KLAR FOR GJERSTAD: Ina Wroldsen kjem til Tysnesfest neste år. (Pressefoto)
KLAR FOR GJERSTAD: Ina Wroldsen kjem til Tysnesfest neste år. (Pressefoto)

Laurdag vann ho P3-prisen, no er ho klar for Tysnesfest

Norsk superstjerne klar for Tysnesfest 2019.
Publisert 25.11.2018 kl. 11.05. Oppdatert kl. 11.15.

Det andre artistsleppet til neste års Tysnesfest er klart. Frå før er Kjartan Lauritzen, DDE og Skambankt klar for festivalen, og i dag, søndag, kom beskjeden om at den norske superstjerna Ina Wroldsen også er klar for Gjerstad neste sommar.

Laurdag var ho i fokus under den direktesendte prisutdelinga P3 Gull på NRK, der ho vart tildelt P3-prisen. Det er ein ærespris som tidligare har vorte gjeve til OnklP, Röyksopp, Lars Vaular, Karpe Diem og Susanne Sundfør. Ina Wroldsen vart dermed innlemma i eit unikt selskap av norske artistar som har vunne den gjeve prisen.

– Ina har etablert seg som ein solid liveartist med eit breitt og engasjert publikum, og me gler oss veldig til å sjå ho på scena neste sommar, skriv Tysnesfest i ei pressemelding søndag.


Megahits

Under P3 Gull-utdelinga var ho også nominert i kategorien «Årets låt» med megahiten «Strongest». Det er ein låt som har vore høgt oppe både på VG-lista og den norske Spotify-lista. Den vart også gjeve ut med remix av Alan Walker.

I tillegg til «Strongest» er ho for tida aktuell med låtane «Lie To Me», «Mother» og «Favela». Sistnemnte har nesten 40 millionar avspelingar på Spotify og over 16 millionar visningar på Youtube.

Wroldsen er absolutt i ferd med å skapa seg eit stort namn internasjonalt. I januar var ho med på låta «Breathe» med britiske Jax Jones. Låta gjorde det bra på dei britiske hitlistane, og har i skrivande stund 189 millionar avspelingar på Spotify og er vist 134 millionar gongar på Youtube.

Ho er også ukreditert songar på låten «How Deep Is Your Love» av Calvin Harris og Disciples frå 2015. Denne er spelt nesten 600 millionar gongar på Spotify, og nådde 27. plass på Billboard Hot 100-lista.


Rutinert låtskrivar

Det er kun dei siste åra Wroldsen har markert seg som soloartist, men ho har ei lang og suksessfull musikk-karriere bak seg. Ho har lenge utmerkt seg som låtskrivar og har skrive for nokon av dei aller største internasjonale gruppene og artistane.

Blant artistane ho har skrive låtar for, finn ein Shakira, Britney Spears, One Direction og Demi Lovato. Ho har også skrive for norske artistar som Tone Damli og Adelen. For sistnemnte var ho mellom anna med og skreiv Melodi Grand Prix-bidraget «Bombo» i 2013.

Festival-leiar Øystein Vaage er godt nøgd med å ha Ina Wroldsen klar.

– Det er ein artist det er grådig kjekt å få til Tysnesfest, og ekstra kjekt å lansera ho dagen etter ho mottok æresprisen under P3 Gull. Den har ho verkeleg fortent, fortel Vaage.


ETABLERT: Wroldsen har etablert seg både som soloartist og som låtskrivar for nokon av dei største artistane i verda. (Pressefoto)
ETABLERT: Wroldsen har etablert seg både som soloartist og som låtskrivar for nokon av dei største artistane i verda. (Pressefoto)

Siste saker Gå til framsida

Norled selt til utanlandske eigarar

I ei pressemelding måndag melde ferjeselskapet Norled at selskapet får nye eigarar. Det er Det Stavangerske Dampskibsselskap (DSD) som har eigd alle aksjane, og som no sel desse.Det er det kanadiske selskapet CBRE Caledon Capital Management og det nordiske infrastrukturfondet Capman Infra som tek over eigarskapet i Norled, og som kjøper 50 prosent av aksjane kvar. Kjøpesummen er ikkje...

Kommunestyret sa ja til Mestringshusene

Kommunestyret fatta tysdag i førre veke endeleg vedtak kring den gamle sjukeheimen i Uggdal, som rusbehandlingsinstitusjonen Mestringshusene har vist interesse for å bruka som behandlingslokale.For to veker sidan vart formannskapet...

Lesarbrev: Ein veg til besvær

Gjennom lokalavisa «Tysnes» og folkevalde organ, er det retta stor interesse mot vegutviding for gang- og sykkelveg og køyrefelt med gul midtstripe i vegen, mellom Våge og Uggdal. Størst merksemd er retta mot Dallandsbrekka, som strekkjer seg frå vegkryss inn til Windsor og byggefelta i Vågsmarka. Dallandsbrekka er ein veg med bratt stigning på seks-sju prosent i veglengde på 850 meter, før...