Tippoldefedrar var jåttseglarar
Elevane synest det er interessant å få læra litt om dei mange tysnesingane som var mannskap på «Yankee», «Weetamoe», «Rainbow» og alle dei andre staselege seglbåtane i perioden 1900-1940. Tysnesingar fekk oppleva å vinna America`s Cup. Det var svære greier.
Gyngande naust
Venelaget for jåttseglarane har i fleire år invitert 6. klassingane til ein time i flytenaustet før utstillinga vert «pakka ned» og vinterlagra.
I år vart det av ulike grunnar litt seint, så stunda i naustet vart både kjøleg og gyngande i den friske nordavinden. Dette tok elevane med godt humør, og meinte dei fekk ei kjensle av å vera i seglbåt når naustet gynga.
Engasjerte elevar
Den maritime skuletimen har eit variert innhald med mykje på programmet, og det er alltid kjekt når elevane spør og er engasjerte. Nokre fortalde at dei veit om tippoldefedre som var jåttseglarar og aktive på andre måtar i amerikansk seglsport.
På Venelaget si nettside (jaattlaget. com/en) finst det også mykje om jåttseglarane, mellom anna videoen «The Norwegian Steam», som Jarle Petterson laga til Venelaget tidlegare i år. Elevane får på denne måten bra kunnskap om denne spennande og viktige perioden i Tysnes si nyare lokalsoge.
