SJØMANN OG FOTBALLSPELAR: Alexander Kleppe spelar fast på Njardar sitt a-lag, når han er heime. Men som styrmann på båt hender det at han er ute i opptil seks veker. Laurdag vart han heidra som den mest framgangsrike a-lagsspelaren.
SJØMANN OG FOTBALLSPELAR: Alexander Kleppe spelar fast på Njardar sitt a-lag, når han er heime. Men som styrmann på båt hender det at han er ute i opptil seks veker. Laurdag vart han heidra som den mest framgangsrike a-lagsspelaren.

Sjømannen Alexander (30) kåra til den mest framgangsrike på fotballbanen

I jubelåret for Njardar/Tysnes sitt a-lag, vart sjømannen Alexander Kleppe kåra til den mest framgangsrike spelaren.
Publisert 21.11.2018 kl. 12.40.

– Det var overraskande, er den fyrste kommentaren til Alexander Kleppe når «Tysnes» møter han etter prisoverrekkinga på fotballfesten laurdag kveld.

Sjølv peikar han på at det er mange på laget som fortener ein slik pris.

– Men det er kjekt å bli lagt merke til, legg han til.


Treningsviljug

I den rosande omtalen frå trenarane Thomas Hagen og Raymond Epland listar dei opp ei rekkje moment som bakgrunn for at Alexander i år er kåra til den mest framgangsrike på a-laget.

Høg arbeidsmoral, enorm arbeidsinnsats og stort engasjement, var mellom stikkorda som vart trekt fram.

– Eit av satsingsfelta til laget i år har vore å spela ballen vidare til andre i staden for å dribla meir sjølve. Det har Alexander teke til seg og blitt veldig god på. Han er også enormt treningsviljug, kanskje har han vore vekke på jobb i seks veker og så kjem han rett på trening den dagen han kjem heim, nett slik me ynskjer at innstillinga skal vera, seier Thomas Hagen.

– Stiller på alle treningar gjer han også når han er heime, legg trenaren til.


– Fotball er gøy

Det er to-tre år sidan Alexander Kleppe vart med på a-laget til Njardar. Då hadde han ikkje spelt fotball sidan i 14-15-årsalderen.

Det var ein av dei siste kampane for sesongen. Ein kamerat ringde og spurde om han ville vera med og spela kamp. A-laget mangla folk, og det var ei trening att før den kampen.

– Eg var veldig i tvil, men eg vart med. Eg syntest det var gøy. Og sidan det var siste kampen, blei eg med sesongen etter også, fortel han.

Og slik har det blitt. Han trivst godt i miljøet i Njardar.

– Det er kjekt å spela fotball. Det er ein fin måte å halda seg i form på. Og så er me ein fin gjeng, med ulike aldersgrupper på a-laget, legg han til.

Trening har han drive med i mange år, for det meste styrketrening på treningssenteret i Uggdal.


Styrmann på båt

Når han er til sjøs, vert det trening stort sett kvar dag, både styrketrening og jogging.

– Eigentleg hatar eg å springa på møller, i staden tek eg meg ein joggetur så snart båten legg til land, røper han.

I arbeidslivet er han nemleg styrmann av yrke, og tilsett i austevollsrederiet North Sea Shipping med adresse Bakkasund. Når han er på jobb, er han gjerne ute i fire til seks veker om gongen på eit 162 meter langt konstruksjonsskip, eller «multi-purpose vessel», som er faguttrykket sjømannen sjølv brukar.

– Dei siste gongene har me vore på oppdrag i Nordsjøen, men eg har også vore med på oppdrag ved Australia, Afrika og utanfor Libya, forklarar han.

Men no er han heime på fri, og kunne laurdag kveld nyta feiringa av a-laget sitt opprykk.


65 på fotballfest

Kring 65 festkledde hadde teke turen til Vonheim laurdag for å feira a-laget og delta på fotballfesten, som konferansier Helge Olav Instøy leia med stø hand.

Med seg på festen hadde dei trubaduren Jim Jacobsen som skapte liv og røre, og som spelte opp til dans etter at festmåltidet med program og prisutdelingar var over. Her var songar til både den eine og den andre; som til dømes «Stakkars deg som har fylt 50», direkte retta til den aktive 50-åringen Børge Pedersen, som under prisutdelinga vart heidra med årets mål, etter ei stupheading borte mot Vadmyra.

Det var også ei rekkje andre prisutdelingar. Blant dei som vart heidra var Aksel Lande, som vart kåra til årets spelar, og Didrik Milde Thorbjørnsen som vart toppscorar med 19 mål. Spelande trenar Thomas Hagen kåra Lasse Skulstad til sin årets spelar, medan trenar Raymond Epland kåra Kjartan Hagen til sin årets spelar.

– Han har ein enorm løpskapasitet, og våren 2018 viste han seg som det råaste eg har sett, kom det rosande frå Thomas Hagen.

Heile laget hadde også god grunn til å feira seg sjølve. For fyrste gong på 21 år har a-laget rykt opp ein divisjon. Neste år spelar dei i 6. divisjon. Resultatmessig har det også vore eit svært godt år for a-laget. Totalt scora dei 69 mål, og hadde med det 19 fleire mål enn vinnarlaget i pulja. I ein periode i sesongen hadde Njardar ni strake sigrar på rad.

Det var ikkje berre spelarane som vart heidra laurdag kveld. Spelargruppa heidra også dei to nye trenarane Thomas og Raymond med blomar.


ÅRETS MÅL: Unge Øyvind Helvik og evigunge Børge Pedersen (50) vart heidra for årets mål, i kampen mot Vadmyra. F.v. Thomas Hagen, Øyvind Helvik, Børge Pedersen og Raymond Epland.
ÅRETS MÅL: Unge Øyvind Helvik og evigunge Børge Pedersen (50) vart heidra for årets mål, i kampen mot Vadmyra. F.v. Thomas Hagen, Øyvind Helvik, Børge Pedersen og Raymond Epland.
LAGJUBEL: Heile laget kunne feira seg sjølve, etter å ha rykt opp ein divisjon for fyrste gong på 21 år.
LAGJUBEL: Heile laget kunne feira seg sjølve, etter å ha rykt opp ein divisjon for fyrste gong på 21 år.

Siste saker Gå til framsida

Saltebil utfor på glatta

Ein saltebil ute på oppdrag for å salta hamna utfor vegen ved Flakkavåg i sju-halv åtte-tida måndag morgon.