FERSK SJEF: André Skjolde Djuve har høge forventningar for tida framover. (Foto: Vetle Mikkelsen)
FERSK SJEF: André Skjolde Djuve har høge forventningar for tida framover. (Foto: Vetle Mikkelsen)

André (26): – Tysnesingane har tatt meg godt imot

Då André Skjolde Djuve fekk jobbtilbodet, pakka han tinga sine og flytta til Tysnes. Stordabuen er ny dagleg leiar for Onarheim Landhandel.
Publisert 27.12.2018 kl. 06.00.

– Eg har eigentleg alltid jobba i butikk. Frå eg var 18 har eg jobba i Meny og Kiwi, seier André Skjolde Djuve (26).

Meidell AS lyste ut stillinga som dagleg leiar for Onarheim Landhandel AS i fleire månadar, utan å finna ein passande kandidat. No har André kapra stillinga.

Med sine åtte års erfaring frå daglegvarebransjen, kan ein skjønna kvifor arbeidsgivaren meiner han er rett person for jobben.

3. desember starta André, som opphavleg kjem frå Stord, i den nye jobben på OnarTun.


Verka spennande

– Eg såg annonsen og tenkte at dette ser spennande ut, fortel den ferske Joker-sjefen.

Så langt har folket på Onarheim gjort godt intrykk på han, og han synest bygda er ein koseleg, liten plass.

– Eg har familie her, så eg er litt kjent på Onarheim. Eg har alltid likt meg på Tysnes, smiler André, som har ei mor som kjem frå bygda.

Han ser likevel fram til å bli endå betre kjent med tysnesingane, og å byggja nye vennskap og kundeforhold på øya.


Litt nytt og litt likt

– Kva tenkte du då du fekk jobben?

– Eg blei ganske glad, og tenkte at dette blir spennande. Det blir noko av det same som eg er vand med og noko nytt, seier André.

Han legg til at det er ein del rolegare på Tysnes enn på Stord, men at han trivst godt. På fritida har han så langt gått ein del på tur.

– Å bu på Tysnes er ein gyllen sjanse for fine turar, seier stordabuen, som gler seg spesielt til å oppleva sommaren på Tysnes neste år.


Glad i bil

– Kva anna liker du å gjera på fritida?

– Eg har ei bilinteresse, men eg driv ikkje eigentleg med bil på fritida, seier han.

Men sjølv om han ikkje driv og mekkar og skrur så mykje, kan ein seia at bilinteressa er godt over gjennomsnittet.

– Eg har tre bilar. Det er to BMW-ar og ein Volkswagen Polo, avslører han.

André er òg klar på kva som er favorittbilen:

– Det må vera ein Toyota Supra. Det er gutedraumen.


Liker utfordringar

– Eg trur eg kjem til å få mange nye erfaringar, i tillegg til nye kjenningar og ein kjekk arbeidsplass, meiner André.

I tillegg til å vera dagleg leiar for Joker-butikken på Onarheim, har André óg ansvar for dei andre fasilitetane på OnarTun.

Desse inkluderer treningssenter, bakeri, kafédrift, utleige av motellrom og drift av gjestehamna OnarHamn.Det er med andre ord litt av ein jobb han har framfor seg.

– Eg ser positivt på utfordringar, og er innstilt på at det blir ein del jobb, seier André, som sjølv meiner utfordringar bidrar til ein variert arbeidskvardag.

– Ingen dag er heilt lik.


Folk er imøtekomande

– Korleis har tysnesingane tatt deg imot?

– Eg føler dei er ganske imøtekomande heile gjengen. Tysnesingane har tatt meg godt imot, svarer han.

Det han liker best med å jobba i butikk er det sosiale. Han verdset kundekontakten, og det at ein får prata med mange ulike menneske.

– Du er glad i folk?

– Ja, smiler André.

– Elles hadde eg ikkje vore i dette yrket.


Siste saker Gå til framsida

Har studert tilstanden til den store eika i Våge

«Festivalkontoret» i Våge skal utvidast. Derfor trong Fonna AS meir info om den gamle eika ved kontoret.– Eg kom med ei anbefaling om å finna ut litt om vitaliteten og helsetilstanden til treet, og gjerne òg finna ut risikoane med treet, seier arborist Kristoffer Nerhus, dagleg leiar i Hardanger Hagehjelp.Han kom i kontakt med Sigvard Madsen i Fonna AS, som følge av...

Tommy stod på og lukkast

Endeleg, etter fire års innsats av fleire gode krefter, og ikkje minst Tommy Gundersen (24) sjølv, har han fått lærlingeplass og er nærast sikra jobb i framtida.