KJEMPA: Martine Siglevik Lunde og dei andre Tysnes-spelarane viste gode prestasjonar, men tapte til slutt mot blåkledde Viking.
KJEMPA: Martine Siglevik Lunde og dei andre Tysnes-spelarane viste gode prestasjonar, men tapte til slutt mot blåkledde Viking.

Nytt tap for damelaget

Tysnes kjempa hardt mot Viking TIF 2, men måtte til slutt sjå seg slått 23-28.
Publisert 03.11.2018 kl. 17.29. Oppdatert kl. 18.40.

Det var laurdag at Tysnes IL sitt damelag i 5. divisjon tok imot Viking i Tysneshallen. På gjestelaget var den tidlegare lagveninna deira Ina Borlaug, som til vanleg speler i 1. divisjon.


Frimerke

Og det var nettopp Ina som sette inn det fyrste målet, allereie før fyrste minuttet var gått. Ho vart gjennom kampen punktmarkert av Tysnes-spelarane, som gjorde sitt beste for at den dyktige spelaren skulle bli passivisert.

Gjennom 1. omgang var Viking stort sett eit par mål framfor heimelaget. Men då det nærma seg pause sette Tysnes inn støtet for alvor, og kunne gå i garderoben til stillinga 15-14. Ein imponerande innsats av tysnesdamene, som måtte klara seg utan rutinerte Linn Bergesen og Kristin van der Meeren i denne kampen.


Poenga glapp

Dei to laga følgde kvarandre tett også i 2. omgang, og dei fyrste minutta var prega av fleire utlikningar. Ragnhild Dalland sine gode redningar gjorde sitt til at Tysnes lenge klarte å halda tritt med blåtrøyene målmessig.

Men Viking var heldige som hadde fått leigd inn Ina. Jenta som har spelt for Tysnes i mangfaldige år blei toppscorar i kampen med sine ti mål, sjølv om ho vart passa ekstra godt på.

I siste halvdel av omgangen var Viking i leiinga heile tida, og då det nærma seg slutten vart det ingen tvil om kven som ville stela to poeng. Tysnes spelte godt, men tapte likevel med fem mål.


Ingen sure miner

– I dag synest eg synd på jentene, kommenterte trenar Sveinung Halvorsen like etter kampslutt.

Han meiner at heimelaget kjempa vanvitig godt, sjølv om det ikkje heldt til siger.

– Dei fortener all skryt. Me manglar sentrale spelarar i dag, og jentene har vore langt nede i kjellaren for å henta krefter.

– Kva synest du om at Viking brukar ein spelar frå 1. divisjon?

– Det er jo lov. Sånn er «gamet», seier trenaren.

Til «Tysnes» vedgår Ina at det var vanskeleg å bestemma seg for om ho skulle låna seg ut til denne kampen eller ikkje.

– Dette vart litt rart, ja. Men eg trudde faktisk det skulle vera verre. «No blir heile Tysnes sure på meg», tenkte eg. Men dei smiler jo berre, seier Ina, og tek imot ein god klem frå Tysnes-spelar Martine Siglevik Lunde.


Fire tap

Tysnes har hatt ein tøff start på haustsesongen, med fire tap på fire kampar. Det plasserer dei på 9. plass på tabellen, men handballåret er heldigvis ungt enno.

Ifølgje terminlista får dei høve til revansje mot Viking allereie 18. november – denne gongen på bortebane.

Desse var med i kampen mot Viking: Signe Pettersen Opdal (4), Tea Hollevik Kleppe, Maria Lillesletten Hagen (3), Karoline Helland, Ragnhild Dalland, Lena Nordal (1), Sara Reimdal Vee (7), Martine Siglevik Lunde (1), Norunn Ebbesvik (2), Julie Bakke (5) og Petra Sløgedal.


Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...