POPULÆR: Per Áki Sigurdsson Kvikne er mest kjent under artistnavnet Kjartan Lauritzen. (Foto: AKAM1K3)
POPULÆR: Per Áki Sigurdsson Kvikne er mest kjent under artistnavnet Kjartan Lauritzen. (Foto: AKAM1K3)

Kjartan Lauritzen, D.D.E. og Skambankt til Tysnesfest

Etter ein lang haust med mykje arbeid på bookingfronten, kan festivalen endeleg avsløra tre av artistane som kjem til Tysnesfest 2019.
Publisert 14.11.2018 kl. 20.00. Oppdatert kl. 20.04.

– To av banda har vore på Tysnes før, og det er ikkje utan grunn at me har booka dei igjen. Både Kjartan og D.D.E. laga folkefest på Gjerstad arena, og etterspurnaden frå publikum om akkurat desse har vore enorm, skriv Tysnesfest i ei pressemelding.

Skambankt har ikkje vore her tidlegare.

– Men dei har bevist at dei høyrer heime i elitedivisjon i norsk rock, og då høyrer dei så absolutt heime på Tysnesfest og, meiner festivalen, som lovar å sleppa fleire godbitar i tida framover.


«Rap-superhelt»

Kjartan Lauritzen leverte eit fyrverkeri av ein konsert på Gjerstad i 2017, og ifølgje festivalen er det stor etterspurnad etter rap-kometen frå Balestrand, som på rekordtid har gått frå å vera ein heilt anonym gut, til å bli heile Norge sin store superhelt innan rap.

Han fekk sitt store gjennombrot med songen «Havanna» i 2015, året etter kom han med den endå større hiten «Fredag», som er spelt over fem millionar gonger på Spotify. Under P3 Gull i 2017 vart den no 23 år gamle artisten nominert både i klassane Årets nykommar og Årets liveartist.

I september sleppte Kjartan Lauritzen sin sjølvproduserte EP «Fenomenet», på det bergenske kollektivet Vibbefanger, som han er ein del av. Sleppkonsertane i Bergen, Trondheim og Oslo (Rockefeller) blei utselt fleire veker i førevegen.

– På Tysnes får du høyra han igjen laurdag 13. juli, melder festivalen.


D.D.E returnerer

Eit av dei mest folkekjære banda i Norge kjem tilbake til Tysnes i 2019.

– Dei går på scenen torsdag 11. juli, og me kan lova at «her bli det liv - RAI RAI», lokkar Tysnesfest.

2018 har vore eit svært tungt år for D.D.E. Låtskrivar og bandmedlem Frode Viken gjekk bort i mars, dagen etter han fylte 63 år. Mange trudde dette ville bli slutten for det populære bandet, men dei tok feil. Trønderane gjennomførte heile den planlagde sommarturneen til 20 i stil. På to og ein halv månad selde dei 100.000 billettar!

– Dette gav meirsmak, og no er Bjarne Brøndbo og gjengen klare for nok ein sommar på landevegen.

På Gjerstad arena kan publikum gle seg til å høyra: «Det går likar no», «Vinsjan på kaia», «Vi ska fæst», «Rai-rai» og ikkje minst «Det fine vi hadd’ sammen», som blei spelt om att og om att etter Frode Viken sin alt for tidlege bortgang.

D.D.E. debuterte allereie i 1992, og i 2002 var dei det fyrste norskspråklege bandet som fylte Oslo Spektrum.

– Dette er eit band verken me eller vårt trufaste publikum går leie av, så no er me glade for at dei kjem tilbake.


Kompromisslaus hardrock

Tysnesfest lovar full fyr på Gjerstad arena når Skambankt kjem til Tysnesfest fredag 12. juli.

9. februar sleppte hardrockbandet frå Jæren sitt sjette album – det kritikarroste «Horisonten brenner». Så drog dei ut på ein omfattande Norgesturne som strekte seg frå Alta i nord til Kristansand i sør.

– Frontfigur Terje Winterstø Røthing har vore på Tysnesfest ein gong før. I 2012 spelte Kaizers Orchestra til vill jubel framfor ein fullsett Gjerstad arena. No kjem han tilbake med eit band som i alle fall i sjanger er hakket råare enn Kaizers, skriv festivalen.

Skambankt gjorde sin første spelejobb så tidleg som i 1994, men det skulle ta ti år før dei ga ut sitt første album. Dei er i dag rekna som ein av dei største pionerane i Norge innan hardrocksjangeren.


FOLKEKJÆRT BAND: I 2019 kjem D.D.E. tilbake for å laga god stemning på Gjerstad. (Foto: Line Berre)
FOLKEKJÆRT BAND: I 2019 kjem D.D.E. tilbake for å laga god stemning på Gjerstad. (Foto: Line Berre)
ROCKA KARAR: Skambankt er et hardrockband fra Jæren i Rogaland. (Foto: Eirik Halvorsen)
ROCKA KARAR: Skambankt er et hardrockband fra Jæren i Rogaland. (Foto: Eirik Halvorsen)

Siste saker Gå til framsida

Folketalet auka med 14

Ved utgangen av tredje kvartal i 2019 er folketalet i Tysnes kome opp i 2.862. Det er 14 fleire enn ved utgangen av andre kvartal. Då var folketalet 2.848.Elleve personar er fødd i Tysnes i dette kvartalet, medan fire personar har døydd. Det gjev eit fødselsoverskot på sju.I same periode har det flytta 30 personar inn til Tysnes, av desse fire frå utlandet. 23 personar har flytta...

Klart for ny førjulsmesse

Laurdag er det tid for den tradisjonsrike førjulsmessa i Tysnes bedehus, der overskotet går til Indremisjonen sitt arbeid i vår krets. Her kan ein kjøpa heimebakst, handarbeid og andre kjekke varer, i tillegg til å få med seg eit variert program om ein ynskjer det. Barne- og familiearbeidar i IMS, Lise Marie Thuestad Litlabø stiller som andaktshaldar, og det blir song av både...