ÅRETS SPELAR: Aksel Lande vart heidra som Årets spelar på A-laget til Njardar. Her er han flankert av trenarane Thomas Hagen (t.v.) og Raymond Epland (t.h.).
ÅRETS SPELAR: Aksel Lande vart heidra som Årets spelar på A-laget til Njardar. Her er han flankert av trenarane Thomas Hagen (t.v.) og Raymond Epland (t.h.).

Aksel Lande heidra som Årets spelar i Njardar

Aksel Lande er Årets spelar i Njardar/Tysnes. Laurdag vart han heidra på fotballfesten i Vonheim.
Publisert 18.11.2018 kl. 13.15.

Det var trenarane Thomas Hagen og Raymond Epland som delte ut prisen.


Rosande omtale

– Han er prototypen for ein trenar, innleia Thomas Hagen, i ein rosande omtale av Aksel.

– Han er seriøs, stiller alltid på trening, har godt humør, er god til å ta imot justeringar for å forbetra seg, og leverer i sesong etter sesong. Og han berre spring og spring, framheva Thomas Hagen i den fine omtalen av Årets spelar, til stor jubel frå dei kring 65 som hadde teke turen til Vonheim for å vera med på fotballfesten i Vonheim.


Jobb og fotball

Det er to-tre sesongar sidan Aksel Lande (22) flytta heim att til Tysnes, og vart med i Njardar att etter å ha spela på Os i fleire år.

– Me har eit veldig jamnt og godt lag i Njardar no. Det er fleire som kunne fått denne prisen i år, seier prisvinnaren, litt beskjeden i ein kommentar til «Tysnes» etterpå.

No spelar Aksel sentral midtbane på Njardar.

Det trivest han veldig godt med.

– Njardar er topp. Målet er at me klarar å halda oss i 6. divisjon. Eg trur det skal gå bra, seier han.

Det er to år sidan han fekk jobb hos Alsaker Fjordbruk og flytta heim att til Tysnes. I dag er han driftsoperatør på matfiskanlegget Onarøy i Onarheimsfjorden.

– Eg trivest veldig godt på Tysnes. Tysnes er ein veldig fin plass å vera, her kan eg både bu og spela fotball. Eg har det veldig bra, seier han smilande.


Ingen tvil

Det er trenarteamet og spelarane sjølve som stemmer på kven som skal få utmerkinga.

– For at ikkje stemmene våre skulle verta avgjerande, stemte me fyrst, fortalde trenarane.

Men det var ingen tvil om kven som skulle bli Årets spelar i år. Aksel Lande fekk desisert flest stemmer, over halvparten av stemmene.

Det var ei lang rekkje prisar som vart delt ut på fotballfesten etter den store jubelsesongen som 2018 vart for A-laget. Årets toppscorar, årets mest framgangsrike spelar, årets mål og årets øyeblikk var mellom utmerkingane.

For fyrste gong på 21 år kan A-laget gleda seg over opprykk. Det vart også feira. Neste år spelar dei i 6. divisjon.


Siste saker Gå til framsida

Saltebil utfor på glatta

Ein saltebil ute på oppdrag for å salta hamna utfor vegen ved Flakkavåg i sju-halv åtte-tida måndag morgon.