SOLISTAR: Martha Berit Belt og Siw Noria Øiongen imponerte stort. (Alle foto: Vetle Mikkelsen)
SOLISTAR: Martha Berit Belt og Siw Noria Øiongen imponerte stort. (Alle foto: Vetle Mikkelsen)

– Dette er reine slektstreffet

I dag laurdag var det duka for julekonsert i Tysnes kyrkje. Tysnes musikklag med gjester spelte jula inn.
Publisert 15.12.2018 kl. 20.28. Oppdatert 16.12.2018 kl. 11.01.

– Eg må innrømma at eg har vore på Tysnes meir enn det eg høyrest ut som, sa Siw Noria Øiongen til dei mange frammøtte i Tysnes kyrkje.

Dei fleste med nokolunde øyra for språk, kunne nok høyra at solisten var frå Rogaland, meir spesifikt Sandnes.

– Eg er det eg vil kalla ein «snikabelt», sjølv om etternamnet mitt er Øiongen. Far min heiter Belt. Dette er reine slektstreffet, spøkte den dyktige vokalisten.

Med seg på scena hadde ho nemleg proffpianist Martha Berit Belt, søskenbarnet til tysnesing Arve Belt, som igjen er onkel til Siw Noria.

Som om det ikkje var nok, var det òg fleire Beltar blant publikum, så slektstreff-kommentaren var ikkje reint lite treffande.


Dyktige musikarar

Julekonserten til Tysnes musikklag har blitt ein årleg tradisjon, og tradisjonen tru fann den stad i Tysnes kyrkje.

I høve konserten var kyrkja rimeleg fullstappa, og det blei fort tydeleg kvifor; kvaliteten på musikken var noko for seg sjølv.

Frå Tysnes musikklag sine felles instrumentalinnslag, meisterleg dirigert av Yngve Nikolaisen, til dei dyktige solistane sine innslag – alt var på eit høgt musikalsk nivå.

Av Tysnes musikklag sine solistar kan ein nemna både Else Marit Særsten, Nick Hughes, Camilla Sjøvold og Catrine Sandsøy Moss. Dei gjorde alle ein framifrå jobb.

Dei tilreisande solistane Martha Berit Belt og Siw Noria Øiongen imponerte òg stort.

Fingrane til Martha Berit glei tilsynelatande leikande lett over tangentane, og Siw Noria viste at ho har stålkontroll på stemma si.

Det er vanskeleg å velja eitt høgdepunkt frå ein konsert der høgdepunkta kjem på løpande band, men om journalisten måtte velja, ville det blitt Martha Berit Belt og Siw Noria Øiongen si framføring av «Berre eg» («On my own») frå Les Misérables.

– Omsetjinga av denne songen er ein av mine favorittar, fordi den er på nynorsk, sa Siw Noria om songen.


Åndeleg påfyll

Som naturleg er i juletida, var det òg moglegheit for litt åndeleg påfyll i kyrkja.

Sokneprest Marit Isaksen Espedalen stod for ein fin og verdig andakt, og som vanleg trekte presten inn tema som var relevante for situasjonen.

Blant anna var ho inne på måten musikk kan tala både til og for oss:

– Der orda kjem til kort, tar tonane oss med og lar oss berørast, sa soknepresten.


Spesielt å vera på Tysnes

Etter konserten fekk «Tysnes» snakka med dei tilreisande solistane.

– Eg syntest det var spesielt å vera her. Tysnes var ein stor del av oppveksten vår, så det er spesielt å koma tilbake, sa pianist Martha Berit Belt.

– Det var litt slektstreff-tilstandar i dag?

– Ja, me er jo i Belt-slekta begge to, og så speler onkelen min i musikklaget. I tillegg er det nok ein del tantar og onklar og liknande i publikum, sa Siw Noria Øiongen.


Erfarne musikarar

Begge to har lang musikalsk fartstid. Siw Noria har sunge i kor i ei årrekkje, og vore involvert i ymse prosjekt i inn- og utland. No syng ho i gospelkoret HIM og i koret Grex Vocalis.

