Med kurs mot stjernene
Sidan 2017 har alle barnehagane i Tysnes vore med i eit prosjekt kalla DigiSus, der barnehagane har fått i oppgåve å laga sanserom for ungane.
Prosjektet har som mål å forska på digitale hjelpemidlar i barnehagane.
«Tysnes» har tidlegare vore innom sanserommet i Stjernereiso barnehage.
Har fått mystiske brev
Tysdag var det Lunde barnehage sin tur.
Her har barna den siste tida fått mystiske brev frå forskar Fredriksen og professor Pedersen.
Ifølgje breva er Fredriksen og Pedersen tilsette i NASA, den amerikanske organisasjonen for romfart og forsking på verdsrommet.
«Tysnes» møtte barna, då dei skulle lesa opp nok eit brev frå dei to romforskarane. Brevet blei lese opp av Kirsti Aksnes, doktorgradstipendiat ved Høgskulen på Vestlandet og forskar i DigiSus-prosjektet.
I brevet kom det fram at forskar Fredriksen og professor Pedersen trong hjelp frå ekspertar. Ifølgje brevet var det nettopp barna i Lunde barnehage som hadde den nødvendige ekspertisen.
Ut mot verdsrommet
Deretter gjekk barna opp i andreetasjen, der sanserommet er plassert.
For å koma seg inn, måtte barna bruka plater med folie, for å skapa ein elektrisk krins, slik at dei kunne få ringeklokkene på døra til å fungera skikkeleg.Då blei dei ønskt velkomen av dei to forskarane.
– Me prøver å koma oss til universet. Kan de hjelpa? spurde den eine.
Vel inne, fekk barna mange nye sanseinntrykk. Blant anna kunne dei stikka hendene i ei slags krukke med «månevatn», som laga lyd når dei kom i kontakt med dette.
Vassbehaldaren var nemleg, til liks med fleire andre ting i rommet, kopla til PCen, slik at det laga lyd når barna kom borti.
Fann månesteinar
I verdsrommet fann barna blant anna nokre magiske månesteinar, som forskarane skulle forska nærmare på seinare.
Barnehageelev Emilie Lunde blei svært opprømt av funna.
– Eg fann ein stein! Den var grønn, sa ho til «Tysnes», vel ute av sanserommet.
