Selma (9): – Det var gøy å kjefta på Iselin!

Elevane ved Uggdal skule baud på fengjande songar, bøttevis med ordpsel og ei historie som varma hjarta.
Publisert 20.12.2018 kl. 06.00.

Tysnesingar i alle aldrar flokka seg til Tysneshallen, då Uggdal skule sette opp musikalen «Knut og Fjompenissen» tysdag.

Musikalen er skriven av Målfrid Breivik og Arild Jensen, og følgjer nissen Knut si ferd for å redda jula.


Eit skjebnemøte

Historia byrjar med at Knut, spelt av Rasmus Hustad, syng om at han lurer på kven han er.

Han føler nemleg ikkje at han passar inn hos familien sin, sjølv om han er veldig glad i dei.

Livet hans blir snudd på hovudet når han møter ein fjompenisse ved namn Kva, spelt av Selma Nikolaisen.

Fjompenissen avslører at Knut ikkje eigentleg høyrer heime der han bur no.

– Du kjem frå nissebyen! seier Kva.

– Hæ? Nesbyen? undrar Knut, til latter frå salen.

Det blei òg spøkt ein del med namnet til Kva. Kvar gong nokon ytra spørjeordet, tok fjompenissen ein piruett, og sa «det er eg».


Magiske bjeller

Knut har ei bjelle som han ikkje hugsar korleis han fekk. Når han ringer med denne, høyrer han lyden av gløgg og lukta av barnesong. Kva har ei bjelle som er lik.

Når Knut og Kva ringer bjellene sine samtidig, hugsar hovudpersonen plutseleg at han er nisse.

Han får òg vita at julenissen endå ikkje har vakna frå sommarsøvnen, og at han derfor ikkje har fått ringt i den store magiske bjella som gir alle nissane magien sin.

Utan nissemagi gløymer nissane kven dei er, og jula vil døy. Slik byrjar ferda mot nissebyen.

På vegen møter dei fleire nissar som har gløymt kven dei er, og som har like bjeller som Knut og Kva.

Dei møter blant anna kulturnissen Kulla, spelt av Iselin Nilsen, og hjulnissen Bromveig, portrettert av Madelen Hillesvik.

– Me må redda jula! er beskjeden Bromveig får av reisefølgjet når dei først møtest.

– Det er ikkje noko gale med hjula på dette gliset her, seier ho då, og viser til den magiske nissevogna si, som sjølvsagt er ein Nissan.


Ferda til nissebyen

Ved hjelp av nissevogna skal reisefølgjet koma seg til Nordpolen. Det går ikkje heilt som planlagt.

Først endar dei opp på Sørpolen, der dei møter eit knippe miljøbevisste pingvinar, som syng om kollektivtransport og miljøvern.

Blant pingvinane finn ein òg ein pingvingjetar. Det er villnissen Per Grynt, som òg har gløymt at han er nisse, heilt til han og dei andre ringer med bjellene sine.

Deretter endar dei opp i Nord-Polen – Nord i det europeiske landet Polen.


Knuffing på scenen

Midtvegs i showet, blei stemninga blant hovudkarakterane noko laber.

Fjompenissen Kva fekk skylda for at dei enda opp på feil stader, og det oppstod ein krangel mellom Kva og Kulla.

Det enda med at Diakonissen Nanna braut inn, og fekk alle involverte til å roa seg ned, samtidig som ho minna dei om viktigheita av samhald og vennar.


Jula blir redda

Til slutt kjem dei fram til nissebyen, kor det blir avslørt at ein nisse ved namn Gnissen har putta sovemiddel i grauten til nissen.

– Jula skal døy, og eg skal bli folk, seier Gnisse, som ikkje føler seg heime i nissesamfunnet.

Knut fortel at han veit korleis Gnissen har det, for han har vakse opp blant folk, trass i at han sjølv er nisse.

Då avslører mor til Gnissen at han faktisk er halvt menneske.

Med visse om at han ikkje berre er nisse, fekk Gnissen litt ro i sjela, og ville ikkje lenger øydeleggja jula.

– Eg trur faktisk eg gler meg litt til jul, eg, sa guten.

Gjennom heile showet blei det hinta om at Knut var julenissen sin son, og at det berre var Knut som kunne vekkja han. Mot slutten hugsa Knut alt, og hugsa då også at han er sonen til julenissen.

Så ringde Knut og alle dei andre nissane med bjellene sine. Nissen vakna, og jula var redda.


Imponerande show

Heile opplegget rundt musikalen var veldig proft. Lys og lyd var godt rigga, og alle elevane i stykket gjorde ein god jobb.

Showet fløymde over av ordspel og overtydande skodespelprestasjonar.

Rektor Bente Raknes overdreiv ikkje, då ho nokre timar før stykket sa at nokre av elevane hadde manus tjukke som bøker.

I sentrum av musikalen var viktige bodskapar om miljø, samhald og tilhøyrsle.


Gøy å opptre

– Det var gøy, men litt skummelt, seier Selma Nikolaisen til «Tysnes».

– Kvifor var det gøy?

– Fordi me slapp å vera i timane, gliser Rasmus Hustad.

Avisa møter Selma og Rasmus, saman med Iselin Nilsen, dagen etter showet.

Dei tre spelte alle sentrale roller i oppsetjinga.

– Eg verkar i beina etter å ha tatt så mange piruettar, seier Selma.

På spørsmål om kva som var mest gøy med showet, svarer dei noko ulike ting.

– Det var veldig gøy å kjefta på Iselin! ler Selma.

– Det var gøy å ringa med bjella. Eg gjorde jo nesten ikkje anna, spøkjer hovudrolleinnehavar Rasmus.

Etter showet fekk skodespelarane mykje skryt:

– Eg slapp ikkje ut av den salen før eg hadde snakka med 26 millionar menneske, seier Rasmus, med glimt i auga.


KRANGLA: Iselin Nilsen (t.v.) og Selma Nikolaisen spelte to av hovudrollene i musikalen – og det på ein glimrande måte. (Alle foto: Camilla Korsnes)
KRANGLA: Iselin Nilsen (t.v.) og Selma Nikolaisen spelte to av hovudrollene i musikalen – og det på ein glimrande måte. (Alle foto: Camilla Korsnes)

Siste saker Gå til framsida

Debatt: – Vi kjøpte ikke for å drive hotell

Vi har satt i gang en prosess hvor vi ønsker å regulere eiendommen til hyttetomter og et leilighetsbygg. Prosjektet er fortsatt i en veldig tidlig fase. I forbindelse med den påbegynte reguleringsplanen hadde bladet Tysnes en artikkel om prosjektet. Vi redegjør der i korte trekk for hva vi ønsker med...

Teiknaren som karikerte Hitler

Karikaturteiknaren Odd Einarson budde fleire år på Tysnes. I 1932 møtte han sjølvaste Hitler, og fekk lov til å teikna karikatur av den seinare berykta diktatoren. Einarson åtvara tidleg mot nazismen.