Martha Berit har spesialisert seg i klassisk pianomusikk, og fullførte ein mastergrad i utøvande musikk ved Griegakademiet i 2016.

– Trur de folk kom i julestemning?

– Ja, viss det ikkje blir jul no, så veit ikkje eg, sa Martha Berit, med glimt i auga.

– Musikklaget leverte verkeleg, la Siw Noria til.


– Heilt fantastisk

I publikum var blant anna Marit Roseth Belt, mor til Martha Berit, og Torbjørg Solheim, som òg er i slekt med dei to musikarane.

– Dette var heilt fantastisk! Eg har ikkje vore med på liknande. Det var magisk, sa Marit smilande.

– Ja, det var kjempebra, la Torbjørg til.

– I dag er eg stolt mamma, smilte Marit.


Må vera rom for dei små

Stina Hope hadde tatt turen til konserten, saman med eldstedottera Sanna Hope Russi og yngstedottera Hedda Hope Russi. Ho var imponert over musikarane:

– Det var ei veldig fin oppleving. Det var vakker musikk og flinke solistar, sa ho.

– Eg kom veldig i julestemning, la ho til.

Om valet med å ta begge barna med på konserten sa ho følgjande:

– Hedda er for liten til å få med seg så mykje, men Sanna er veldig glad i musikk. Det må vera rom for dei små òg.


MUSIKKLAGET: Tysnes musikklag la lista høgt, og hadde stålkontroll på det musikalske.
MUSIKKLAGET: Tysnes musikklag la lista høgt, og hadde stålkontroll på det musikalske.
STINN KYRKJE: Det var ikkje mange ledige plassar i Tysnes kyrkje under konserten.
STINN KYRKJE: Det var ikkje mange ledige plassar i Tysnes kyrkje under konserten.
TROMPETISTAR: Camilla Sjøvold og Catrine S. Moss spelte Pie Jesu på trompet.
TROMPETISTAR: Camilla Sjøvold og Catrine S. Moss spelte Pie Jesu på trompet.
KULTURSKULELÆRAR: Walisar Nick Hughes var blant solistane på konserten. Han er ein kjent person i kulturlivet i kommunen.
KULTURSKULELÆRAR: Walisar Nick Hughes var blant solistane på konserten. Han er ein kjent person i kulturlivet i kommunen.
ANDAKT: Sokneprest Marit isaksen Espedalen sørgde for åndeleg påfyll.
ANDAKT: Sokneprest Marit isaksen Espedalen sørgde for åndeleg påfyll.
MAGISK: Både Marit Roseth Belt og Torbjørg Solheim var storfornøgde med konserten.
MAGISK: Både Marit Roseth Belt og Torbjørg Solheim var storfornøgde med konserten.
SMÅBARNSMOR: Både Stina Hope og barna Sanna og Hedda Hope Russi var fornøgde etter ein musikalsk heilaften med dyktige musikarar.
SMÅBARNSMOR: Både Stina Hope og barna Sanna og Hedda Hope Russi var fornøgde etter ein musikalsk heilaften med dyktige musikarar.

Siste saker Gå til framsida

Har studert tilstanden til den store eika i Våge

«Festivalkontoret» i Våge skal utvidast. Derfor trong Fonna AS meir info om den gamle eika ved kontoret.– Eg kom med ei anbefaling om å finna ut litt om vitaliteten og helsetilstanden til treet, og gjerne òg finna ut risikoane med treet, seier arborist Kristoffer Nerhus, dagleg leiar i Hardanger Hagehjelp.Han kom i kontakt med Sigvard Madsen i Fonna AS, som følge av...

Tommy stod på og lukkast

Endeleg, etter fire års innsats av fleire gode krefter, og ikkje minst Tommy Gundersen (24) sjølv, har han fått lærlingeplass og er nærast sikra jobb i framtida.