GOD FYRSTEOMGANG: Damelaget fekk skryt for innsatsen, men tapte kampen mot Lindås i løpet av dei siste ti minutta.
GOD FYRSTEOMGANG: Damelaget fekk skryt for innsatsen, men tapte kampen mot Lindås i løpet av dei siste ti minutta.

– Årsbeste i fyrste omgang

Damelaget heldt følgje med Lindås i 50 minutt, men enda opp med tap i Tysneshallen laurdag.
Publisert 25.11.2018 kl. 15.42.

Verken flott vintervêr eller førjulsmesse i Tysnes bedehus stoppa handballpublikummet frå å møta opp til ein innhaldsrik laurdag i Tysneshallen. Der vart det eit spennande oppgjer då Tysnes sitt damelag tok imot Lindås.


Jamnt i 50 minutt

Laga følgde kvarandre frå start av kampen, og fyrste omgang vart ein kamp mellom to gode handball-lag.

– Det er god kvalitet utpå her, og høgt tempo, sa trenar Terje Sløgedal ti minutt før pause.

Lindås var nokon hakk framfor heimelaget på resultattavla heile omgangen, og gjekk til pause med ei 13–17-leiing.

Midtvegs i andre omgang var leiinga spist opp, og med tolv minutt igjen av kampen var Tysnes berre eitt mål bak.

Etter dette gjekk det verre for heimelaget. I løpet av ti minutt auka Lindås leiinga si frå 20–21 til 20–30. Tysnesdamene stanga mot bortelaget, men lindåskeeperen redda alt som kom i hennar retning. Samtidig var bortelaget effektive og kontra inn måla som avgjorde kampen.


Hyllar fyrste omgang

Sluttresultatet vart 21–32 i favør Lindås, men Tysnes-trenar Sveinung Halvorsen skrytte av laget etter kampen.

– Eg er utruleg imponert over den fyrste omgangen. Det er nok årsbeste, fortel trenaren.

Han er godt nøgd med innsatsen til damene fram til slutten av kampen.

– Resultatet lyg nok litt. Spelarane står på, og gjer det dei skal gjera. Me skal halda eit høgt tempo i spelet, og det får me til i store delar av kampen i dag, seier trenaren.

– På slutten vert me slitne, og Lindås får nokre raske mål. Så dessverre vart det tap, fortset han.

Tysnesingane har berre to poeng på dei fyrste seks kampane for sesongen, men Halvorsen veit kva som bur i laget.

– Me har eit ungt lag. Det er ikkje lenge sidan fleire av dei spelte for J15. Målet er å halda seg i divisjonen, og det skal me klara, fortel han.


Ny J12-siger

Tidlegare på dagen var også J12-laget i aksjon i Tysneshallen. Dei fortsette det flotte spelet frå hausten og vann 17–8 mot Sund.

– Me hadde eigentleg god kontroll heile kampen, og som vanleg var det ein bra kamp forsvarsmessig, fortel trenar Geir Austvik.

Han har heile vegen sagt at det fyrst er i februar laget hans skal vera ordentleg gode, men jentene har prestert godt og har vunnet ni av ti kampar i haust.

– Me er absolutt i rute. Me har hatt god utvikling allereie i år. Det er ivrige jenter som liker utfordringar, fortel Austvik.

Handball-laurdagen vart avslutta med bortekamp for J15-laget. Dei reiste over Bjørnafjorden for å møta Kalandseid til dyst. Kampen enda 14–11 til tysnesjentene, som dermed er ubesigra så langt i si avdeling.


GOD KAMP: Tysnes sin keeper hadde fleire kvalifiserte redningar i løpet av kampen.
GOD KAMP: Tysnes sin keeper hadde fleire kvalifiserte redningar i løpet av kampen.
DUELLAR: Det vart ein røff kamp, og tysnesjentene møtte eit fysisk sterkt lag frå Lindås.
DUELLAR: Det vart ein røff kamp, og tysnesjentene møtte eit fysisk sterkt lag frå Lindås.
MÅL: Tysnes hengde med bortelaget i ein jamn fyrsteomgang.
MÅL: Tysnes hengde med bortelaget i ein jamn fyrsteomgang.
TIMEOUT: Sveinung Halvorsen kom med kloke ord undervegs i oppgjeret.
TIMEOUT: Sveinung Halvorsen kom med kloke ord undervegs i oppgjeret.

Siste saker Gå til framsida

Saltebil utfor på glatta

Ein saltebil ute på oppdrag for å salta hamna utfor vegen ved Flakkavåg i sju-halv åtte-tida måndag morgon.