JULEKONSERT: For tredje år på rad var Inger Lise Hope på Mandelhuset med sin julekonsert.
JULEKONSERT: For tredje år på rad var Inger Lise Hope på Mandelhuset med sin julekonsert.

– Tysnes er min andre heim

Inger Lise Hope fekk ståande applaus etter julekonserten på Mandelhuset søndag.
Publisert 10.12.2018 kl. 12.57.

Det var ikkje heilt fullt på Mandelhuset søndag kveld, men publikum fekk valuta for pengane då Inger Lise Hope gjekk på scenen.

Julekonserten hennar «Fredeleg jul» er i ferd med å verta ein tradisjon på Tysnes i adventstida, og denne gongen hadde ho i tillegg med seg fullt band på scenen.

Hope si vakre sangstemme vart akkompagnert av gitarist og ektemann Svein André Olsen, Petru Popa på piano og keyboard, Bernt Yngve Kvam på slagverk og bassist Theodor Barsnes Onarheim. Sistnemnte vart av Hope presentert som «litt» tysnesing.


Tysnes i blodet

Hope sjølv har også tette band til Tysnes.

– Farfaren min kjem frå Hope i Tysnes, og foreldra mine har nett flytta hit, fortel songaren.

Ho er sjølv frå Stavanger, men trivst godt i Tysnes.

– Tysnes er min andre heim. Når eg kjem hit, så føler eg at eg kjem heim, seier ho.

Det er dermed ikkje tilfeldig at Hope har vorte eit fast innslag på Mandelhuset i førjulstida.

– Det er alltid koseleg å koma hit, og i år har eg valt å starta turneen min her.

Men sjølv med nær familie i kommunen, vert det førebels ikkje tid til noko Tysnes-kos for artisten.

– Eg må rett vidare til neste konsert, men eg skal hit i romjula. Då skal eg ha fri og berre slappa av, fortel Hope.


Stemningsfullt

Konserten baud på ei rekkje kjente og kjære julesongar, både på norsk og engelsk. I tillegg spelte ho eigne låtar, mellom anna den nye singelen «Månestøv», som er skriven av ektemannen Olsen, og har fått gode kritikkar dei siste vekene.

Etter å ha opna med «I En Natt» og «Kviskre Ei Bønn» frå «Fredeleg Jul»-albumet frå 2016, kom juleklassikarane på rekkje og rad.

Fyrst song ho ein samansett versjon av Maria Mena sin kjente låt «Home for Christmas», der Hope song eit vers og refreng oversett til norsk, før Olsen song vers og refreng på orginalspråket engelsk.

Deretter følgde eit av dei største høgdepunkta under konserten.

– For meg er det ingen jul utan «Reisen til julestjernen», og ein stor julesokk med godteri i sofaen på julemorgon, sa Hope til publikum, før ho sette i gang med ein vakker versjon av «Sonjas Sang Til Julestjernen»

Det vart ikkje mindre nostalgi og julestemning då ho og bandet sette i gang med nokre av dei gode gamle amerikanske julesongane frå 40- og 50-talet. Fyrst ute var «The Christmas Song», før ein medley med «White Christmas», «Let it Snow! Let it Snow! Let it Snow!» og «Santa Claus is Coming to Town».


Ståande applaus

Nostalgi-trippen toppa seg med ein duett mellom ho og ektemannen på «When You Wish Upon a Star», kjent frå Disney-filmen Pinocchio frå 1940.

Den største applausen fekk Hope og bandet etter ein fortryllande versjon av «Ave Maria», delvis basert på orginalversjonen til Franz Schubert, og delvis på Beyonce sin meir moderne variant av sangen.

– Eg får alltid spørsmål frå publikum om «Ave Maria» kjem, så den tør eg ikkje å ta ut av programmet, sa artisten frå scenen.

Heile konserten vart avslutta med «O’ Helga Natt» og «Jon Blund», kjent frå Jul i Skomakergata, og Hope kunne ta imot ståande applaus frå publikum. Det var ei begeistra samling med tysnesingar som forlet Mandelhuset søndag kveld, og Hope fekk med seg mykje skryt og gode helsingar frå publikum.

– Eg vert heilt sett ut når publikum reiser seg og applauderer. Det er utruleg kjekt med gode tilbakemeldingar, avsluttar Hope.


BAND: Denne gongen hadde Hope med seg fullt band til Tysnes. Til venstre er gitarist Svein André Olsen. I bakgrunnen bassist Theodor Barsnes Onarheim, og trommeslagar Bernt Yngve Kvam.
BAND: Denne gongen hadde Hope med seg fullt band til Tysnes. Til venstre er gitarist Svein André Olsen. I bakgrunnen bassist Theodor Barsnes Onarheim, og trommeslagar Bernt Yngve Kvam.

Siste saker Gå til framsida

Folketalet auka med 14

Ved utgangen av tredje kvartal i 2019 er folketalet i Tysnes kome opp i 2.862. Det er 14 fleire enn ved utgangen av andre kvartal. Då var folketalet 2.848.Elleve personar er fødd i Tysnes i dette kvartalet, medan fire personar har døydd. Det gjev eit fødselsoverskot på sju.I same periode har det flytta 30 personar inn til Tysnes, av desse fire frå utlandet. 23 personar har flytta...

Klart for ny førjulsmesse

Laurdag er det tid for den tradisjonsrike førjulsmessa i Tysnes bedehus, der overskotet går til Indremisjonen sitt arbeid i vår krets. Her kan ein kjøpa heimebakst, handarbeid og andre kjekke varer, i tillegg til å få med seg eit variert program om ein ynskjer det. Barne- og familiearbeidar i IMS, Lise Marie Thuestad Litlabø stiller som andaktshaldar, og det blir song av både...