UNGT TALENT: Her framfører Elise Sørhus Dalen «Himlen i min favn» med god innleving.
UNGT TALENT: Her framfører Elise Sørhus Dalen «Himlen i min favn» med god innleving.

Magiske juletonar frå lokale songspirer

Dei musikalske høgdepunkta stod i kø på førjulskonserten i kulturkyrkja.
Publisert 06.12.2018 kl. 13.53. Oppdatert 07.12.2018 kl. 08.33.

Med stort og smått var det kring 100 som fekk seg ei avslappande stund i kyrkja på Onarheim onsdag kveld.

– Veldig kjekt at så mange våga seg ut i vintermørket, innleia kulturkyrkjeleiar Helge Olav Instøy, etter å ha opna med «Sjå, tusen julelys blir tent» saman med Arne Kleppe.

Den lystige duoen framførte også «Kvelden lister seg på tå», før andre songkrefter tok over.


Jentene imponerte

Neste ut i kulturkyrkja var dei rutinerte svigerinnene Marianne Tvedt og Jenny Kjellevold. To songfuglar som er godt kjende for tysnesingane frå før av, og som både i lag og kvar for seg baud på vakre songar i den julepynta kulturkyrkja.

For underteikna var gåsehudfaktoren ekstra stor då Marianne song «Jula Heime» – ein norsk versjon av Maria Mena sin «Home For Christmas».

Og det blei ikkje mindre stemningsfullt då Louise Vermedal Lunde (12) og Elise Sørhus Dalen (12) greip mikrofonane. Dei unge, scenevande veninnene hausta mykje applaus frå publikum, og Elise si framføring av «himlen i min hamn» kan nok trekkjast fram som eit av høgdepunkta på konserten.


Både spelte og song

Ei anna jente som bidrog til å skapa magisk stemning, var Jannike B. Espevik. Ho hadde to songar på førjulskonserten, og tok ekstra godt i på «Halleluja». Tonefølgje stod ho for sjølv.

Det kjem nok forresten ein ny sjanse til å høyra denne dyktige jenta når 10. klasse inviterer til show over nyttår.

Siste bolken av konserten var det Marianne og Jenny som stod for, med alt frå «Long december night» til den klassiske julesongen «Tenn lys».

Avslutningsvis fekk publikum høyra «Jon Blund-sangen», og med det burde sjansen for mange låge skuldrer blant publikum vera maksimert.


– Ei stor musikalsk oppleving

Etter siste strofe blei alle aktørane i konserten bedne om å koma fram, der dei mottok ståande applaus frå dei frammøtte. Her er det på sin plass å nemna at Endre og Eirik Hodneland stod for den musikalske leiinga under konserten, og at Jurgita Bubilaite hadde akkompagnement til dei to yngste sine songar.

Alt i alt var det ein variert og fin førjulskonsert, som endå fleire burde fått med seg.

– Dette blei ei stor musikalsk oppleving. Det er kjekt å få samla lokale krefter med jamne mellomrom, skrytte Helge Olav Instøy etter konsertslutt.


Stolt over kusina

To andre som også likte det dei fekk høyra, var Stine Erstad (11) og Elin Anita Erstad.

– Alt var gøy, kommenerte Stine, som filma delar av konserten med mobilen sin.

– Kven likte du aller best å høyra på?

– Jannike, for ho er kusina mi, sa ho stolt.

Mamma Elin Anita fortalde med glimt i auga at ho var litt inhabil når det galdt å skryta over niesa Jannike, men kom med følgjande lovord om konserten:

– Det er eit kjempeflott tiltak, med gode prestasjonar. Dei unge imponerer veldig!



FLOTTE TONAR: Eirik Hodneland og Jenny Kjellevold i aksjon.
FLOTTE TONAR: Eirik Hodneland og Jenny Kjellevold i aksjon.
JULEPYNTA KYRKJE: Marianne Tvedt leverer alltid varene.
JULEPYNTA KYRKJE: Marianne Tvedt leverer alltid varene.
TRIVELEG DUO: Det var Arne Kleppe og Helge Olav Instøy som opna konserten.
TRIVELEG DUO: Det var Arne Kleppe og Helge Olav Instøy som opna konserten.
FILMA: Stine Erstad (11) likte det ho fekk høyra, og foreviga delar av konserten med mobilen.
FILMA: Stine Erstad (11) likte det ho fekk høyra, og foreviga delar av konserten med mobilen.
DYKTIG: Jannike B. Espevik framførte både «Gje meg handa di ven» og «Halleluja»
DYKTIG: Jannike B. Espevik framførte både «Gje meg handa di ven» og «Halleluja»
VENINNER: Louise Vermedal Lunde og Elise Sørhus Dalen samarbeidde om nokre av songane.
VENINNER: Louise Vermedal Lunde og Elise Sørhus Dalen samarbeidde om nokre av songane.

Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...