fortalde litt om det å leva seg inn i rolla, og la til, med glimt i auga:

– Under «Carmen» må du jo flørta litt.


Tremannsorkester

Trioen Halvorsen, Hansen og Walther fylte rolla som opera-orkester betre enn ein kanskje hadde venta av berre tre personar. Gjennom konserten akkompagnerte dei operasongarane på ein måte som løfta heile opplevinga.

Til vanleg driv trioen med såkalla «mørkekonsertar», der dei spelar i stummande mørke.

– Me er jo ein trio som vanlegvis speler i mørket, så det var hyggeleg å endeleg få spela i lyset, spøkte Hansen.

– Og opera er ikkje berre ein kunst, det er også ein livsstil, smilte pianist Halvorsen.


Tredje gong

– Det blir alltid flotte songar og flotte kulturopplevingar med dei, sa Torstein Hatlevik.

I år var nemleg tredje gongen opera-duoen Romseland og Sandve opptredde på Haaheim.

Hatlevik skrytte av songarane, som han meiner har sørgd for gode opplevingar kvar gong dei har vore på Haaheim.

– Publikum pleier verkeleg å kosa seg med desse konsertane, sa han.


Siste saker Gå til framsida

Premierte ivrige turgåarar

Anne Britt Onarheim vann gåvekort på 1.000 kroner, medan Viljar Olai Skaten vann hovudgevinsten på 2.000 kroner.

– Det er kjekt å koma heim att

Nokon fedrar er vekke mellom åtte og fire kvar dag. Nokon er vekke to veker i Nordsjøen. Christer Helland er vekke to månadar om gongen.

Har fått fornya tillit

8. november signerte Norconsult AS og Dr.techn. Olav Olsen AS kontrakt på «Konseptutredning flytebru E39 Bjørnafjorden».

Debatt: Ope brev til politikarane i Tysnes kommune

Allereie for 12 år sidan, byrja ein å snakka om bygging av ny barnehage for Uggdal/Våge. Barn og vaksne i Stjernereiso barnehage/Vågsmarka barnehage lever framleis i uvisse om når eit slikt bygg eventuelt kjem. Modulane på Reiso er eit mellombels bygg, og no i haust har me vore der i seks år. Det er eit lite hensiktsmessig bygg for barnehagedrift, og me må dagleg handtera dei fysiske...